ലീഡ്‌സ്: ഇന്ത്യ-ഇംഗ്ലണ്ട് ഒന്നാം ടെസ്റ്റ് മത്സരം മൂന്നാം ദിവസത്തിലേക്ക് കടന്നിരിക്കുകയാണ്. ഒന്നാം ഇന്നിങ്സിൽ ഇംഗ്ലണ്ട് ബാറ്റിങ് തുടർന്നുകൊണ്ടിരിക്കുകയാണ്. മൂന്നാം ദിനത്തിൽ വിക്കറ്റ് കീപ്പർ എന്ന നിലയിൽ ഒരു തകർപ്പൻ നേട്ടമാണ് റിഷബ് പന്ത് കൈവരിച്ചത്. ടെസ്റ്റ് ക്രിക്കറ്റിൽ 150 ക്യാച്ചുകൾ സ്വന്തമാക്കാനാണ് പന്തിന് സാധിച്ചിരിക്കുന്നത്.

ഒല്ലി പോപ്പ്, ക്യാപ്റ്റൻ ബെൻ സ്റ്റോക്സ് എന്നിവരെയാണ് പന്ത് ക്യാച്ചിലൂടെ മടക്കി അയച്ചത്. ടെസ്റ്റ് ക്രിക്കറ്റിൽ ഇന്ത്യയ്ക്കുവേണ്ടി ഏറ്റവും കൂടുതൽ ക്യാച്ചുകൾ നേടുന്ന മൂന്നാമത്തെ വിക്കറ്റ് കീപ്പർ കൂടിയാണ് പന്ത്. 256 ക്യാച്ചുകൾ നേടിയ എംഎസ് ധോണിയാണ് ഈ പട്ടികയിൽ ഒന്നാം സ്ഥാനത്ത് ഉള്ളത്. സെയ്‌ദ് കിർമാണിയാണ് രണ്ടാം സ്ഥാനത്തുള്ളത്. 160 ക്യാച്ചുകളാണ് താരം സ്വന്തമാക്കിയിരുന്നത്. 

ഇംഗ്ലണ്ടിനുവേണ്ടി ഒന്നാം ഇന്നിങ്സിൽ ഒല്ലി പോപ്പ് സെഞ്ച്വറി നേടി മികച്ച പ്രകടനമാണ് പുറത്തെടുത്തത്. 137 പന്തിൽ 106 റൺസാണ് താരം നേടിയത്. 14 ഫോറുകൾ അടങ്ങുന്നതായിരുന്നു ഒല്ലി പോപ്പിന്റെ ഇന്നിങ്സ്.

ഒന്നാം ഇന്നിങ്സിൽ 471 റൺസിനാണ് ഇന്ത്യ പുറത്തായത്. മൂന്ന് താരങ്ങളുടെ സെഞ്ച്വറി കരുത്തിലാണ് ഇന്ത്യ കൂറ്റൻ ടോട്ടൽ ഇംഗ്ലണ്ടിന് നേരെ ഉയർത്തിയത്. ക്യാപ്റ്റൻ ശുഭ്മൻ ഗിൽ, റിഷബ് പന്ത്, യശ്വസി ജെയ്‌സ്വാൾ എന്നിവരാണ് സെഞ്ച്വറി നേടിയത്. 178 പന്തിൽ 134 റൺസ് നേടിയാണ് പന്ത് തിളങ്ങിയത്. 12 ഫോറുകളും ആറ് കൂറ്റൻ സിക്സുകളും അടങ്ങുന്നതായിരുന്നു പന്തിന്റെ ഇന്നിംഗ്സ്. 

ഗിൽ 227 പന്തിൽ 19 ഫോറുകളും ഒരു സിക്സും ഉൾപ്പെടെ 147 റൺസും നേടി. യശ്വസി ജെയ്‌സ്വാൾ 158 പന്തിൽ 101 റൺസും നേടി. 16 ഫോറുകളും ഒരു സിക്സും അടങ്ങുന്നതായിരുന്നു താരത്തിന്റെ തകർപ്പൻ ഇന്നിങ്‌സ്. ടെസ്റ്റ് ക്രിക്കറ്റിൽ അരങ്ങേറ്റം കുറിച്ച് യുവതാരം സായ് സുദർശനും നീണ്ട എട്ടു വർഷത്തിനുശേഷം ഇന്ത്യൻ ടീമിലേക്ക് തിരിച്ചെത്തിയ മലയാളി താരം കരുൺ നായരും ഇന്ത്യൻ ബാറ്റിങ്ങിൽ നിരാശപ്പെടുത്തി. ഇരുവരും പൂജ്യം റൺസിനാണ് മടങ്ങിയത്.

ഇംഗ്ലണ്ട് ബൗളിങ്ങിൽ ക്യാപ്റ്റൻ ബെൻ സ്റ്റോക്സ്, ജോഷ് ടോങ്യു എന്നിവർ നാല് വീതം വിക്കറ്റുകൾ വീഴ്ത്തി മികച്ച പ്രകടനമാണ് കാഴ്ചവെച്ചത്. ബ്രൈയ്ഡൻ കാർസ്, ഷോയിബ് ബഷീർ എന്നിവർ ഓരോ വിക്കറ്റും സ്വന്തമാക്കി.

Rshabh Pant create a new record in Test Crcket