നിലമ്പൂർ: നിലമ്പൂർ, ഉപതെരഞ്ഞെടുപ്പിന്റെ പശ്ചാത്തലത്തിൽ കേരളത്തിലെ ബിജെപിയിൽ അഭിപ്രായ വ്യത്യാസങ്ങൾ മൂർച്ഛിക്കുന്നതിനിടെ, പാർട്ടി പ്രവർത്തകർക്ക് മാധ്യമങ്ങളോട് സംസാരിക്കുന്നതിനും പൊതുവിഷയങ്ങളിൽ പരാതി നൽകുന്നതിനും വിലക്കേർപ്പെടുത്തി പുതിയ സർക്കുലർ.  ബിജെപി സംസ്ഥാന ജനറൽ സെക്രട്ടറി പി. സുധീറിന്റെ പേര് വച്ച് പുറപ്പെടുവിച്ച  സർക്കുലർ, പാർട്ടി അംഗങ്ങൾ മുതൽ ഭാരവാഹികൾ, ജനപ്രതിനിധികൾ വരെ മാധ്യമങ്ങളോട് സംസാരിക്കുന്നതിനും പൊതു വിഷയങ്ങളിൽ പരാതി നൽകുന്നതിനും അന്വേഷണ ഏജൻസികളുമായി ഇടപെടുന്നതിനും മുൻകൂർ അനുമതി നിർബന്ധമാക്കുന്നു.

സംസ്ഥാന അധ്യക്ഷന്റെയോ മീഡിയാ പ്രഭാരിയുടെയോ മുൻകൂർ അനുമതി കൂടാതെ ആർക്കും മാധ്യമങ്ങളോട് പ്രതികരിക്കാനോ അഭിമുഖം നൽകാനോ ചർച്ചകളിൽ പങ്കെടുക്കാനോ പാടില്ലെന്നാണ് സർക്കുലറിൽ വ്യക്തമാക്കിയിരിക്കുന്നത്. പൊതുതാൽപ്പര്യമുള്ള വിഷയങ്ങളിൽ പരാതി നൽകുന്നതിനും വ്യവഹാരങ്ങളിൽ ഇടപെടുന്നതിനും പാർട്ടി അംഗങ്ങൾക്ക് വിലക്കുണ്ട്. ഇത് പാർട്ടിക്കുള്ളിൽ വലിയ വിമർശനങ്ങൾക്ക് വഴിവച്ചിരിക്കുകയാണ്.

“കേരളത്തിൽ, പ്രത്യേകിച്ച് ഉപതെരഞ്ഞെടുപ്പിന്റെയും വരാനിരിക്കുന്ന തദ്ദേശ-നിയമസഭാ തെരഞ്ഞെടുപ്പുകളുടെയും പശ്ചാത്തലത്തിൽ, മാധ്യമങ്ങൾ നേതാക്കളോട് അഭിപ്രായം ആരാഞ്ഞേക്കും. ജനങ്ങൾക്ക് അറിയാവുന്ന, പാർട്ടി നിലപാടുകൾ വ്യക്തമായി അവതരിപ്പിക്കാൻ കഴിവുള്ള നേതാക്കളോടാണ് മാധ്യമങ്ങൾ സംസാരിക്കുക. പി.കെ. കൃഷ്ണദാസ്, വി. മുരളീധരൻ, എം.ടി. രമേശ്, കെ. സുരേന്ദ്രൻ, ശോഭാ സുരേന്ദ്രൻ തുടങ്ങിയവർ ഇത്തരം ചർച്ചകളിൽ പങ്കെടുക്കുന്നത് സ്വാഭാവികമാണ്. എന്നിട്ടും ഇത്തരമൊരു വിലക്ക് എന്തിനാണ് എന്ന് മനസ്സിലാകുന്നില്ല,” എന്ന് ബിജെപി പ്രവർത്തകർ തന്നെ പറയുന്നു. “പാർട്ടി ഒരിക്കലും അഭിപ്രായ സ്വാതന്ത്ര്യത്തിന് എതിര് നിന്നിട്ടില്ല. പൊതു താൽപ്പര്യമുള്ള വിഷയങ്ങളിൽ ഇടപെട്ടാണ് പാർട്ടി ജനങ്ങളിലേക്ക് എത്തുന്നത്. ഇപ്പോഴത്തെ സർക്കുലർ എന്തിനാണ് എന്ന് മനസ്സിലാകുന്നില്ല. പാർട്ടിയിൽ അടിയന്തരാവസ്ഥ പ്രഖ്യാപിച്ചോ എന്നാണ് സംശയമെന്നും സർക്കുലറിനെ സംബന്ധിച്ച് പാർട്ടിക്കുള്ളിൽ തന്നെ അഭിപ്രായങ്ങളുണ്ട്.