പാലക്കാട്: വാളയാറില്‍ ഒറ്റയ്ക്ക് താമസിക്കുന്ന സ്ത്രീയെ വീട്ടില്‍ കയറി പീഡിപ്പിക്കാന്‍ ശ്രമിച്ച  കേസില്‍ വാളയാര്‍ കേസില്‍ ജാമ്യത്തിലിറങ്ങിയ യുവാവ് വീണ്ടും അറസ്റ്റില്‍. വാളയാറിലെ സഹോദരിമാരുടെ ദുരൂഹമരണ കേസില്‍ ജാമ്യത്തില്‍ ഇറങ്ങിയ അട്ടപ്പള്ളം പാമ്പന്‍ വെള്ളംകാട് അരുണ്‍ പ്രസാദിനെയാണ് വാളയാര്‍ പൊലിസ് അറസ്റ്റ് ചെയ്തത്. വാളയാര്‍ കേസിലെ അഞ്ചാം പ്രതിയായിരുന്നു അരുണ്‍ പ്രസാദ്.

ശാരീരിക ബന്ധത്തിന് വിസമ്മതിച്ചു; മുംബൈയിൽ ഭാര്യയെ തീക്കൊളുത്തി കൊല്ലാൻ ശ്രമിച്ച യുവാവ് പിടിയിൽ

ഇക്കഴിഞ്ഞ വെള്ളിയാഴ്ച രാത്രിയായിരുന്നു സംഭവം. വീട്ടില്‍ അതിക്രമിച്ച് കയറി പീഡിപ്പിക്കാന്‍ ശ്രമിച്ചു എന്ന പരാതിയിന്മേലാണ് യുവാവിനെ അറസ്റ്റ് ചെയ്തത്. 

പ്രതി വീട്ടിലെത്തിയതിന് തുടര്‍ന്ന് സ്ത്രീ നിലവിളിച്ച് നാട്ടുകാരെ വിളിച്ചു കൂട്ടുകയായിരുന്നു. തുടര്‍ന്ന് നാട്ടുകാരാണ് പൊലിസില്‍ വിവരമറിയിച്ചത്.

ഉടന്‍തന്നെ വാളയാര്‍ പൊലിസ് സ്ഥലത്തെത്തി പ്രതിയെ പിടികൂടി. പരാതിക്കാരിയുടെ മൊഴിയുടെ അടിസ്ഥാനത്തില്‍ പ്രതിക്കെതിരെ ബലാത്സംഗശ്രമം, വീട്ടില്‍ അതിക്രമിച്ചു കയറി, സ്ത്രീത്വത്തെ അപമാനിക്കല്‍ തുടങ്ങിയ വകുപ്പുകള്‍ ചേര്‍ത്താണ് കേസ് എടുത്തിട്ടുള്ളത്.

പരപ്പനങ്ങാടിയിലെ റഹീന കൊലക്കേസ്: ഭർത്താവ് നജീബുദ്ദീന് വധശിക്ഷ വിധിച്ച് മഞ്ചേരി കോടതി

വാളയാര്‍ സഹോദരിമാരുടെ ദുരൂഹമരണ കേസില്‍ ജുവനൈല്‍ കോടതിയില്‍ വിചാരണ നേരിടുന്ന ആളാണ് അരുണ്‍ പ്രസാദ്. ഇയാള്‍ നേരത്തെ ജാമ്യത്തില്‍ ഇറങ്ങിയിരുന്നു. വാളയാര്‍ സംഭവം നടക്കുമ്പോള്‍ പ്രതിക്ക് പ്രായപൂര്‍ത്തി ആയിട്ടുണ്ടായിരുന്നില്ല. 

വാളയാര്‍ ഇന്‍സ്‌പെക്ടര്‍ എന്‍എസ് രാജീവിന്റെ നേതൃത്വത്തിലാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതി അരുണ്‍പ്രസാദിനെ റിമാന്‍ഡ് ചെയ്തു.

A man previously released on bail in the Walayar case has been re-arrested for allegedly attempting to rape a woman living alone.