ബെൽജിയൻ സൂപ്പർതാരം കെവിൻ ഡി ബ്രൂയ്നെ ഇറ്റാലിയൻ ക്ലബ് നാപോളി സ്വന്തമാക്കിയെന്ന് റിപ്പോർട്ടുകൾ. രണ്ട് വർഷത്തെ കരാറിലാണ് താരം സിരി എ ടീമിനൊപ്പം ചേരുക. താരത്തിന്റെ സൈനിങ്ങിന്റെ ഔദ്യോഗിക പ്രഖ്യാപനം വൈകാതെ ഉണ്ടാകുമെന്നാണ് പ്രതീക്ഷിക്കുന്നത്. ഡി ബ്രൂയ്ൻ ഫ്രീ ഏജന്റായാണ് ഇറ്റാലിയൻ ക്ലബ്ബിൽ ചേരുക. 

ഈ സീസൺ അവസാനത്തോട് കൂടി ഡി ബ്രൂയ്ൻ മാഞ്ചസ്റ്റർ സിറ്റി വിട്ടിരുന്നു. നീണ്ട 10 വർഷത്തെ മാഞ്ചസ്റ്റർ സിറ്റിക്കൊപ്പമുള്ള യാത്ര അവസാനിപ്പിച്ചാണ് ഡി ബ്രൂയ്ൻ നാപോളിയിലേക്ക് ചേക്കേറുന്നത്. 2015 സീസണിൽ ജർമൻ ക്ലബ് വോൾഫ്സ്ബർഗിൽ നിന്നുമാണ് കെവിൻ ഡി ബ്രൂയ്ൻ മാഞ്ചസ്റ്റർ സിറ്റിയുടെ തട്ടകത്തിൽ എത്തിയത്.

ഇത്തിഹാദിന്റെ മണ്ണിൽ ഡി ബ്രൂയ്ൻ ലോകത്തെ ഏറ്റവും മികച്ച മിഡ്ഫീൽഡർമാരിൽ ഒരാളായി മാറുകയായിരിക്കുന്നു. ടീമിനൊപ്പം 16 കിരീടങ്ങളാണ് ഡി ബ്രൂയ്ൻ നേടിയിട്ടുള്ളത്. ഇതിൽ ആറ് ഇംഗ്ലീഷ് പ്രീമിയർ ലീഗ് കിരീടങ്ങളും ഒരു ചാമ്പ്യൻസ് ലീഗ് കിരീടവും ഡി ബ്രൂയ്ൻ മാഞ്ചസ്റ്റർ സിറ്റിക്കൊപ്പം സ്വന്തമാക്കിയിട്ടുണ്ട്.

ഇംഗ്ലീഷ് പ്രീമിയർ ലീഗിൽ ഈ സീസണിൽ ഒരു തകർപ്പൻ റെക്കോർഡും ബെൽജിയം താരം സ്വന്തമാക്കിയിരുന്നു. വോൾവസിനെതിരെയുള മത്സരത്തിൽ ഗോൾ നേടിയതോടെ മാഞ്ചസ്റ്റർ സിറ്റിക്കൊപ്പം 250 കോൺഡ്രിബ്യൂഷൻസ് സ്വന്തമാക്കാനാണ് ഡി ബ്രൂയ്ന് സാധിച്ചത്.

 മാഞ്ചസ്റ്റർ സിറ്റിക്ക് വേണ്ടി 92 ഗോളുകളും 158 അസിസ്റ്റുകളുമാണ് താരം നേടിയത്. ഇതോടെ പെപ് ഗ്വാർഡിയോളയുടെ കീഴിൽ 250 ഗോൾ കോൺഡ്രിബ്യൂഷൻസ് നടത്തുന്ന രണ്ടാമത്തെ താരമായി മാറാനും കെവിൻ ഡി ബ്രൂയ്ന് സാധിച്ചു. ഇതിനുമുമ്പ് ഈ നേട്ടം സ്വന്തമാക്കിയത് ഇതിഹാസതാരം ലയണൽ മെസിയാണ്.

Reports suggest that Italian club Napoli have signed Belgian superstar Kevin De Bruyne