ന്യൂഡൽഹി: എസ്ഡിപിഐ നേതാവ് കെ.എസ്. ഷാനിന്റെ കൊലപാതകവുമായി ബന്ധപ്പെട്ട കേസിൽ പ്രതികളായ ആർഎസ്എസ് പ്രവർത്തകർക്ക് സുപ്രീം കോടതി ഇടക്കാല ജാമ്യം അനുവദിച്ചു. ജസ്റ്റിസ് സൂര്യകാന്ത്, ജസ്റ്റിസ് ദിപാങ്കർ ദത്ത എന്നിവരടങ്ങിയ ബെഞ്ചാണ് ജാമ്യം അനുവദിച്ചത്. അഭിമന്യു, അതുൽ, സനന്ദ്, വിഷ്ണു എന്നീ പ്രതികൾക്കാണ് ജാമ്യം ലഭിച്ചത്. എന്നാൽ, പ്രതികൾ ആലപ്പുഴ ജില്ലയിൽ പ്രവേശിക്കരുതെന്നും വിചാരണ നടപടികളുമായി പൂർണമായി സഹകരിക്കണമെന്നും കോടതി കർശന നിർദേശം നൽകി.

2021 ഡിസംബർ 18-ന് നടന്ന ഷാനിന്റെ കൊലപാതകം, ആർഎസ്എസ് പ്രവർത്തകന്റെ കൊലപാതകത്തിന് പ്രതികാരമായാണ് നടന്നതെന്നാണ് ആരോപണം. 2022 ഡിസംബർ 3-ന് സെഷൻസ് കോടതി പ്രതികൾക്ക് ജാമ്യം അനുവദിച്ചിരുന്നെങ്കിലും, കേരള ഹൈക്കോടതി 2024-ൽ ഈ ഉത്തരവ് റദ്ദാക്കി. ഇതിനെതിരെ പ്രതികൾ സുപ്രീം കോടതിയെ സമീപിക്കുകയായിരുന്നു. ജാമ്യ വ്യവസ്ഥകൾ പ്രതികൾ ദുരുപയോഗം ചെയ്തതായി തെളിവുകളില്ലെന്ന് നിരീക്ഷിച്ച കോടതി, വിശദമായ വാദം കേൾക്കുന്നതിനായി കേസ് പട്ടികയിൽ ഉൾപ്പെടുത്തി.

പ്രതികൾ പൊലീസിന് വിലാസം നൽകണമെന്നും ആഴ്ചയിൽ ഒരിക്കൽ പൊലീസ് സ്റ്റേഷനിൽ റിപ്പോർട്ട് ചെയ്യണമെന്നും കോടതി നിർദേശിച്ചു. സാക്ഷികളെ സ്വാധീനിക്കുകയോ തെളിവുകൾ നശിപ്പിക്കുകയോ ചെയ്യരുതെന്നും വ്യവസ്ഥയുണ്ട്. സംസ്ഥാന സർക്കാർ ജാമ്യത്തെ എതിർത്തിരുന്നു. ആർഎസ്എസ് നേതാവ് രഞ്ജിത് ശ്രീനിവാസന്റെ കൊലപാതകക്കേസിലെ പ്രതികൾ വധശിക്ഷയ്ക്ക് വിധിക്കപ്പെട്ട് ജയിലിൽ കഴിയുമ്പോൾ, ഷാൻ വധക്കേസിലെ പ്രതികൾക്ക് ജാമ്യം ലഭിക്കുന്നത് സമാധാന അന്തരീക്ഷത്തെ ബാധിക്കുമെന്ന് സർക്കാർ കോടതിയിൽ വാദിച്ചിരുന്നു.