ന്യൂഡല്‍ഹി: മത വികാരം വ്രണപ്പെടുത്തിയെന്ന കേസില്‍ ഇന്ത്യന്‍ ക്രിക്കറ്റ് ക്യാപ്റ്റന്‍ എം.എസ് ധോണിക്കെതിരായ ക്രിമിനല്‍ നടപടികള്‍ സുപ്രിം കോടതി റദ്ദാക്കി. മഹാവിഷ്ണുവിന്റെ രൂപത്തില്‍ ഒരു മാസികയുടെ കവര്‍ പേജില്‍ ധോണിയുടെ ചിത്രം വന്നതു മത വികാരത്തെ വ്രണപ്പെടുത്തി എന്നായിരുന്നു കേസ്. ജസ്റ്റിസ് രഞ്ജന്‍ ഗൊഗോയി അധ്യക്ഷനായ ഡിവിഷന്‍ ബെഞ്ചാണ് ധോണിക്ക് ആശ്വസം നല്‍കുന്ന വിധി പുറപ്പെടുവിച്ചത്.
2013 ഏപ്രിലില്‍ പ്രസിദ്ധീകരിച്ച ബിസിനസ് ടുഡേ മാസികയുടെ കവര്‍ പേജിലാണ് വിവാദം സൃഷ്ടിച്ച ചിത്രം അച്ചടിച്ചു വന്നത്. കൈയില്‍ ചെരുപ്പും പിടിച്ച് മഹാവിഷ്ണുവിന്റെ വേഷത്തില്‍ എത്തിയ ധോണിയുടെ ചിത്രം മത വികാരം വ്രണപ്പെടുത്തുന്നു എന്നാരോപിച്ച് സാമൂഹിക പ്രവര്‍ത്തകനായ ജയകുമാര്‍ ഹിരേമത്താണ് കോടതിയെ സമീപിച്ചത്. കേസില്‍ ധോണിക്കെതിരേ അനന്തപുര്‍ കോടതി ജാമ്യമില്ലാ വാറണ്ട് പുറപ്പെടുവിച്ചിരുന്നു.
നേരത്തെ കേസ് റദ്ദാക്കണമെന്നാവശ്യപ്പെട്ട് ധോണി കര്‍ണാടക ഹൈക്കോടതിയെ സമീപിച്ചെങ്കിലും അനുകൂല വിധി ലഭിച്ചിരുന്നില്ല. അതേസമയം 2014 സെപ്റ്റംബറില്‍ ധോണിക്കെതിരായ ക്രിമിനല്‍ നടപടികള്‍ സുപ്രിം കോടതി സ്റ്റേ ചെയ്തിരുന്നു.