ന്യൂഡൽഹി: ദീർഘദൂര ട്രെയിനുകളിലെ വെയ്റ്റിങ് ലിസ്റ്റ് ടിക്കറ്റുകളുടെ എണ്ണം പരിമിതപ്പെടുത്തി റെയിൽവേ ബോർഡ്. കഴിഞ്ഞദിവസം പ്രാബല്യത്തിൽ വന്ന പുതിയ നിയമം അനുസരിച്ച് സ്ലീപ്പർ, തേഡ്, സെക്കൻഡ്, ഫസ്റ്റ് എ.സികൾ എന്നീ ഓരോ ക്ലാസ് കോച്ചിനും വെയിറ്റിങ് ലിസ്റ്റ് ക്വോട്ട 25 ശതമാനമായിട്ടാണ് പരിമിതപ്പെടുത്തിയത്. 

ബെർത്ത് കിട്ടുമെന്ന പ്രതീക്ഷയിൽ വെയിറ്റിങ് ലിസ്റ്റ് ടിക്കറ്റുള്ളവരും ട്രെയിനിൽ കയറുന്നത് പലപ്പോഴും തിക്കും തിരക്കുമുണ്ടാകാനും സംഘർഷത്തിനും വഴിവയ്ക്കാറുണ്ട്. ഇതൊഴിവാക്കാനാണ് പുതിയ മാനദണ്ഡം ഏർപ്പെടുത്തിയത്. മൊത്തം സീറ്റിന്റെ 25 ശതമാനം ടിക്കറ്റായിരിക്കും ഇനിമുതൽ വെയിറ്റിങ് ലിസ്റ്റ് ടിക്കറ്റായി നൽകുക. ഭിന്നശേഷിക്കാർ, സൈനികർ ഉൾപ്പെടെ പ്രത്യേക ഇളവുള്ള ക്വാട്ടകൾക്ക് ഈ നിയന്ത്രണം ബാധകമാവില്ല. നിയന്ത്രണം ഏർപ്പെടുത്തിയിട്ടുള്ള വിഭാഗങ്ങളിൽ നിശ്ചിത പരിധി കഴിഞ്ഞ് ടിക്കറ്റ് എടുക്കാനും സാധിക്കില്ല. പുതിയ ടിക്കറ്റ് ബുക്കിങ് രീതി ഈ ആഴ്ച മുതൽ നടപ്പാക്കി തുടങ്ങി.