ദുബൈ: പുതുവത്സരാഘോഷങ്ങള്‍, അവധിദിനങ്ങള്‍, പ്രധാന പരിപാടികള്‍ എന്നിവയോടനുബന്ധിച്ച് യാത്രക്കാര്‍ വര്‍ധിച്ചുവരുന്ന സാഹചര്യത്തില്‍ ബുര്‍ജ് ഖലീഫ-ദുബൈ മാള്‍ മെട്രോ സ്റ്റേഷന്‍ വികസിപ്പിക്കുമെന്ന് ദുബൈ റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ടിഎ) അറിയിച്ചു. എമാര്‍ പ്രോപ്പര്‍ട്ടീസുമായി സഹകരിച്ചാകും ആര്‍ടിഎ പദ്ധതി നടപ്പാക്കുക.

ALSO READ: 'ദൈവം എന്റെ പിതാവിനോട് കരുണ കാണിക്കട്ടെ'; പിതാവ് ഷെയ്ഖ് റാഷിദിനെക്കുറിച്ച് വികാരനിര്‍ഭരമായ കുറിപ്പുമായി ദുബൈ ഭരണാധികാരി

സ്റ്റേഷന്റെ വിസ്തീര്‍ണ്ണം 6,700 ചതുരശ്ര മീറ്ററില്‍നിന്ന് 8,500 ചതുരശ്ര മീറ്ററായി വര്‍ധിപ്പിക്കും. മണിക്കൂറില്‍ 7,250 യാത്രക്കാരെ ഉള്‍ക്കൊള്ളാനുള്ള ശേഷി 12,320 ആയി ഉയര്‍ത്തും. യാത്രക്കാരെ ഉള്‍ക്കൊള്ളാനുള്ള ശേഷി 65 ശതമാനം വര്‍ധിപ്പിക്കും. പദ്ധതി പൂര്‍ത്തിയാകുന്നതോടെ പ്രതിദിനം 220,000 യാത്രക്കാര്‍ക്ക് സ്‌റ്റേഷന്‍ വഴി യാത്ര ചെയ്യാനാകും.

കഴിഞ്ഞ അഞ്ച് വര്‍ഷത്തിനിടെ, സ്റ്റേഷനിലെ വാര്‍ഷിക ശരാശരി യാത്രക്കാരുടെ എണ്ണത്തില്‍ 7.5 ശതമാനം വളര്‍ച്ച രേഖപ്പെടുത്തിയിരുന്നു. ഇക്കഴിഞ്ഞ പുതുവത്സരാഘോഷ വേളയില്‍ മാത്രം 110,000ലധികം യാത്രക്കാരാണ് സ്റ്റേഷന്‍ ഉപയോഗിച്ചത്. യാത്രക്കാരുടെ എണ്ണത്തില്‍ തുടര്‍ച്ചയായ വര്‍ധനവ് പ്രതീക്ഷിക്കുന്നതിനാല്‍, വിപുലീകരണം അനിവാര്യമാണെന്ന് ആര്‍ടിഎ വ്യക്തമാക്കി.

ALSO READ: ദുബൈയില്‍ നിന്നുള്ള വിമാനങ്ങള്‍ ഉള്‍പ്പെടെ നിരവധി ആഭ്യന്തര, വിദേശ സര്‍വിസുകള്‍ റദ്ദാക്കി എയര്‍ ഇന്ത്യ; ബുക്കിങ് കുത്തനെ ഇടിഞ്ഞു

'ബുര്‍ജ് ഖലീഫ, ദുബൈ മാള്‍, ഡൗണ്‍ടൗണ്‍ ദുബൈ എന്നിവയ്ക്ക് സമീപമുള്ള തന്ത്രപ്രധാന സ്ഥാനം ഈ സ്റ്റേഷനെ ദുബൈ മെട്രോ ശൃംഖലയിലെ ഏറ്റവും പ്രധാനപ്പെട്ട ഒന്നാക്കി മാറ്റുന്നു. ആഘോഷങ്ങളിലും ദേശീയ പരിപാടികളിലും ഇവിടേക്ക് എത്തുന്ന താമസക്കാര്‍ക്കും സന്ദര്‍ശകര്‍ക്കും ഈ സ്റ്റേഷന്‍ സൗകര്യപ്രദമാണ്,' ആര്‍ടിഎ ഡയറക്ടര്‍ ജനറലും എക്‌സിക്യൂട്ടീവ് ഡയറക്ടര്‍ ബോര്‍ഡ് ചെയര്‍മാനുമായ മതാര്‍ അല്‍ തായര്‍ പറഞ്ഞു.

Dubai’s RTA announces plans to expand the Burj Khalifa–Dubai Mall Metro Station to improve passenger flow and enhance connectivity.