മലപ്പുറം: നിലമ്പൂർ ഉപതെരഞ്ഞെടുപ്പിൽ മത്സരിക്കുന്നതിനായി ലഭിച്ച 25  നാമനിർദേശ പത്രികകളുടെയും സൂക്ഷ്മപരിശോധന പൂർത്തിയായപ്പോൾ ഡെമ്മി സ്ഥാനാർഥികളുടേതടക്കം ഏഴ് പത്രികകൾ തള്ളി.18 പത്രികകൾ സ്വീകരിച്ചു. ആകെ 14 സ്ഥാനാർഥികളാണുള്ളത്. ഷൗക്കത്തലി (ഇന്ത്യൻ നാഷണൽ കോൺഗ്രസ്), എം. സ്വരാജ് (സി.പി.എം), മോഹൻ ജോർജ് (ബി.ജെ.പി), ഹരിനാരായണൻ (ശിവസേന), എൻ. ജയരാജൻ (സ്വതന്ത്രൻ), പി.വി അൻവർ (സ്വതന്ത്രൻ), മുജീബ് (സോഷ്യൽ ഡെമോക്രാറ്റിക് പാർട്ടി), അബ്ദുറഹ്മാൻ കിഴക്കേത്തൊടി (സ്വതന്ത്രൻ), എ.കെ അൻവർ സാദത്ത് (സ്വതന്ത്രൻ), പി. രതീഷ് (സ്വതന്ത്രൻ), പി. രാധാകൃഷ്ണൻ നമ്പൂതിരിപ്പാട് (സ്വതന്ത്രൻ), ജി. സതീഷ് കുമാർ (സോഷ്യലിസ്റ്റ് ജനതാദൾ), വിജയൻ (സ്വതന്ത്രൻ), സാദിഖ് നടുത്തൊടി (സ്വതന്ത്രൻ) എന്നിവരുടേതാണ് സ്വീകരിച്ചത്.

   സാദിക് നടുത്തൊടി (എസ്.ഡി.പി.ഐ), പി.വി അൻവർ (തൃണമൂൽ കോൺഗ്രസ്), സുന്നജൻ (സ്വതന്ത്രൻ), ടി.എം ഹരിദാസ് (നാഷണൽ ഡെമോക്രാറ്റിക് പാർട്ടി), ജോമോൻ വർഗീസ് (സ്വതന്ത്രൻ), ഡോ. കെ. പത്മരാജൻ (സ്വതന്ത്രൻ), എം. അബ്ദുൽ സലീം (സി.പി.എം) എന്നിവരുടെ പത്രികകളാണ് തള്ളിയത്. വ്യാഴാഴ്ച വൈകീട്ട് മൂന്ന് വരെ നാമനിർദേശപത്രികകൾ പിൻവലിക്കാം. 

ALSO READ: വിഡിയോ കോൾ വഴി വീട്ടമ്മയെ ഒന്നര ദിവസം 'ബന്ദി'യാക്കി; 40,000 രൂപ തട്ടിയെടുത്തു 

അൻവർ സ്വതന്ത്രൻ 

നിലമ്പൂർ: നിലമ്പൂരിൽ തൃണമൂൽ കോൺഗ്രസ് സ്ഥാനാർഥിയായി മത്സരിക്കുന്നതിന് പി.വി അൻവർ നൽകിയ പത്രിക തള്ളി. ഇതോടെ അൻവറിന് സ്വതന്ത്ര സ്ഥാനാർഥിയായി മത്സരിക്കേണ്ടിവരും. കേരളത്തിൽ രജിസ്റ്റർ ചെയ്യാത്ത പാർട്ടിയുടെ സ്ഥാനാർഥിയായി മത്സരിക്കാനാകില്ലെന്നാണ് തെരഞ്ഞെടുപ്പ് കമ്മിഷൻ അറിയിച്ചിരിക്കുന്നത്. 

പത്രികയിൽ പുനഃപരിശോധന വേണമെന്ന് അൻവർ ആവശ്യപ്പെട്ടിട്ടുണ്ട്. അതിനിടെ, തന്നെ നേരിടാൻ  കോൺഗ്രസ് അപരനെ ഇറക്കിയെന്ന ആരോപണവുമായി പി.വി അൻവർ രംഗത്തെത്തി. 

Nilambur By-election 7 nominations rejected total 14 candidates