ന്യൂഡൽഹി: ബി.ജെ.പി നേതാവും ഡൽഹി മന്ത്രിയുമായ കപിൽ മിശ്രയുടെ സി.എ.എ വിരുദ്ധസമരകാലത്തെ മുസ്‌ലിം വിരുദ്ധ ട്വീറ്റുകളിൽ അന്വേഷണം നടത്താത്ത ഡൽഹി പൊലിസിന് കോടതിയുടെ രൂക്ഷവിമർശനം. 
ആം ആദ്മി പാർട്ടിയും കോൺഗ്രസും ഷഹീൻ ബാഗ് പോലെയുള്ള മിനി പാകിസ്ഥാൻ സൃഷ്ടിക്കുന്നു, അന്നത്തെ നിയമസഭാ തെരഞ്ഞെടുപ്പ് ഇന്ത്യയും പാകിസ്ഥാനും തമ്മിലായിരിക്കുമെന്നതടക്കമുള്ള ട്വീറ്റുകളുടെ പേരിലാണ് പൊലിസിനെ കോടതി വിമർശിച്ചിരിക്കുന്നത്.

ട്വീറ്റിൽ അന്വേഷണം നടത്തണമെന്ന് പൊലിസിനോട് നിർദേശിച്ചിട്ടും അന്വേഷിച്ചെന്നു വരുത്തുക മാത്രമാണ് പൊലിസ് ചെയ്തതെന്ന് അഡിഷണൽ ചീഫ് ജുഡിഷ്യൽ മജിസ്ട്രേറ്റ് വൈഭവ് ചൗരസ്യ കുറ്റപ്പെടുത്തി. മിശ്രയുടെ ട്വിറ്റർ ഹാൻഡിൽ പ്രകാരം തെളിവുകൾ ശേഖരിക്കുന്നതിനായി കഴിഞ്ഞ വർഷം മാർച്ച് മുതൽ കോടതി ആത്മാർഥമായ ശ്രമം നടത്തിയിരുന്നുവെങ്കിലും വെറുതെയായി.

കഴിഞ്ഞ മാർച്ചിൽ കോടതി അന്വേഷണത്തിലെ പോരായ്മകൾ ചൂണ്ടിക്കാണിക്കുകയും കൂടുതൽ അന്വേഷണം ആവശ്യപ്പെടുകയും ചെയ്തിരുന്നു. എന്നാൽ, ആവർത്തിച്ചുള്ള ഉത്തരവുകൾ ഉണ്ടായിരുന്നിട്ടും പൊലിസ് കാര്യമായെടുത്തില്ല. കേസ് പരിഗണിച്ചപ്പോൾ പൊലിസിന്റെ ഭാഗത്തുനിന്ന് ആരും ഹാജരായില്ലെന്നും കോടതി ചൂണ്ടിക്കാട്ടി.

പൊലിസിനെതിരെ കടുത്ത ഭാഷ പ്രയോഗിക്കുന്നതിന് മുമ്പായി പൊലിസ് കേസ് മോശമായി കൈകാര്യം ചെയ്തതായും അന്വേഷണത്തിലെ വീഴ്ചകൾക്ക് ശരിയായ കാരണങ്ങൾ നൽകിയിട്ടില്ലെന്ന വിവരം കമ്മിഷണറെ അറിയിക്കാൻ തീരുമാനിച്ചതായും കോടതി പറഞ്ഞു.

ഡൽഹി നോർത്തേൺ റേഞ്ച് ജോയിന്റ് കമ്മിഷണറോട് ആവശ്യമായ കാര്യങ്ങൾ ചെയ്യാൻ കോടതി ആവശ്യപ്പെട്ടിട്ടുണ്ട്. കേസ് ജൂലൈ 7 ന് വീണ്ടും വാദം കേൾക്കും. 2020 ലാണ് കപിൽ മിശ്രയ്ക്കെതിരെ ജനപ്രാതിനിധ്യ നിയമത്തിലെ സെക്ഷൻ 125 പ്രകാരം കേസ് രജിസ്റ്റർ ചെയ്തത്.