ഇംഗ്ലണ്ടിനെതിരായ അഞ്ച് ടെസ്റ്റ് മത്സരങ്ങളുടെ പരമ്പരയിലെ ആദ്യ മത്സരത്തിൽ നടത്തിയ തകർപ്പൻ പ്രകടനങ്ങൾക്ക് പിന്നാലെ ഐസിസി ടെസ്റ്റ് റാങ്കിങ്ങിലും മികച്ച മുന്നേറ്റവുമായി ഇന്ത്യൻ വിക്കറ്റ് കീപ്പർ റിഷബ് പന്ത്. റാങ്കിങ്ങിൽ ഏഴാം സ്ഥാനത്തേക്കാണ് പന്ത് കുതിച്ചുയർന്നത്. 800 പോയിന്റുമായാണ് പന്ത് പട്ടികയിൽ മികച്ച മുന്നേറ്റം നടത്തിയത്. ഇന്ത്യൻ ക്രിക്കറ്റിന്റെ ചരിത്രത്തിൽ ഇതാദ്യമായാണ് ഒരു വിക്കറ്റ് കീപ്പർ 800 പോയിന്റുകൾ കരസ്ഥമാക്കുന്നത്. 

ഇംഗ്ലണ്ടിനെതിരായ ആദ്യ ടെസ്റ്റിൽ രണ്ട് ഇന്നിംഗ്സുകളിലും സെഞ്ച്വറി നേടിയാണ് പന്ത് തിളങ്ങിയത്. ആദ്യ ഇന്നിങ്സിൽ 178 പന്തിൽ 12 ഫോറുകളും ആറ് സിക്സുകളും അടക്കം 134 റൺസ് ആണ് പന്ത് നേടിയത്. രണ്ടാം ഇന്നിങ്സിൽ 140 പന്തിൽ 118 റൺസും താരം സ്വന്തമാക്കി. 15 ഫോറുകളും മൂന്ന് സിക്സുകളും അടങ്ങുന്നതായിരുന്നു പന്തിന്റെ പ്രകടനം. 

അതേസമയം മത്സരത്തിൽ ഇന്ത്യ പരാജയപ്പെട്ടിരുന്നു. അഞ്ച് വിക്കറ്റിനായിരുന്നു ഗില്ലിനെയും സംഘത്തിന്നെയും ഇംഗ്ലണ്ട് തകർത്തു വിട്ടത്. ഇന്ത്യ ഉയർത്തിയ 371 റൺസ് ഇംഗ്ലണ്ട് അനായാസമായി മറികടക്കുകയായിരുന്നു.

സെഞ്ച്വറി നേടിയ ബെൻ ഡക്കറ്റിന്റെ കരുത്തിലാണ് ഇംഗ്ലണ്ട് വിജയം സ്വന്തമാക്കിയത്. 170 പന്തിൽ നിന്നും 21 ഫോറുകളും ഒരു സിക്സും ഉൾപ്പെടെ 149 റൺസ് നേടിയാണ് താരം തിളങ്ങിയത്. ജോ റൂട്ട് അർദ്ധ സെഞ്ച്വറി നേടിയും ടീമിന്റെ വിജയത്തിൽ നിർണായകമാണ്. 84 പന്തിൽ പുറത്താവാതെ 53 റൺസ് ആണ് റൂട്ട് സ്വന്തമാക്കിയത്. ആറ് ഫോറുകളാണ് താരത്തിന്റെ ബാറ്റിൽ നിന്നും പിറന്നത്.

Indian wicketkeeper Rishabh Pant has made significant progress in the ICC Test rankings following his impressive performance in the first match of the five-match Test series against England