ഗസ്സ: ഗസ്സാ മുനമ്പില്‍ ദുരിതാശ്വാസ കേന്ദ്രത്തില്‍ നിന്നും ഭക്ഷണം സ്വീകരിക്കാന്‍ പോയവര്‍ക്കു നേരെ ഇസ്‌റാഈല്‍ സൈന്യം നടത്തിയ ആക്രമണത്തില്‍ 25 മരണം. മാസങ്ങളായി ഭക്ഷണമടക്കമുള്ള അവശ്യവസ്തുക്കള്‍ തടഞ്ഞ് ഗസ്സയെ കുരുതിക്കളമാക്കുന്നതിനു പുറമേയാണ് ഇസ്‌റാഈലിന്റെ ക്രൂരത. ആക്രമണത്തില്‍ നിരവധി പേര്‍ക്ക് പരുക്കേറ്റതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. 

'ഹമാസ് ഉടന്‍ വെടിനിര്‍ത്തണം, ഇല്ലെങ്കില്‍...'; ഭീഷണിയുമായി ഇസ്‌റാഈല്‍; വ്യവസ്ഥകള്‍ പഠിക്കട്ടെയെന്ന് ഹമാസ് | Gaza Ceasefire Talk

ഇസ്‌റാഈല്‍ പിന്തുണയുള്ള ഫൗണ്ടേഷന്‍ നടത്തുന്ന ഒരു സഹായ കേന്ദ്രത്തില്‍ നിന്ന് ഒരു കിലോമീറ്റര്‍ അകലെവെച്ച് ജനക്കൂട്ടത്തിന് നേരെ ഇസ്‌റാഈല്‍ സൈന്യം വെടിയുതിര്‍ത്തതായി ദൃക്‌സാക്ഷികള്‍ പറഞ്ഞു. ഇസ്‌റാഈല്‍ ആക്രമണത്തില്‍ രണ്ട് സ്ത്രീകള്‍ ഉള്‍പ്പെടെ 25 പേരെങ്കിലും കൊല്ലപ്പെട്ടതായി ഗസ്സ ആരോഗ്യ മന്ത്രാലയത്തിന്റെ ഭാഗമായ റെക്കോര്‍ഡ്‌സ് വിഭാഗം തലവന്‍ സഹര്‍ അല്‍ വാഹിദി പറഞ്ഞു. 

മാനുഷിക സഹായ കേന്ദ്രത്തിനു നേര്‍ക്ക് നടത്തിയ വെടിവെപ്പിനെക്കുറിച്ച് അറിയില്ലെന്ന് ഇസ്‌റാഈല്‍ സൈന്യം പ്രതികരിച്ചു. പ്രഭാതത്തിന് മണിക്കൂറുകള്‍ക്ക് മുമ്പ് ആയിരക്കണക്കിന് ആളുകള്‍ മാനുഷിക സഹായ കേന്ദ്രത്തിനടുത്തേക്ക് എത്തിയിരുന്നു. മാനുഷിക സഹായ കേന്ദ്രത്തിനടുത്തു വെച്ച് ഇവരോട് പിരിഞ്ഞുപോകാന്‍ ഇസ്‌റാഈല്‍ സൈന്യം ആവശ്യപ്പെട്ടു. പിന്നീട് തിരിച്ചുവരാനും ആവശ്യപ്പെട്ടതായി ദൃക്‌സാക്ഷികള്‍ പറഞ്ഞു. 

പുലര്‍ച്ചെ 3 മണിയോടെ ജനക്കൂട്ടം ഒരു കിലോമീറ്റര്‍ അകലെയുള്ള ഫ്‌ലാഗ് റൗണ്ട്എബൗട്ടില്‍ എത്തിയപ്പോള്‍ ഇസ്‌റാഈല്‍ സൈന്യം ജനക്കൂട്ടത്തിനു നേരെ വെടിയുതിര്‍ക്കുകയായിരുന്നു.

'നാവിക യുദ്ധക്കപ്പലുകളില്‍ നിന്നും, ടാങ്കുകളില്‍ നിന്നും ഡ്രോണുകളില്‍ നിന്നും, എല്ലാ ദിശകളില്‍ നിന്നും വെടിവെയ്പ്പുണ്ടായി,' ജനക്കൂട്ടത്തിലുണ്ടായിരുന്ന അമര്‍ അബു തെയ്ബ പറഞ്ഞു.

വെടിയേറ്റ് ജീവന്‍ നഷ്ടപ്പെട്ട പത്തു പേരുടെ മൃതദേഹങ്ങള്‍ താന്‍ കണ്ടുവൈന്നും സ്ത്രീകള്‍ ഉള്‍പ്പെടെ നിരവധി പേര്‍ക്ക് പരുക്കേറ്റതായും അദ്ദേഹം പറഞ്ഞു. മരിച്ചവരെയും പരുക്കേറ്റവരെയും ഫീല്‍ഡ് ആശുപത്രിയിലേക്ക് കൊണ്ടുപോകാന്‍ ആളുകള്‍ വണ്ടികള്‍ ഉപയോഗിച്ചു. ആ രംഗം ഭയാനകമായിരുന്നു, അദ്ദേഹം പറഞ്ഞു. മറ്റൊരു ദൃക്‌സാക്ഷിയായ ഇബ്രാഹിം അബു സൗദും ഏതാണ്ട് സമാനമായ കാര്യമാണ് മാധ്യമങ്ങളോട് പറഞ്ഞത്. 

റഷ്യയില്‍ യുക്രൈന്റെ വമ്പന്‍ ഡ്രോണ്‍ ആക്രമണം; 40 വിമാനങ്ങള്‍ ആക്രമിച്ചെന്ന് അവകാശവാദം

വെടിയേറ്റ് പരുക്കേറ്റ നിരവധി പേരെ താന്‍ കണ്ടതായി അബൂ സൗദ് പറഞ്ഞു, അതില്‍ ഒരു യുവാവ് സംഭവസ്ഥലത്ത് വെച്ച് തന്നെ മരിച്ചുവെന്നും അദ്ദേഹം പറഞ്ഞു. 'ഞങ്ങള്‍ക്ക് അദ്ദേഹത്തെ സഹായിക്കാന്‍ കഴിഞ്ഞില്ല,' അബൂ സൗദ് പറഞ്ഞു.

വെടിവെപ്പില്‍ കുറഞ്ഞത് 21 പേര്‍ കൊല്ലപ്പെടുകയും 175 പേര്‍ക്ക് പരുക്കേല്‍ക്കുകയും ചെയ്തു എന്നാണ് റെഡ് ക്രോസ് നടത്തുന്ന സമീപത്തുള്ള ഒരു ഫീല്‍ഡ് ആശുപത്രിയിലെ ഉദ്യോഗസ്ഥര്‍ പറഞ്ഞത്. എന്നാല്‍ ആരാണ് അവര്‍ക്ക് നേരെ വെടിയുതിര്‍ത്തതെന്ന് അവര്‍ വെളിപ്പെടുത്തിയില്ല. മാധ്യമപ്രവര്‍ത്തകരോട് സംസാരിക്കാന്‍ അധികാരമില്ലാത്തതിനാല്‍, പേര് വെളിപ്പെടുത്തരുതെന്ന വ്യവസ്ഥയിലാണ് ഉദ്യോഗസ്ഥര്‍ മാധ്യമങ്ങളോട് സംസാരിച്ചത്.

At least 25 people were killed and dozens injured after Israeli forces reportedly attacked civilians heading to a relief distribution center in Gaza, escalating the humanitarian crisis.