ഡൽഹി: സുപ്രിംകോടതി കൊളീജിയം അംഗമായി ജസ്റ്റിസ് ബി.വി നാഗരത്‌ന. ഇന്നലെ ജസ്റ്റിസ് അഭയ് എസ്. ഓഖ വിരമിച്ചതോടെയാണ് നാഗരത്‌ന ചീഫ് ജസ്റ്റിസ് നേതൃത്വം നൽകുന്ന കൊളീജിയം അംഗമായത്. കൊളീജിയം അംഗമാകുന്ന നാലാമത്തെ വനിതയാണ്. 75 വർഷത്തെ ചരിത്രത്തിനിടയിൽ സുപ്രിംകോടതിയിൽ 11 വനിതാ ജഡ്ജിമാർ മാത്രമാണുണ്ടായത്. അതിൽ മൂന്ന് പേർ മാത്രമാണ് ഇതിന് മുമ്പ് കൊളീജിയം അംഗമായവർ. 2003ൽ ജസ്റ്റിസ് റൂമാ പാലാണ് കൊളീജിയത്തിലെത്തുന്ന ആദ്യത്തെ വനിത. 16 വർഷത്തിന് ശേഷം 2019ൽ ജസ്റ്റിസ് ബാനുമതി കൊളീജിയം അംഗമായി. 

2020 ജൂലൈയിൽ കൊളീജിയത്തിലെത്തിയ ജസ്റ്റിസ് ഇന്ദിരാ ബാനർജിയാണ് മൂന്നാമത്തെയാൾ. റൂമാ പാലിന് മൂന്ന് വർഷവും ബാനുമതിക്ക് ഒരു വർഷവും കൊളീജിയത്തിലിരിക്കാനായെങ്കിൽ ഒരു മാസത്തിൽ താഴെ മാത്രമെ ഇന്ദിരാ ബാനർജിക്ക് കൊളീജിയത്തിന്റെ ഭാഗമാകാൻ കഴിഞ്ഞൂള്ളൂ. ചീഫ് ജസ്റ്റിസ് അടക്കം സുപ്രിംകോടതിയിലെ മുതിർന്ന അഞ്ചംഗങ്ങളാണ് കൊളീജിയത്തിലുണ്ടാകുക. സുപ്രിംകോടതിയിലേക്കും ഹൈക്കോടതികളിലേക്കും ജഡ്ജിമാരെ നിയമിക്കാനും സ്ഥലംമാറ്റാനും ശുപാർശ ചെയ്യുന്നതടക്കമുള്ള സുപ്രധാന നടപടികളാണ് കൊളീജിയത്തിന്റെ അധികാര പരിധിയിലുള്ളത്.

ചീഫ് ജസ്റ്റിസ് ബി.ആർ ഗവായ്, ജസ്റ്റിസുമാരായ സൂര്യകാന്ത്, വിക്രംനാഥ്, ജെ.കെ മഹേശ്വരി എന്നിവരാണ് ജസ്റ്റിസ് നാഗരത്‌നയെക്കൂടാതെ നിലവിലെ കൊളീജിയം അംഗങ്ങൾ. രാജ്യത്തെ ആദ്യത്തെ സുപ്രിംകോടതി വനിതാ ചീഫ് ജസ്റ്റിസായി കൊളീജിയത്തിന് നേതൃത്വം നൽകിയ ശേഷമായിരിക്കും 2027ൽ ജസ്റ്റിസ് നാഗരത്‌ന വിരമിക്കുക. പക്ഷേ ചീഫ് ജസ്റ്റിസ് പദവിയിൽ ജസ്റ്റിസ് നാഗര്തനയ്ക്ക് 36 ദിവസത്തെ കാലാവധിയേയുള്ളൂ. 

നോട്ടുനിരോധനം, ബിൽക്കീസ് ബാനു കേസ് തുടങ്ങിയവയിലടക്കം സുപ്രധാന വിധികൾ പുറപ്പെടുവിച്ച ജസ്റ്റിസ് നാഗരത്‌ന രാജ്യത്തെ 19ാമത് ചീഫ് ജസ്റ്റിസായിരുന്ന ഇ.എസ് വെങ്കട്ടരാമയ്യയുടെ മകളാണ്.