പാരീസ്: പൊതുജനാരോഗ്യത്തെ സംരക്ഷിക്കുകയും പരിസ്ഥിതി മലിനീകരണം കുറയ്ക്കുകയും ചെയ്യുന്നതിന്റെ ഭാഗമായി, ഫ്രാൻസ് പൊതുഇടങ്ങളിൽ പുകവലി കർശനമായി നിരോധിക്കുന്നു. 2025 ജൂലൈ 1 മുതൽ ബീച്ചുകൾ, പാർക്കുകൾ, ബസ് സ്റ്റോപ്പുകൾ, സ്കൂളുകൾക്ക് സമീപം തുടങ്ങിയ എല്ലാ തുറസ്സായ പൊതുസ്ഥലങ്ങളിലും പുകവലി പൂര്‍ണമായും നിരോധിച്ചിരിക്കുന്നതായി ഫ്രഞ്ച് സർക്കാർ അറിയിച്ചു.

കുട്ടികളുള്ളിടത്ത് പുകയില ഇല്ലാതാകണം എന്നതാണ് ഈ നീക്കത്തിന്‍റെ അടിസ്ഥാനം എന്ന് ആരോഗ്യമന്ത്രി കാതറിൻ വൗട്രിൻ വ്യക്തമാക്കി. ഇലക്ട്രോണിക് സിഗരറ്റുകൾക്ക് നിലവിൽ ഇളവ് ലഭിച്ചിരുന്നെങ്കിലും വാപ്പിംഗ് ഉൽപ്പന്നങ്ങൾക്കുമെതിരെ ഭാവിയിൽ കൂടുതൽ നിയന്ത്രണങ്ങൾ കൊണ്ടുവരാനാണ് സർക്കാർ ആലോചിക്കുന്നത്.

നിയമലംഘകർക്ക് പിഴ:

പുകവലി നിരോധനത്തെ ലംഘിക്കുന്നവർക്കെതിരെ €114 (ഏകദേശം ₹11,000) പിഴ ചുമത്തും. നഗര പൊലീസാണ് നിയമം നടപ്പിലാക്കുക. പുകവലി ഉപേക്ഷിക്കാൻ ആഗ്രഹിക്കുന്നവർക്കായി സൗജന്യ സഹായ സംവിധാനങ്ങളും കൂടുതൽ വ്യാപിപ്പിക്കുമെന്ന് ആരോഗ്യമന്ത്രി അറിയിച്ചു.

നിരോധനം കേവലം ആരോഗ്യ സംരക്ഷണത്തിനല്ല – പരിസ്ഥിതി കാരണങ്ങളും മുൻനിർത്തിയതാണ്:
ഫ്രഞ്ച് ബീച്ചുകളിൽ പ്ലാസ്റ്റിക് കുപ്പികൾക്കു പിന്നാലെ ഏറ്റവും കൂടുതലായി കാണപ്പെടുന്ന മാലിന്യം സിഗരറ്റ് ബട്ട്‌സുകളാണെന്ന് പഠനങ്ങൾ വ്യക്തമാക്കുന്നു. ഇവ കടലുകൾക്കും മൃഗജാലങ്ങൾക്കും വലിയ അപകടമാണ്.

75,000 മരണം പ്രതിവർഷം:

ഫ്രാൻസിൽ പുകയില സംബന്ധമായ രോഗങ്ങൾ മൂലം വർഷം തോറും ഏകദേശം 75,000 മരണമുണ്ടാകുന്നു. പ്രായപൂർത്തിയായവരിൽ 23% ആളുകൾ ഇപ്പോഴും ദൈനംദിനം പുകവലി തുടരുന്നു. യൂറോപ്പിൽ ഏറ്റവും ഉയർന്ന നിരക്കുകളിൽ ഒന്നാണ് ഫ്രാൻസിന്റെത്.

ഈ നടപടികൾ 2023–2027 ദേശീയ പുകയില വിരുദ്ധ പദ്ധതിയുടെ ഭാഗമായാണ് നടപ്പാക്കുന്നത്. 2032ഓടെ പുകയില രഹിത തലമുറയെ സൃഷ്ടിക്കുക എന്നതാണ് പ്രധാന ലക്ഷ്യം.

France has announced a strict ban on smoking in public places starting July 1, 2025, to protect public health and the environment. The ban applies to beaches, parks, bus stops, and areas near schools. Violators will face a €114 fine. While electronic cigarettes are temporarily exempt, more regulations on vaping products are under consideration. This move is part of France's 2023–2027 National Anti-Tobacco Plan, aiming for a "tobacco-free generation" by 2032. Over 75,000 deaths occur annually in France due to tobacco-related illnesses.