ഗസ്സ സിറ്റി: വെള്ളിയാഴ്ച ഗസ്സയിലുടനീളം ഇസ്‌റാഈൽ സൈന്യം നടത്തിയ വെടിവയ്പ്പിൽ കുറഞ്ഞത് 82 ഫലസ്തീനികൾ കൊല്ലപ്പെട്ടതായി റിപ്പോർട്ട്. ദെയ്ർ എൽ-ബലാഹിന് പടിഞ്ഞാറുള്ള ഒരു വീട്ടിൽ ഫൈറ്റർ ജെറ്റുകളിൽ നിന്നുള്ള ബോംബാക്രണത്തിൽ നിരവധി പേർ കൊല്ലപ്പെട്ടതോടെയാണ് മരണസംഖ്യ ഉയർന്നത്. മധ്യ, തെക്കൻ ഗസ്സ മുനമ്പിൽ മാനുഷിക സഹായത്തിനായി കാത്തിരിക്കുകയായിരുന്നവർ ഉൾപ്പെടെ 34 ഫലസ്തീനികളെയാണ് ഇന്നലെ മാത്രം കൊന്നുകളഞ്ഞത്. ഇസ്‌റാഈലിന്റെ വെടിവയ്പ്പിൽ നിരവധി പേർക്ക് പരുക്കേൽക്കുകയും ചെയ്തതായി ആശുപത്രി വൃത്തങ്ങൾ അറിയിച്ചു.

മധ്യ ഗസ്സയിൽ 37 പേരെങ്കിലും കൊല്ലപ്പെട്ടു. ഇതിൽ 23 പേർ ഗസ്സ ഹ്യുമാനിറ്റേറിയൻ ഫൗണ്ടേഷൻ വിതരണം ചെയ്യുന്ന ഭക്ഷണവും വെള്ളവും ഉൾപ്പെടെയുള്ള സഹായം സ്വീകരിക്കാൻ വേണ്ടി എത്തിയവരാണ്. ഗസ്സ സിറ്റിയിൽ 23 പേർ കൂടി കൊല്ലപ്പെട്ടപ്പോൾ, തെക്കൻ ഗസ്സയിൽ 22 പേർ കൊല്ലപ്പെട്ടു. ഇവരിൽ 11 പേർ സഹായം തേടി എത്തിയവരാണ് - ആശുപത്രി വൃത്തങ്ങൾ അറിയിച്ചു.

മെയ് 27 ന് ഗസ്സ ഹ്യുമാനിറ്റേറിയൻ ഫൗണ്ടേഷൻ (ജി.എച്ച്.എഫ്) സഹായ വിതരണം ആരംഭിച്ചതിനുശേഷം, സഹായ കേന്ദ്രങ്ങൾക്ക് സമീപം എത്തുന്ന പട്ടിണിയിലായ ഫലസ്തീനികൾക്കെതിരായ ഇസ്‌റാഈലി ആക്രമണങ്ങളിൽ നൂറുകണക്കിന് ആളുകൾ കൊല്ലപ്പെട്ടു. മാർച്ച് ആദ്യം മുതൽ മെയ് അവസാനം വരെ ഇസ്‌റാഈൽ സമ്പൂർണ ഉപരോധം ഏർപ്പെടുത്തിയതിനെത്തുടർന്ന് ഗസ്സയിലെ മുഴുവൻ ജനങ്ങളും ക്ഷാമ ഭീഷണി നേരിടുന്നുണ്ടെന്ന് സഹായ ഏജൻസികൾ മുന്നറിയിപ്പ് നൽകിയിട്ടുണ്ട്. അന്താരാഷ്ട്ര സമ്മർദ്ദത്തെ തുടർന്ന് ഇസ്‌റാഈൽ സഹായ സാമഗ്രികൾ വിതരണം ചെയ്യാൻ ചുമതലപ്പെടുത്തിയ ജി.എച്ച്.എഫിനെതിരെ പരാതികൾ വ്യാപകമാണ്. ഇസ്‌റാഈലിന്റെയും അമേരിക്കയുടെയും പിന്തുണയുള്ള ഈ സംഘത്തെ വിമർശിച്ച് ഐക്യരാഷ്ട്രസഭയും രംഗത്ത് വന്നിരുന്നു.

അതേസമയം, സഹായത്തിനായി എത്തി കൊല്ലപ്പെട്ടവരുടെ എണ്ണം 409 ആയി ഉയർന്നുവെന്നും 3,203 പേർക്ക് പരുക്കേറ്റെന്നും ഗസ്സയിലെ ഗവൺമെന്റ് മീഡിയ ഓഫീസ് ഡയറക്ടർ ജനറൽ ഇസ്മായിൽ അൽ-തവാബ്ത പറഞ്ഞു. ഗസ്സ മുനമ്പിലെ ജലവിതരണ സംവിധാനങ്ങൾ തകർന്നതോടെ പ്രദേശം മനുഷ്യനിർമ്മിത വരൾച്ച നേരിടുകയാണെന്ന് യുണിസെഫ് മുന്നറിയിപ്പ് നൽകി.

"ദാഹം കൊണ്ട് കുട്ടികൾ മരിക്കാൻ തുടങ്ങും" യൂണിസെഫ് വക്താവ് ജെയിംസ് എൽഡർ വെള്ളിയാഴ്ച ജനീവയിൽ മാധ്യമപ്രവർത്തകരോട് പറഞ്ഞു. കുടിവെള്ള ഉൽപാദന സൗകര്യങ്ങളിൽ 40 ശതമാനം മാത്രമേ പ്രവർത്തിക്കുന്നുള്ളൂ എന്നും അദ്ദേഹം വ്യക്തമാക്കി.