നിലമ്പൂർ: നിലമ്പൂർ ഉപതെരഞ്ഞെടുപ്പിൽ സ്വതന്ത്ര സ്ഥാനാർത്ഥിയായി മത്സരിക്കുന്ന പി.വി. അൻവർ ജനങ്ങളിൽ നിന്ന് സാമ്പത്തിക സഹായം തേടി രംഗത്ത്. 'പിണറായിസത്തിനെതിരായ പോരാട്ടത്തിൽ എന്റെ എല്ലാം നഷ്ടമായി. ജനങ്ങളുടെ ഒരു രൂപ പോലും എനിക്ക് ധാർമിക പിന്തുണയാണ്,' അൻവർ ഫെയ്സ്ബുക്ക് കുറിപ്പിൽ വ്യക്തമാക്കി.

'നമ്മുടെ നാടിനെ നശിപ്പിക്കുന്ന ഭരണത്തിനെതിരെ ഞാൻ നടത്തിയ പോരാട്ടത്തിൽ അധികാരവും സമ്പാദ്യവും നഷ്ടമായി. എന്റെ ജീവൻ പോലും സുരക്ഷിതമല്ലെന്ന ബോധ്യത്തോടെയാണ് ഈ പോരാട്ടം. എന്റെ സാമ്പത്തിക പരിമിതി വലുതാണ്. കോടികളുടെ സ്വത്തുണ്ടെങ്കിലും ഒരു സെന്റ് ഭൂമി പോലും വിൽക്കാൻ കഴിയാത്ത അവസ്ഥയാണ്. തെരഞ്ഞെടുപ്പിനുള്ള ഒരു മുൻകരുതലും എന്റെ കൈവശമില്ല,' അൻവർ പറഞ്ഞു.

'നിലമ്പൂരിലെ വോട്ടർമാർ ഒരു രൂപയോ പത്ത് രൂപയോ എന്റെ അക്കൗണ്ടിലേക്ക് അയക്കണം. അത് മാനസികവും ധാർമികവുമായ പിന്തുണയാണ്. ഞാൻ ഉന്നയിച്ചത് സാധാരണക്കാരുടെ ശബ്ദമാണ്, അവർ ഭയന്ന് പുറത്തുപറയാത്ത കാര്യങ്ങളാണ്. അവരുടെ പിന്തുണയിൽ മാത്രമാണ് ഈ പോരാട്ടം മുന്നോട്ട് കൊണ്ടുപോകാനാകുന്നത്,' അൻവർ വീഡിയോ സന്ദേശത്തിൽ കൂട്ടിച്ചേർത്തു.

'എന്നെ ഒറ്റപ്പെടുത്തരുത്. ടി.പി. ചന്ദ്രശേഖരന്റെ ഗതി എനിക്ക് വരുത്താതിരിക്കാൻ ജനങ്ങൾക്കാണ് ഉത്തരവാദിത്തം. നിങ്ങളുടെ പിന്തുണയിൽ വിശ്വാസമർപ്പിച്ചാണ് ഞാൻ മുന്നോട്ടുപോകുന്നത്,' അൻവർ വ്യക്തമാക്കി.

നിങ്ങളുടെ ഒരു രൂപ, എന്റെ ധാർമിക കരുത്ത്' എന്ന സന്ദേശവുമായാണ് അൻവർ ജനങ്ങളോട് സഹകരണം അഭ്യർത്ഥിക്കുന്നത്.