കോഴിക്കോട്: കൊടുവള്ളിയിൽ യുവാവിനെ തട്ടിക്കൊണ്ടുപോയ കേസിൽ ഒരാളെ കൂടി പൊലിസ് അറസ്റ്റ് ചെയ്തു. കൃത്യത്തിൽ നേരിട്ടു പങ്കെടുത്ത കൊണ്ടോട്ടി സ്വദേശി മുഹമ്മദ് നിയാസ് (25) ആണ് പിടിയിലായത്. അന്നൂസ് റോഷൻ എന്ന യുവാവിനെയാണ് ഇയാൾ ഉൾപ്പെട്ട സംഘം തട്ടികൊണ്ടുപോയത്. ഇയാളെ ഏതാനും ദിവസങ്ങൾക്ക് മുൻപ് മോചിപ്പിച്ചിരുന്നു. കേരള- കർണാടക അതിർത്തിയിൽ വെച്ചാണ് മുഹമ്മദ് നിയാസ് പിടിയിലാകുന്നത്. 

കർണാടകയിൽനിന്ന് കോഴിക്കോട്ടേക്ക് വരുന്ന വഴിയാണ് കൊടുവള്ളി പൊലിസ് മുഹമ്മദ് നിയാസിനെ അറസ്റ്റ് ചെയ്തത്. തട്ടിക്കൊണ്ടുപോയ ദിവസം അന്നൂസ് റോഷൻ്റെ വീട്ടിൽ ബൈക്കിലെത്തിയ രണ്ടുപേരിലൊരാളാണ് അറസ്റ്റിലായ മുഹമ്മദ് നിയാസ്. ഏഴംഗ സംഘമാണ് വീട്ടിലെത്തി അന്നൂസിനെ തട്ടിക്കൊണ്ടു പോയത്. സംഭവത്തിൽ അഞ്ച് പേർ ഇതുവരെ അറസ്റ്റിലായിട്ടുണ്ട്. സംഘം തട്ടിക്കൊണ്ടുപോയ അന്നൂസിനെ മേയ് 22-ാം തീയതി കൊണ്ടോട്ടിയിൽ നിന്ന് കണ്ടെത്തി. 

അന്നൂസ് റോഷന്റെ സഹോദരൻ അജ്മൽ റോഷൻറെ സാമ്പത്തിക ഇടപാടുകളുമായി ബന്ധപ്പെട്ട തർക്കമാണ് തട്ടിക്കൊണ്ടു പോവലിനു കാരണമായതെന്നനാണ് നിഗമനം. തട്ടിക്കൊണ്ടുപോയ അന്നൂസിനെ ആദ്യം കൊണ്ടോട്ടിയിലെത്തിക്കുകയും പിന്നീട് രണ്ടാംദിവസം മൈസൂരുവിലെ ഒരു കെട്ടിടത്തിൽ തടങ്കലിലാക്കുകയുമായിരുന്നു. സംഘം മൈസൂരുവിലെത്തിയെന്ന് കണ്ടെത്തിയ പൊലിസ് പ്രതികൾക്കായി ലുക്ക് ഔട്ട് നോട്ടിസ് പുറപ്പെടുവിച്ചു. പിന്നാലെ പ്രത്യേക അന്വേഷണ സംഘത്തിലുൾപ്പെട്ട ഉദ്യോഗസ്ഥർ മൈസൂരുവിൽ നേരിട്ട് എത്തി. 

പൊലിസ് മൈസൂരിൽ എത്തിയത് മനസിലാക്കിയ പ്രതികൾ ടാക്സി കാറിൽ കേരളത്തിലേക്ക് വരികയായിരുന്നു. പൊലിസ് പിന്തുടരുന്നത് മനസ്സിലാക്കിയതോടെ ഈ വാഹനത്തിൽ നിന്ന് പാലക്കാട് വെച്ച് പ്രതികൾ രക്ഷപ്പെട്ടു. കൊണ്ടോട്ടിക്ക് സമീപം മോങ്ങത്തുവെച്ചാണ് പൊലിസ് ഈ വാഹനം കസ്റ്റഡിയിൽ എടുത്ത് യുവാവിനെ മോചിപ്പിച്ചത്. മൈസൂരിൽ നിന്ന് കൊണ്ടോട്ടിയിൽ എത്തിച്ച ടാക്‌സി കാറിന്റെ ഡ്രൈവറെ പൊലിസ് പിടികൂടിയിരുന്നു.