സിക്കിമിൽ ദിവസങ്ങളോളം തുടർച്ചയായി പെയ്ത മഴയെ തുടർന്നുണ്ടായ ദുരന്തത്തിൽ സൈനിക ക്യാമ്പ് തകർന്ന് മൂന്ന് സൈനികർ മരിച്ചു. ആറ് സൈനികരെ കാണാതായി. മറ്റ് നാല് പേരെ നിസാര പരിക്കുകളോടെ രക്ഷപ്പെടുത്തി. ഹവൽദാർ ലഖ്‌വീന്ദർ സിംഗ്, ലാൻസ് നായിക് മുനീഷ് താക്കൂർ, പോർട്ടർ അഭിഷേക് ലഖാഡ എന്നിവരാണ് മരിച്ച സൈനികർ. കാണാതായ സൈനികരെ കണ്ടെത്താനുള്ള ശ്രമങ്ങൾ രക്ഷാപ്രവർത്തകർ തുടരുകയാണ്.

കഴിഞ്ഞ ദിവസങ്ങളിലായി മേഖലയിൽ പെയ്ത തുടർച്ചയായ കനത്ത മഴയാണ് ഞായറാഴ്ച വൈകുന്നേരമുണ്ടായ ദുരന്തത്തിന് കാരണമായത്. പ്രദേശത്ത് കനത്ത മഴ തുടരുന്നതിനാൽ മണ്ണിടിച്ചിൽ സാധ്യതയുണ്ടെന്ന് അധികൃതർ മുന്നറിയിപ്പ് നൽകിയിട്ടുണ്ട്. ഒറ്റപ്പെട്ടുപോയവരുടെ സുരക്ഷ ഉറപ്പാക്കാനും കൂടുതൽ നാശനഷ്ടങ്ങൾ തടയാനും അടിയന്തര സംഘങ്ങൾ സജീവമായി പ്രവർത്തിക്കുന്നുണ്ട്.

കഠിനമായ അന്തരീക്ഷം വകവയ്ക്കാതെ പ്രത്യേക രക്ഷാപ്രവർത്തകർ രാപ്പകൽ ഇല്ലാതെ പ്രവർത്തിച്ചുകൊണ്ട്, കാണാതായ ആറ് പേരെ കണ്ടെത്താനുള്ള ശ്രമങ്ങൾ തുടരുകയാണ്. വെല്ലുവിളി നിറഞ്ഞ സാഹചര്യങ്ങളിലാണ് പ്രവർത്തനങ്ങൾ നടക്കുന്നത്, പക്ഷേ ഇപ്പോഴും കാണാതായവരെ കണ്ടെത്തുന്നതിൽ ഞങ്ങളുടെ ടീമുകൾ പ്രതിജ്ഞാബദ്ധരാണ് എന്ന് പ്രതിരോധ ഉദ്യോഗസ്ഥൻ പുറത്തിറക്കിയ പ്രസ്താവനയിൽ വ്യക്തമാക്കി. മരിച്ചവരുടെ കുടുംബങ്ങൾക്ക് സൈന്യം അഗാധമായ അനുശോചനം രേഖപ്പെടുത്തുകയും ആവശ്യമായ എല്ലാ പിന്തുണയും ഉറപ്പ് നൽകുകയും ചെയ്തതായി പ്രതിരോധ ഉദ്യോഗസ്ഥർ കൂട്ടിച്ചേർത്തു.

അതേസമയം, സിക്കിമിന്റെ പല ഭാഗങ്ങളിലും തുടർച്ചയായി പെയ്യുന്ന മഴ സാധാരണ ജീവിതത്തെ സാരമായി ബാധിച്ചിട്ടുണ്ട്. കൂടുതൽ മണ്ണിടിച്ചിലിനും തടസ്സങ്ങൾക്കും സാധ്യതയുണ്ടെന്നതിനാൽ വിവിധ പ്രദേശങ്ങളിൽ ആശങ്ക നിലനിൽക്കുകയാണ്. താമസക്കാരും യാത്രക്കാരും ജാഗ്രത പാലിക്കണമെന്നും അപകടസാധ്യതയുള്ള പ്രദേശങ്ങൾ ഒഴിവാക്കണമെന്നും അധികൃതർ അഭ്യർത്ഥിച്ചു.

In Sikkim, continuous rainfall over several days triggered a disaster that led to the collapse of an army camp, resulting in the deaths of three soldiers. Six other soldiers have been reported missing, while four were rescued with minor injuries.