ഇംഗ്ലണ്ടിനെതിരായ അഞ്ച് ടെസ്റ്റ് മത്സരങ്ങളുടെ പരമ്പരക്കായുള്ള തയ്യാറെടുപ്പിലാണ് ഇന്ത്യൻ ക്രിക്കറ്റ് ടീം. ജൂൺ 20 മുതലാണ് പരമ്പരയ്ക്ക് തുടക്കം കുറിക്കുന്നത്. ഇപ്പോൾ  ഈ പരമ്പരക്ക് മുന്നോടിയായി ഇന്ത്യൻ സ്പിന്നർ കുൽദീപ് യാദവിനെ പ്രശംസിച്ചുകൊണ്ട് സംസാരിച്ചിരിക്കുകയാണ് മുൻ ഓസ്ട്രേലിയൻ താരം മൈക്കൽ ക്ലർക്ക്. കുൽദീപ് യാദവ്‌ ഇന്ത്യയുടെ എക്സ് ഫാക്ടർ ആണെന്നാണ് ക്ലർക്ക് പറഞ്ഞത്. 

"കുൽദീപ് യാദവിനെ കാണുന്നത് എനിക്ക് വളരെ ഇഷ്ടമാണ്. ഇന്ത്യയുടെ ആദ്യ സ്പിന്നർ ആവാനുള്ള അവകാശം അദ്ദേഹം നേടിക്കഴിഞ്ഞിട്ടുണ്ട്. കുൽദീപ് ഒരു മാച്ച് വിന്നറും എക്സ് ഫാക്ടറും ആണ്. അവൻ ഇന്ത്യൻ ടീമിലെ ഏറ്റവും വലിയ കളിക്കാരനാണ്. കുൽദീപ് വളരെ ആത്മവിശ്വാസത്തോടെയും മികച്ച രീതിയിലുമാണ് പന്തെറിയുന്നത്. വലിയ മത്സരങ്ങളിലാണ് അദ്ദേഹം കളിക്കാൻ ആഗ്രഹിക്കുന്നത്. മറ്റാർക്കും ഒന്നും ചെയ്യാൻ സാധിക്കാത്തപ്പോൾ ഇന്ത്യയ്ക്കായി ഒരു വിക്കറ്റ് നേടാൻ കഴിയുമെന്ന് കുൽദീപ് വിശ്വസിക്കുന്നു. ഇംഗ്ലണ്ടിനെതിരെ കളിക്കുമ്പോൾ ഇന്ത്യയ്ക്ക് അത്തരം കളിക്കാരെയാണ് ആവശ്യം" മൈക്കൽ ക്ലർക്ക് റേവ് പോർട്ടിന് നൽകിയ അഭിമുഖത്തിൽ പറഞ്ഞു.

രോഹിത് ശർമയുടെ വിരമിക്കലിന് ശേഷം ശുഭ്മൻ ഗില്ലിനെയാണ് ഇന്ത്യയുടെ ടെസ്റ്റ് ടീമിന്റെ പുതിയ നായകനായി തെരഞ്ഞെടുത്തത്. ടീമിന്റെ വൈസ് ക്യാപ്റ്റനായി വിക്കറ്റ് കീപ്പർ ബാറ്റർ റിഷബ് പന്തും തെരഞ്ഞെടുക്കപ്പെട്ടു. ടീമിൽ ഇടംകയ്യൻ പേസർ അർഷദീപ് സിങ് ഇടം നേടി. താരം ഇതാദ്യമായാണ് ടെസ്റ്റ് ടീമിൽ ഇടം നേടുന്നത്. ലയാളി താരം കരുൺ നായരും ഗുജറാത്ത് ടൈറ്റൻസ് ഓപ്പണർ സായ് സുദർശനും ഇടം പിടിച്ചു. നീണ്ട വർഷക്കാലങ്ങൾക്ക് ശേഷമാണ് കരുൺ നായർ ഇന്ത്യൻ ടീമിൽ ഇടം നേടുന്നത്. 

ഇംഗ്ലണ്ട് പര്യടനത്തിനുള്ള ഇന്ത്യൻ ടെസ്റ്റ് സ്‌ക്വാഡ്

ശുഭ്മാൻ ഗിൽ (ക്യാപ്റ്റൻ), ഋഷഭ് പന്ത് (വൈസ് ക്യാപ്റ്റൻ/വിക്കറ്റ് കീപ്പർ), യശസ്വി ജയ്സ്വാൾ, കെഎൽ രാഹുൽ, സായ് സുദർശൻ, അഭിമന്യു ഈശ്വരൻ, കരുൺ നായർ, നിതീഷ് കുമാർ റെഡ്ഡി, രവീന്ദ്ര ജഡേജ, ധ്രുവ് ജുറെൽ, വാഷിംഗ്ടൺ സുന്ദർ, ശാർദുൽ താക്കൂർ, പ്രസിദ് കൃഷ്ണ, ആകാശ് ദീപ്, ജസ്പ്രീത് ബുംറ, മുഹമ്മദ് സിറാജ്, കുൽദീപ് യാദവ്.

Former Australian cricketer Michael Clarke has spoken out in praise of Indian spinner Kuldeep Yadav