കൊൽക്കത്ത: പശ്ചിമബംഗാളിലെ മുർഷിദാബാദ് അക്രമത്തെക്കുറിച്ചുള്ള പ്രധാനമന്ത്രി നരേന്ദ്ര മോദിയുടെ പരാമർശത്തിനെതിരെ രൂക്ഷവിമർശനവുമായി ബംഗാൾ മുഖ്യമന്ത്രി മമത ബാനർജി. രാജ്യത്തെ വിഭജിക്കാൻ അദ്ദേഹം നുണകൾ ഉപയോഗിക്കുകയാണെന്ന് ആരോപിച്ച മമത നടത്തിയ മറ്റൊരു പരാമർശമാണ് കൂടുതൽ ശ്രദ്ധ നേടിയത്. ഓപ്പറേഷൻ സിന്ദൂറുമായി ബന്ധപ്പെട്ട് സർക്കാർ നടത്തുന്ന മുതലെടുപ്പിനെതിരെയാണ് മമതയുടെ രൂക്ഷ പ്രതികരണം. നരേന്ദ്ര മോദി സ്വന്തം ഭാര്യയ്ക്ക് സിന്ദൂരം നൽകിയാൽ മതിയെന്നും മുഴുവൻ സ്ത്രീകൾക്കും നൽകേണ്ടന്നും അവർ പറഞ്ഞു. മോദിയുടെ പ്രചാരണത്തെ "വൃത്തികെട്ടതും പൊള്ളയായതുമായ തന്ത്രങ്ങൾ" എന്ന് അവർ ആരോപിച്ചു.

"നരേന്ദ്ര മോദി, സ്ത്രീകൾക്ക് സിന്ദൂരം നൽകി അപമാനിക്കരുത്. സ്ത്രീകൾ അവരുടെ ഭർത്താക്കന്മാരിൽ നിന്ന് മാത്രമേ സിന്ദൂരം സ്വീകരിക്കൂ. അവർ എന്തിനാണ് അത് നിങ്ങളിൽ നിന്ന് വാങ്ങേണ്ടത്? എന്തുകൊണ്ടാണ് നിങ്ങൾ ആദ്യം നിങ്ങളുടെ സ്വന്തം ഭാര്യയ്ക്ക് സിന്ദൂരം നൽകാത്തത്?" - മമത ബാനർജി ചോദിച്ചു.   
 
രാജ്യത്തെ വിഭജിക്കാൻ അദ്ദേഹം നുണകൾ ഉപയോഗിക്കുകയാണെന്ന് അവർ ആരോപിച്ചു. ബിജെപിയെ ഉടൻ തിരഞ്ഞെടുപ്പിനെ നേരിടാൻ വെല്ലുവിളിക്കുകയും തൃണമൂൽ കോൺഗ്രസ് (ടിഎംസി) മത്സരത്തിന് പൂർണ്ണമായും തയ്യാറാണെന്നും മമത പറഞ്ഞു. ഓപ്പറേഷൻ സിന്ദൂരിന്” സമാനമായ “ഓപ്പറേഷൻ ബംഗാൾ” ആരംഭിക്കുമെന്ന് പ്രതിജ്ഞയെടുത്ത ഒരു ബിജെപി മന്ത്രിയുടെ പരാമർശങ്ങളെ അവർ നേരിട്ട് വെല്ലുവിളിച്ചു. ധൈര്യമുണ്ടെങ്കിൽ നാളെ തിരഞ്ഞെടുപ്പിലേക്ക് പോകൂ. ഞങ്ങൾ തയ്യാറാണ്, ബംഗാൾ നിങ്ങളുടെ വെല്ലുവിളി സ്വീകരിക്കാൻ തയ്യാറാണ് -  മമത കൂട്ടിച്ചേർത്തു.

ബിജെപിയെ "ജുംല പാർട്ടി" എന്നും മമത ബാനർജി പരിഹസിച്ചു. പ്രധാനമന്ത്രി കള്ളങ്ങൾ പ്രചരിപ്പിക്കുകയും തിരഞ്ഞെടുപ്പ് നേട്ടങ്ങൾക്കായി ഓപ്പറേഷൻ സിന്ദൂർ പോലുള്ള സാംസ്കാരിക പ്രചാരണങ്ങളെ രാഷ്ട്രീയവൽക്കരിക്കുകയും ചെയ്യുന്നുവെന്നും അവർ ആരോപിച്ചു.