ടെഹ്‌റാൻ: ഇറാനിലേക്ക് പോയ പഞ്ചാബ് സ്വദേശികളായ മൂന്ന് ഇന്ത്യൻ യുവാക്കളെ തട്ടിക്കൊണ്ടുപോയതായി കുടുംബങ്ങൾ ആരോപിച്ചു. മെയ് 1 മുതൽ കാണാതായ യുവാക്കളെ കണ്ടെത്താൻ ഇന്ത്യൻ എംബസി ഇറാൻ അധികൃതരുമായി സഹകരിച്ച് ശ്രമങ്ങൾ തുടരുന്നു. തട്ടിക്കൊണ്ടുപോയവർ മോചനദ്രവ്യം ആവശ്യപ്പെട്ടതായും കുടുംബങ്ങൾ വെളിപ്പെടുത്തി.

പഞ്ചാബിലെ സംഗ്രൂർ, നവാൻഷഹർ, ഹോഷിയാർപൂർ ജില്ലകളിൽ നിന്നുള്ള യുവാക്കളാണ് കാണാതായത്. ഓസ്‌ട്രേലിയയിലേക്ക് വർക്ക് പെർമിറ്റിൽ പോകാനിരുന്ന ഇവരെ ട്രാവൽ ഏജന്റുമാർ വഞ്ചിച്ച് ഇറാനിലേക്ക് അയച്ചതായാണ് ആരോപണം. സംഗ്രൂർ സ്വദേശി ഹുസ്‌നപ്രീതിന്റെ അമ്മയുടെ പരാതി പ്രകാരം, ഏജന്റുമാർ പണം വാങ്ങി 'ഡങ്കി' റൂട്ട് വഴി ഇവരെ ഇറാനിലേക്ക് കൊണ്ടുപോയി. പിന്നീട്, യുവാക്കളെ തട്ടിക്കൊണ്ടുപോയതായും അവരുടെ കൈകൾ കയറിൽ കെട്ടിയും ശരീരത്തിൽ മുറിവുകളും ചതവുകളുമായുള്ള ചിത്രങ്ങളും വീഡിയോകളും തട്ടിക്കൊണ്ടുപോയവർ കുടുംബത്തിന് അയച്ചതായും അവർ ആരോപിച്ചു.

 

 

"മെയ് 1 മുതൽ ഞങ്ങളുടെ ബന്ധുക്കളെ കാണാനില്ല. തട്ടിക്കൊണ്ടുപോയവർ മോചനദ്രവ്യം ആവശ്യപ്പെട്ടിട്ടുണ്ട്," ഹുസ്‌നപ്രീതിന്റെ അമ്മ പറഞ്ഞു. ആദ്യ ദിവസങ്ങളിൽ യുവാക്കളുമായി ബന്ധപ്പെടാൻ കഴിഞ്ഞിരുന്നെങ്കിലും മെയ് 11 മുതൽ യാതൊരു വിവരവുമില്ലെന്ന് കുടുംബങ്ങൾ വ്യക്തമാക്കി. ടെഹ്‌റാനിലെ ഇന്ത്യൻ എംബസി വിഷയത്തിൽ ഇടപെട്ട് ഇറാൻ അധികൃതരുമായി ചർച്ച നടത്തി. "കാണാതായ ഇന്ത്യൻ പൗരന്മാരെ കണ്ടെത്താനും അവരുടെ സുരക്ഷ ഉറപ്പാക്കാനും ഞങ്ങൾ ഇറാൻ അധികൃതരോട് അഭ്യർത്ഥിച്ചിട്ടുണ്ട്. കുടുംബങ്ങളെ പുരോഗതി പതിവായി അറിയിക്കുന്നുണ്ട്," എംബസി എക്‌സ് പോസ്റ്റിൽ വ്യക്തമാക്കി.

ഹോഷിയാർപൂരിൽ നിന്നുള്ള ഏജന്റ് ഒളിവിൽ കഴിയുകയാണെന്നും കുടുംബം ഇയാൾക്കെതിരെ പോലീസിൽ പരാതി നൽകിയതായും വിവരമുണ്ട്. കാണാതായവരിൽ ഒരാളായ ഹോഷിയാർപൂർ സ്വദേശി അമൃത്പാലിന്റെ കുടുംബം പഞ്ചാബ് മന്ത്രി കുൽദീപ് സിംഗ് ധാലിവാളിനെയും എംപി ഡോ. രാജ്കുമാറിനെയും സന്ദർശിച്ച് സഹായം അഭ്യർത്ഥിച്ചു.

'ഡങ്കി' വഴി യുഎസിലേക്ക് അയച്ച നിരവധി ഇന്ത്യൻ പൗരന്മാരെ നാടുകടത്തിയതിന് പിന്നാലെയാണ് ഈ സംഭവം. ഇറാനിലെ ഇന്ത്യൻ എംബസിയും അധികൃതരും യുവാക്കളെ കണ്ടെത്താൻ ശ്രമങ്ങൾ തുടരുകയാണ്.