മലപ്പുറം: നിലമ്പൂർ ഉപതെരഞ്ഞെടുപ്പിൽ മത്സരത്തിനില്ലെന്ന് വ്യക്തമാക്കി പി.വി അൻവർ. യുഎഡിഎഫിലേക്ക് ഇല്ലെന്നും എന്ത് തീരുമാനവും അംഗീകരിക്കുമെന്ന് താൻ പറഞ്ഞതാണെന്നും പക്ഷേ വിശ്വാസത നഷ്ടപ്പെട്ടവെന്നും അൻവർ പറഞ്ഞു. ഇതോടെ പി.വി അൻവറിന്റെ രാഷ്ട്രീയ ഭാവി തന്നെ ചോദ്യചിഹ്നമായി മാറുകയാണ്. വി.ഡി സതീശൻ നയിക്കുമ്പോൾ യുഡിഎഫിലേക്ക് ഇല്ലെനാൻ പി.വി അൻവർ പ്രതികരിച്ചത്. എല്ലാവരും കൂടി ചവിട്ടി മൂലയ്ക്ക് ഇരുത്തിയെന്നും അദ്ദേഹം ആരോപിച്ചു. 

മത്സരിക്കാൻ കോടികൾ എത്ര വേണം. കോടികൾ പൊടിക്കുന്ന തെരഞ്ഞെടുപ്പാണ് നടക്കുന്നത്. എന്റെ കയ്യിൽ ഒരു പൈസയുമില്ല. കടക്കാരനാണ്. എല്ലാവരും ചേർന്ന് തകർത്ത് തരിപ്പണമാക്കിയെന്നും പൂജ്യമാക്കിയെന്നും അൻവർ പറഞ്ഞു. തന്റെ സ്വത്തിന്റെ പലതും ജപ്തിയുടെ വക്കിലാണെന്നും അൻവർ വെളിപ്പെടുത്തി. ശത്രുവിനൊപ്പമാണ് ഇപ്പോഴും ചിലരെന്നും അതാരെന്ന് ജനം പിന്നീട് തിരിച്ചറിയുമെന്നും അൻവർ കൂട്ടിച്ചേർത്തു.

പിണറായിസത്തിനെതിരെ പോരാട്ടം നടത്തി ജനങ്ങളിലേക്ക് ഇറങ്ങി വന്ന തന്നെ സ്വീകരിക്കുകയും സഹായിക്കുകയും ആ രാഷ്ട്രീയത്തോടൊപ്പം നിൽക്കുകയും ചെയ്യേണ്ട യുഡിഎഫ് നേതൃത്വത്തിലെ ചില വ്യക്തികൾ അതിന് തയ്യാറായിട്ടില്ലെന്ന് അൻവർ ആരോപിച്ചു. തൃണമൂൽ കോൺഗ്രസിനെ ഘടകക്ഷിയാക്കാത്തതിന് പിന്നിൽ വി.ഡി സതീശനാണെന്നും അൻവർ പറഞ്ഞു. സതീശന് പിന്നിൽ ഗൂഢശക്തിയെന്നും അൻവർ ആരോപിച്ചു. യുഡിഎഫിലേക്കില്ലെന്നും ഒരു നേതാവും ഇനി വിളിക്കേണ്ടെന്നും അദ്ദേഹം മാധ്യമങ്ങളോട് പറഞ്ഞു.