ഗുവാഹത്തി: കനത്ത മഴയെ തുടർന്ന് അസമിൽ വെള്ളപ്പൊക്കവും മണ്ണിടിച്ചിലും രൂക്ഷമായി. കാംരൂപ് മെട്രോപൊളിറ്റൻ ജില്ലയിൽ ഉണ്ടായ മണ്ണിടിച്ചിലിൽ അഞ്ച് പേർ മരിച്ചതായി റിപ്പോർട്ട്. കാംരൂപ്, കാംരൂപ് മെട്രോ, കാച്ചർ ജില്ലകളിലെ അഞ്ച് റവന്യൂ സർക്കിളുകളിൽ നഗരപ്രദേശങ്ങളിൽ വെള്ളപ്പൊക്കം റിപ്പോർട്ട് ചെയ്തു. 10,000-ലധികം ആളുകൾ ദുരിതത്തിൽ എന്നാണ് വിവരം.

വടക്കുകിഴക്കൻ സംസ്ഥാനങ്ങളിൽ തുടർച്ചയായ മഴയെ തുടർന്ന് ഇന്ത്യൻ കാലാവസ്ഥാ വകുപ്പ് (IMD) 18 ജില്ലകളിൽ റെഡ് അലർട്ട് പ്രഖ്യാപിച്ചു. മൂന്ന് ദിവസമായി തുടരുന്ന മഴ ജനജീവിതത്തെ സ്തംഭിപ്പിച്ചു. അസം സംസ്ഥാന ദുരന്ത നിവാരണ അതോറിറ്റി (ASDMA) പ്രകാരം, മഴയുമായി ബന്ധപ്പെട്ട സംഭവങ്ങളിൽ അഞ്ച് മരണങ്ങൾ റിപ്പോർട്ട് ചെയ്തു. ഗുവാഹത്തിയിലെ ബോണ്ട പ്രദേശത്ത് ഉണ്ടായ മണ്ണിടിച്ചിലിൽ മൂന്ന് സ്ത്രീകൾ മരിച്ചതായി നഗരകാര്യ മന്ത്രി ജയന്ത മല്ല ബറുവ അറിയിച്ചു.

നദികൾ കരകവിഞ്ഞതോടെ ധേമാജി, ലഖിംപൂർ, ഗോലാഘട്ട് ജില്ലകളിലെ എട്ട് റവന്യൂ സർക്കിളുകളിൽ വെള്ളപ്പൊക്കം രൂക്ഷമായി. നോർത്ത് ലഖിംപൂരിൽ ഒരു റിംഗ് ബന്ദ് തകർന്നു. ദുരിതാശ്വാസ പ്രവർത്തനങ്ങൾക്കായി രണ്ട് ക്യാമ്പുകളും ഒരു വിതരണ കേന്ദ്രവും തുറന്നു. ദേശീയ-സംസ്ഥാന ദുരന്ത നിവാരണ സേനകൾ രക്ഷാപ്രവർത്തനങ്ങൾ ഏകോപിപ്പിക്കുന്നു.

വെള്ളപ്പൊക്കം നഗരപ്രദേശങ്ങളിലേക്കും വ്യാപിച്ചതോടെ സ്കൂളുകളും ഓഫീസുകളും അടച്ചു. കാംരൂപ്, കാംരൂപ് മെട്രോ ജില്ലകളിലെ സർക്കാർ ജീവനക്കാർക്ക് പ്രത്യേക കാഷ്വൽ അവധി പ്രഖ്യാപിച്ചു. ദുരിതബാധിതർക്ക് സഹായമെത്തിക്കാൻ അധികൃതർ ശ്രമം തുടരുന്നു.