തിരുവനന്തപുരം: കടലിൽ കേരളതീരത്ത് ചരക്കുകപ്പൽ മറിഞ്ഞതിനെത്തുടർന്ന് മത്സ്യം കഴിക്കുന്നതുമായി ബന്ധപ്പെട്ട് ഉയരുന്ന ആശങ്കകൾക്ക് വിരാമമിട്ട് ഫിഷറീസ് മന്ത്രി സജി ചെറിയാൻ. കടൽ മത്സ്യം കഴിക്കുന്നതിൽ യാതൊരു കുഴപ്പവുമില്ലെന്ന് സജി ചെറിയാൻ വ്യക്തമാക്കി. കപ്പൽ അപകടത്തിന്റെ പശ്ചാത്തലത്തിൽ തെറ്റായ വിവരങ്ങൾ പ്രചരിപ്പുക്കുന്നത് അവസാനിപ്പിക്കണമെന്നും മന്ത്രി ആവശ്യപ്പെട്ടു.

സാമൂഹ്യമാധ്യമങ്ങളിലൂടെ നടത്തുന്ന വ്യാജ പ്രചരണം കാരണം പരമ്പരാഗത മത്സ്യത്തൊഴിലാളികൾ ഉൾപ്പെടെയുള്ളവർ പട്ടിണിയിലാണെന്നും ഈ പ്രചാരണത്തിന്റെ അടിസ്ഥാനം അറിയില്ലെന്നും മന്ത്രി പ്രതികരിച്ചു. വ്യാജ പ്രചാരണം എക്‌സ്‌പോർട്ടിങ് സ്ഥാപനങ്ങളെയും ബാധിച്ചിട്ടുണ്ട്. ചെറുകിട മത്സ്യവിപണനം നടത്തുന്ന കച്ചവടക്കാർ ഉൾപ്പെടെ നിരവധിപ്പേർ ആശങ്കയിലാണ്. ജനങ്ങൾ മത്സ്യം വാങ്ങാൻ ഭയക്കുന്ന സാഹചര്യത്തിലേക്ക് പ്രചാരണം വ്യാപിച്ചിരുന്നു, 

ആശങ്കപ്പെടുത്തുന്ന രീതിയിൽ പ്രമുഖ മാധ്യമവും വാർത്ത നൽകിയിരുന്നു. ഇവർക്കെതിരെ കേന്ദ്രവുമായി കൂടിയാലോചിച്ച് നടപടിയെടുക്കുമെന്നും മന്ത്രി പറഞ്ഞു. വ്യാജ പ്രചരണങ്ങൾക്കെതിരെ ക്യാമ്പയിൻ നടത്തുമെന്നും മന്ത്രി പറഞ്ഞു. കണ്ടെയ്‌നറുകൾ മാറ്റുന്നതുമായി ബന്ധപ്പെട്ട നടപടികൾ നടന്നുവരികയാണ്. നിലവിൽ അപകടരമായ കണ്ടെയ്‌നറുകൾ ഒന്നും ഇതുവരെ വന്നിട്ടില്ലായെന്നും മന്ത്രി വ്യക്തമാക്കി.

കപ്പൽ അപകടത്തിൽ ആവശ്യമായ പരിശോധനകൾ നടത്തി നടപടികൾ സ്വീകരിക്കുമെന്നും മന്ത്രി സജി അറിയാൻ അറിയിച്ചു. ആശങ്ക ഉണ്ടാകേണ്ട സാഹചര്യം നിലവിലില്ലെന്ന് പറഞ്ഞ അദ്ദേഹം ദുരിതത്തിലായ മത്സ്യത്തൊഴിലാളികൾക്ക് സമാശ്വാസം നൽകുന്നത് സംബന്ധിച്ച് സർക്കാർ പരിശോധിക്കുമെന്നും വ്യക്തമാക്കി. കേന്ദ്രസർക്കാരുമായി ഇക്കാര്യം ചർച്ച ചെയ്യുമെന്നും മന്ത്രി പറഞ്ഞു.
 
അതേസമയം, കേരളത്തിൽ ട്രോളിങ് നിരോധനം ജൂൺ ഒൻപതിന് ആരംഭിക്കും. 52 ദിവസമായിരിക്കും സംസ്ഥാനത്തിന്റെ തീരത്ത് ട്രോളിങ് നിരോധനമുണ്ടാവുക.