തെഹ്‌റാൻ: ഇറാനിയൻ സ്റ്റേറ്റ് ടെലിവിഷന് നേരെ കഴിഞ്ഞ ദിവസം ഇസ്റാഈൽ നടത്തിയ മിസൈൽ ആക്രമണം, അവതാരക സഹർ ഇമാമിയെ, ആദ്യം ഭയപ്പെടുത്തിയെങ്കിലും അല്പ സമയത്തിനുള്ളിൽ തെഹ്‌റാനിലെ സ്റ്റുഡിയോയിൽ നിന്ന് തന്നെ സഹർ ഇമാമി ധീരമായി സംപ്രേക്ഷണം തുടർന്നതിന് സോഷ്യൽ മീഡിയയിൽ വ്യാപകമായി പ്രശംസിക്കപ്പെട്ടു.

മിഡിൽ ഈസ്റ്റിൽ സംഘർഷം രൂക്ഷമായതിനിടെ, ഇറാൻ ടിവി സ്റ്റുഡിയോ കോമ്പൗണ്ടിൽ മിസൈൽ പതിച്ചതിന്റെ ഞെട്ടിക്കുന്ന ദൃശ്യങ്ങൾ പുറത്തുവന്നിരുന്നു. ആക്രമണത്തിന്റെ ആഘാതത്തിനിടയിലും സഹർ ഇമാമി തന്റെ തത്സമയ പ്രക്ഷേപണം വീണ്ടും ആരംഭിച്ചു, ധൈര്യത്തിന്റെ പ്രതീകമായി മാറി. കഴിഞ്ഞ തിങ്കളാഴ്ച വൈകുന്നേരമാണ് വാർത്താ ബുള്ളറ്റിൻ അവതരിപ്പിക്കുന്നതിനിടെ, ഇറാനിയൻ ടിവി സ്റ്റുഡിയോയിൽ മിസൈൽ ആക്രമണം നടന്നത്. സ്റ്റുഡിയോ കുലുങ്ങിയപ്പോൾ സഹർ ഇമാമിക്ക് താൽക്കാലികമായി പുറത്തേക്ക് മാറേണ്ടിവന്നു. എന്നാൽ, അപകടകരമായ സാഹചര്യം വകവയ്ക്കാതെ അവർ ഉടൻ തിരിച്ചെത്തി വാർത്താ അവതരണം പുനരാരംഭിച്ചു.സ്റ്റുഡിയോയിൽ പുക നിറയുന്നതിന് തൊട്ടുമുമ്പ്, ഇസ്റാഈലിനെതിരെ വിരൽ ചൂണ്ടി അവർ നടത്തിയ ആംഗ്യം സോഷ്യൽ മീഡിയയിൽ വൈറലായി. ഈ ധീരമായ നീക്കം ഇറാനിയൻ ജനതയുടെ പ്രതിരോധ മനോഭാവത്തിന്റെ പ്രതീകമായി മാറി.

ഭരണകൂട പിന്തുണക്കാരുടെ സോഷ്യൽ മീഡിയ പോസ്റ്റുകളിൽ സഹർ ഇമാമിയുടെ ധൈര്യവും ആത്മവിശ്വാസവും വളരെയേറെ പ്രശംസിക്കപ്പെട്ടു. ഇറാനിയൻ സ്ത്രീകളുടെ ധൈര്യത്തിന്റെ മുഖമാണ് അവർ," എന്ന് ഒരു പോസ്റ്റിൽ പറയുന്നു. സുപ്രീം നേതാവ് ആയത്തുള്ള അലി ഖമേനി, മുൻ ഹിസ്ബുള്ള മേധാവി ഹസ്സൻ നസ്രല്ല എന്നിവർക്കൊപ്പമുള്ള അവരുടെ ചിത്രങ്ങൾ ഓൺലൈനിൽ വ്യാപകമായി പ്രചരിച്ചു. "കൊല്ലുന്നതിലൂടെ ഒരു ആശയത്തെയും നശിപ്പിക്കാനാകില്ല," എന്ന മറ്റൊരു പോസ്റ്റിന്റെ അടിക്കുറിപ്പും ശ്രദ്ധേയമായി. ഇറാന്റെ വനിതാ കുടുംബകാര്യ വൈസ് പ്രസിഡന്റ് സഹ്‌റ ബെഹ്‌റാംസാദെ അസർ, ഇമാമിയെ "ഇറാനിയൻ ജനതയുടെ ശബ്ദം" എന്ന് വിശേഷിപ്പിച്ച് പ്രശംസിച്ചു. "ആക്രമണത്തെ അഭിമുഖീകരിക്കുമ്പോൾ അവർ എല്ലാ ഇറാനിയൻ പൗരന്മാരുടെയും പ്രതിനിധിയായി, അവർ പറഞ്ഞു.

ആരാണ് സഹർ ഇമാമി?

ഇറാനിലെ ഏറ്റവും പ്രശസ്തയായ വാർത്താ അവതാരകരിൽ ഒരാളാണ് സഹർ ഇമാമി. ഫുഡ് എഞ്ചിനീയറിംഗിൽ ബിരുദം നേടിയ അവർ, 2010-ൽ മാധ്യമരംഗത്തേക്ക് കടന്നുവന്നു. ഇറാന്റെ ഔദ്യോഗിക വാർത്താ ചാനലിൽ അവതാരകയായി പ്രവർത്തിച്ചതിലൂടെ അവർ ദേശീയ ശ്രദ്ധ നേടി. വിവാഹിതയായ അവർക്ക് ഒരു കുട്ടിയുണ്ട്. അറബി ഭാഷാ മാധ്യമങ്ങൾ അവരുടെ "ശാന്തമായ പെരുമാറ്റവും ആത്മവിശ്വാസവും" പ്രകീർത്തിച്ചു. ലാളിത്യവും മേക്കപ്പ് ഒഴിവാക്കിക്കൊണ്ടുള്ള അവതരണവും അവരുടെ കവറേജിന്റെ പ്രത്യേകതയായി മാധ്യമങ്ങൾ എടുത്തുപറഞ്ഞു.

ആക്രമണത്തിനെതിരെ പ്രതിഷേധം

ഇറാനിയൻ സ്റ്റേറ്റ് ടെലിവിഷൻ ആസ്ഥാനത്തിന് നേരെയുണ്ടായ ആക്രമണം ഓൺലൈനിൽ വ്യാപകമായ അപലപനത്തിന് കാരണമായി. ഹിസ്ബുള്ള ഇതിനെ "സയണിസ്റ്റ് കുറ്റകൃത്യം" എന്നും "ഇറാന്റെ പ്രക്ഷേപണ കേന്ദ്രത്തെ ലക്ഷ്യം വച്ചുള്ള ഹീനമായ ആക്രമണം" എന്നും വിശേഷിപ്പിച്ചു. "എതിർപ്പിനെ അടിച്ചമർത്താനും സത്യം മായ്ച്ചുകളയാനും ഇറാനിയൻ ജനതയുടെ വിപ്ലവം അവസാനിപ്പിക്കാനും" ലക്ഷ്യമിട്ടുള്ള വ്യവസ്ഥാപിത ഭീകരത എന്നാണ് അവർ ഇതിനെ വിശേഷിപ്പിച്ചത്. തെഹ്‌റാനിലെ സ്റ്റേറ്റ് മീഡിയ ആസ്ഥാനത്ത് സയണിസ്റ്റ് സംഘടന ക്രൂരമായി ബോംബെറിഞ്ഞു. വാർത്താ ചാനലിനെ ലക്ഷ്യമിട്ട് ശത്രുക്കൾ ഇറാനിയൻ ജനതയുടെ ശബ്ദത്തെ നിശബ്ദമാക്കാൻ ശ്രമിക്കുന്നു," ഇറാനിയൻ പ്രക്ഷേപകന്റെ പ്രസ്താവനയിൽ പറയുന്നു.

ഇസ്റാഈലി മാധ്യമങ്ങളിൽ ഇറാന്റെ ദേശീയ മാധ്യമങ്ങൾ ചെലുത്തുന്ന സ്വാധീനമാണ് ഈ ആക്രമണം പ്രതിഫലിപ്പിക്കുന്നത്. എന്നാൽ, ഇറാന്റെ പത്ര പ്രവർത്തകരുടെ ദൃഢനിശ്ചയത്തെ ഈ ആക്രമണം തകർത്തിട്ടില്ല, തകർക്കുകയുമില്ല, ഇറാന്റെ പ്രക്ഷേപണ അതോറിറ്റി തലവൻ വ്യക്തമാക്കി.