പാലക്കാട്: മങ്കരയില്‍ ട്രെയിനിടിച്ചു മരിച്ച നിലയില്‍ പൊലിസുദ്യോഗസ്ഥനെ കണ്ടെത്തി. മുട്ടിക്കുളങ്ങര കെഎപി സെക്കന്‍ഡ്  ബറ്റാലിയന്‍ ക്യാംപിലെ സിവില്‍ പൊലിസ് ഓഫിസറായ കെആര്‍ അഭിജിത്ത് ആണ് മരിച്ചത്. ഇന്നലെ വൈകിട്ടാണ് ഇയാളെ മരിച്ച നിലയില്‍ കണ്ടെത്തുന്നത്. പാലക്കാട് മങ്കര റെയില്‍വേ സ്റ്റേഷനടുത്താണ് അപകടം നടന്നത്.

തൃശൂര്‍ വിയൂര്‍ സ്വദേശിയാണ് മരിച്ച അഭിജിത്ത്. മൃതദേഹം പാലക്കാട് ജില്ലാ ആശുപത്രിയില്‍ മോര്‍ച്ചറിയില്‍ സൂക്ഷിച്ചിരിക്കുകയാണ്. തുടര്‍നടപടികള്‍ക്കു ശേഷം മൃതദേഹം ബന്ധുക്കള്‍ക്കു വിട്ടുനല്‍കുമെന്ന് പൊലിസ്. ഇക്കഴിഞ്ഞ രണ്ടാം തിയതിയാണ് അഭിജിത്ത് പരിശീലനത്തില്‍ പ്രവേശിച്ചത്.

കഴിഞ്ഞ ദിവസം വീട്ടില്‍ പോയിരുന്നു. ശേഷം മടങ്ങിയെത്തിയ അഭിജിത്ത് റെയില്‍വേസ്‌റ്റേഷനില്‍ കുറേ സമയം ഇരുന്നിരുന്നു. പിന്നീട് രാത്രി എട്ടരയോടെയാണ് മംഗലാപുരം- തിരുവനന്തപുരം എക്‌സ്പ്രസിനു മുന്നില്‍ ചാടി ജീവനൊടുക്കിയത്. എന്തിനാണ് ഇങ്ങനെ ചെയ്തതെന്ന് വ്യക്തമല്ല. സംഭവത്തില്‍ പൊലിസ് അന്വേഷണം ആരംഭിച്ചു.