വാഷിങ്ടൺ:  വിദേശ വിദ്യാർത്ഥികളെ വിമർശിച്ച് അമേരിക്കൻ പ്രസിഡന്റ് ഡോണൾഡ് ട്രംപ്. ഹാർവാർഡ് സർവകലാശാലയിലെയും യുഎസിലെ മറ്റു പ്രധാന വിദ്യാഭ്യാസ സ്ഥാപനങ്ങളിലെയും വിദേശ വിദ്യാർത്ഥികൾക്കുള്ള പ്രവേശനം 15 ശതമാനമായി പരിമിതപ്പെടുത്തണമെന്ന് നിർദേശം ഉയർത്തുകയും ചെയ്തു. കൂടാതെ ഈ ട്രംപ്, ഇവരെ "കുഴപ്പക്കാർ" എന്നാണ് വിമർശിച്ചത്.

“നമ്മുടെ രാജ്യത്ത് കലാപമോ അശാന്തിയോ ഉണ്ടാകുന്നത് കാണാൻ ഞങ്ങൾ ആഗ്രഹിക്കുന്നില്ല. ഷോപ്പിംഗ് സെന്ററുകൾ പൊട്ടിത്തെറിക്കുന്നതും തെരുവുകളിലേക്കുള്ള കലാപങ്ങളും കാണാൻ ഞങ്ങൾ ആഗ്രഹിക്കുന്നില്ല. ഈ വിദ്യാർത്ഥികളിൽ ചിലർ തീവ്ര ഇടതുപക്ഷ ചിന്താഗതികളാൽ പ്രേരിതരായി പ്രശ്നങ്ങൾ സൃഷ്ടിക്കുന്നവരായിരുന്നു,” ട്രംപ് ഓവൽ ഓഫീസ് സമ്മേളനത്തിൽ വ്യക്തമാക്കി.

ഹാർവാർഡിനെതിരെ കടുത്ത വിമർശനമാണ് ട്രംപ് ഉന്നയിച്ചത്. “ഹാർവാർഡ് സർവകലാശാലയിൽ പഠിക്കുന്ന വിദ്യാർത്ഥികളിൽ ഏകദേശം 31 ശതമാനവും വിദേശീയരാണെന്നാണ് റിപ്പോർട്ടുകൾ. എവിടെ നിന്നാണ് ഈ വിദ്യാർത്ഥികൾ വരുന്നത്? അവരുടെ പശ്ചാത്തലമെന്താണ്? അവർ പ്രശ്നങ്ങൾ ഉണ്ടാക്കുന്നവരാണോ? ഇവയെല്ലാം അമേരിക്കൻ ജനങ്ങൾക്ക് അറിയേണ്ട കാര്യങ്ങളാണ്. ഈ വിദേശികളുടെ എണ്ണം 15 ശതമാനത്തിലേക്ക് കുറയ്ക്കപ്പെടേണ്ടതാണെന്ന് ഞാൻ വിശ്വസിക്കുന്നു,” ട്രംപ് പറഞ്ഞു.

വിദേശ വിദ്യാർത്ഥികൾക്ക് പ്രവേശനം തടസമെന്ന് ആരോപണം

വിദേശ വിദ്യാർത്ഥികൾ കാരണം അമേരിക്കൻ വിദ്യാർത്ഥികൾക്ക് ഉയർന്ന വിദ്യാഭ്യാസ സ്ഥാപനങ്ങളിൽ പ്രവേശനം നിഷേധിക്കപ്പെടുകയാണെന്നും ഇതിലൂടെ അവരുടെ ഭാവി പ്രതികൂലമായി ബാധിക്കപ്പെടുകയാണെന്നും ട്രംപ് ആരോപിച്ചു. ഹാർവാർഡ് അടക്കമുള്ള സ്ഥാപനങ്ങൾ വിദേശ വിദ്യാർത്ഥികളെ അമിതമായി സ്വീകരിക്കുന്നതിലൂടെ അമേരിക്കൻ വിദ്യാർത്ഥികൾക്ക് ലഭിക്കേണ്ട അവസരങ്ങൾ നഷ്ടമാവുകയാണെന്ന് അദ്ദേഹം അഭിപ്രായപ്പെട്ടു.

“ഹാർവാർഡ് ഒരു ദുരന്തമായി മാറിയിരിക്കുന്നു. അവർ 5 ബില്യൺ ഡോളറിലധികം തട്ടിയെടുത്തു. ഇത്രയും പണമുള്ള സ്ഥാപനങ്ങൾക്ക് സർക്കാർ സഹായം എന്തിന്? അമേരിക്കൻ വിദ്യാർത്ഥികൾക്ക് നിഷേധിക്കുന്ന വിദ്യാഭ്യാസ അവസരങ്ങൾ വിദേശികൾക്ക് തുറന്നുകൊടുക്കുന്നത് ഞങ്ങൾ അംഗീകരിക്കില്ല,” ട്രംപ് കൂട്ടിച്ചേർത്തു.

കൂടുതൽ നിയന്ത്രണങ്ങളുമായി ട്രംപ് ഭരണകൂടം

ട്രംപിന്റെ ഭരണകാലത്ത് കുടിയേറ്റകാർക്കും വിദേശ വിദ്യാർത്ഥികൾക്കുമെതിരെ കടുത്ത നിയന്ത്രണങ്ങൾ നടപ്പിലാക്കിയിരുന്നു. ഫലസ്തീൻ അനുകൂല പ്രതിഷേധങ്ങളിൽ പങ്കെടുത്ത വിദേശ വിദ്യാർത്ഥികളുടെ വിസകളും ഗ്രീൻ കാർഡുകളും റദ്ദാക്കാനുള്ള ശ്രമം ട്രംപിന്റെ ഭരണകൂടം നടത്തിയിരുന്നു. എന്നാൽ, ഇവരിൽ പലർക്കും അന്ത്യത്തിൽ സംരക്ഷണം ലഭിച്ചത് കോടതി ഉത്തരവുകളിലൂടെയാണ്.

ഹാർവാർഡിനും മറ്റ് ഉന്നത വിദ്യാഭ്യാസ സ്ഥാപനങ്ങൾക്കുമുള്ള സർക്കാർ ധനസഹായം മരവിപ്പിക്കാനും ട്രംപ് ഭീഷണി മുഴക്കി. വിദേശ വിദ്യാർത്ഥികളുടെ വിവരങ്ങൾ അധികൃതർക്കു കൈമാറാതെ തുടരുകയാണെങ്കിൽ ബാക്കിയുള്ള ധനസഹായവും നിലയ്ക്കുമെന്ന് അദ്ദേഹം പറഞ്ഞു.ട്രംപിന്റെ ഈ പരാമർശങ്ങൾ യുഎസിലെ വിദേശ വിദ്യാർത്ഥികളോടുള്ള സമീപനം കാര്യമായി ബാധിക്കുമെന്ന് ആകാംക്ഷയോടെ നിരീക്ഷിക്കപ്പെടുന്നു.

 U.S. President Donald Trump has harshly criticized foreign students, claiming many cause unrest and are linked to leftist ideologies. He proposed capping foreign student admissions in top U.S. institutions like Harvard to 15%, down from the current 31%. Trump alleged that foreign students block opportunities for American students and demanded transparency in their origins and funding. He also warned of suspending federal aid to institutions that fail to comply.