കൊച്ചി: അധിക തീരുവയില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനേറ്റ തിരിച്ചടിക്ക് പിന്നാലെ സ്വര്‍ണവിലയില്‍ ഇടിവ്. രാജ്യാന്തര വിപണിയിലും കേരളത്തിലും സ്വര്‍ണവിലയില്‍ ഇന്ന് ഇടിവാണ് രേഖപ്പെടുത്തിയിരിക്കുന്നത്. അധിക തീരുവ അടിച്ചേല്‍പിക്കാനുള്ള ട്രംപിന്റെ തീരുമാനം അധികാര പരിധി മറികടക്കന്നതാണെന്ന് ചൂണ്ടിക്കാട്ടി യു.എസ് ഫെഡറല്‍ ട്രേഡ് കോടതി നീക്കം വിലക്കിയിരുന്നു.  

 വിവിധ രാജ്യങ്ങള്‍ക്കെതിരെ ട്രംപ് ഇറക്കുമതി തീരുവ അധികമായി ചുമത്തിയിരുന്നു. യുഎസ് കോണ്‍ഗ്രസിന്റെ പരിധിയില്‍ വരുന്ന നടപടി പ്രസിഡന്റ് ഏറ്റെടുത്ത് ചെയ്യുകയാണ് എന്ന് കോടതിചൂണ്ടിക്കാട്ടി. അധിക ചുങ്കം കുറയ്ക്കണം എന്ന് വിവിധ രാജ്യങ്ങള്‍ അമേരിക്കയുമായി ചര്‍ച്ച നടത്തി വരവെയാണ് കോടതി വിധിവന്നിരിക്കുന്നത്. 

അതേസമയം, ട്രംപിന്റെ അടുത്ത നീക്കം എന്താകുമെന്ന് നിരീക്ഷിക്കുകയാണ് വിപണി. ഫെഡറല്‍ വ്യാപാര കോടതിയുടെ വിധിക്കെതിരെ യുഎസ് ഭരണകൂടം സുപ്രിം കോടതിയെ സമീപിച്ചേക്കുമെന്നാണ് സൂചന. ട്രംപിനെതിരാ കോടതി നീക്കം വിപണിയില്‍ വലിയ മാറ്റങ്ങള്‍ക്ക് കാരണമായിട്ടുണ്ട്. 

ഓഹരി വിപണികള്‍ ഇന്ന് നേട്ടത്തിലാണ്.ഡോളര്‍ സൂചികയും കുതിക്കുകയാണ്. ഏറെ നാള്‍ക്ക് ശേഷം ഡോളര്‍ സൂചിക 100 കടന്നുവെന്നാണ് റിപ്പോര്‍ട്ട്. രാജ്യാന്തര വിപണിയില്‍ സ്വര്‍ണവില 3288ല്‍ നിന്ന് 3260ലേക്ക് കുറഞ്ഞു. വ്യാപാരം തുടരുന്നതിനാല്‍ ഇതില്‍ നേരിയ മാറ്റവും പ്രതീക്ഷിക്കാം.

കേരളത്തിലെ ഇന്നത്തെ സ്വര്‍ണവില

71160 രൂപയാണ് കേരളത്തില്‍ ഇന്ന് 22 കാരറ്റ് ഒരു പവന്‍ സ്വര്‍ണത്തിന്റെ വില. 320 രൂപയാണ് പവന് കുറഞ്ഞിരിക്കുന്നത്. ഗ്രാമിന് 40 രൂപ താഴ്ന്ന് 8895 രൂപയിലുമെത്തി. 18 കാരറ്റ് സ്വര്‍ണം ഗ്രാമിന് 35 രൂപ കുറഞ്ഞ് 7290 രൂപയായിട്ടുണ്ട്. വെള്ളിയുടെ വില ഗ്രാമിന് ഒരു രൂപ കുറഞ്ഞ് 109 എന്ന നിരക്കിലുമെത്തി. നിലവിലെ സ്ഥിതി തുടര്‍ന്നാല്‍ വരുംദിവസങ്ങളിലും സ്വര്‍ണവില കുറഞ്ഞേക്കുമെന്ന് നിരീക്ഷകര്‍ ചൂണ്ടിക്കാട്ടുന്നു.

ഇന്നലെ (ബുധനാഴ്ച) സ്വര്‍ണവിലയില്‍ മാറ്റമുണ്ടായിരുന്നില്ല. എന്നാല്‍ ചൊവ്വാഴ്ച രണ്ട് തവണയായി വിലയില്‍ മാറ്റമുണ്ടാവുകയും ചെയ്തു. രാവിലെ സ്വര്‍ണവില കൂടിയ വില ഉച്ചയ്ക്ക് ശേഷം കുറയുകയിരുന്നു. ഇതിന് ശേഷം ഇന്ന് വീണ്ടും വിലകുറഞ്ഞത് സ്വര്‍ണം വാങ്ങാന്‍ കാത്തിരിക്കുന്നവരെ സംബന്ധിച്ച് നല്ല വാര്‍ത്തയാണ്. 

എന്നാല്‍ ഒരു പവന്‍ സ്വര്‍ണം വാങ്ങുന്നവര്‍ക്ക് പണിക്കൂലിയും മറ്റു ചെലവുകളും ചേര്‍ത്ത് ഇന്ന് 77000 രൂപ വരെ ചെലവ് പ്രതീക്ഷിക്കാം. പഴയ സ്വര്‍ണം വില്‍ക്കുന്നവര്‍ക്ക് പവന് 69500 രൂപ കിട്ടിയേക്കുമെന്നും നിരീക്ഷകര്‍ വ്യക്തമാക്കുന്നു.

Gold prices fell both internationally and in Kerala after the U.S. Federal Trade Court blocked President Donald Trump’s move to impose additional tariffs.