തൃശൂർ: തൃശൂരിൽ കുഴിയിൽ വീഴാതിരിക്കാൻ വെട്ടിച്ച ബൈക്ക് ബസിലിടിച്ച് യുവാവിന് ദാരുണാന്ത്യം. പൂങ്കുന്നം സ്വദേശി വിഷ്ണുദത്ത് (30) ആണ് മരിച്ചത്. വിഷ്ണുദത്തും അമ്മയും ബൈക്കിൽ പോകുമ്പോഴായിരുന്നു സംഭവം. പരുക്കേറ്റ അമ്മയെ തൃശൂർ മെഡിക്കൽ കോളാജ് ആശുപ്രത്രിയിലേക്ക് മാറ്റി. 

രാവിലെ എട്ടുമണിയോടെ തൃശൂർ എംജി റോഡിൽ ആയിരുന്നു അപകടം ഉണ്ടായത്. റോഡിൽ ഉണ്ടായിരുന്ന കുഴിയിൽ വീഴാതിരിക്കാൻ സ്കൂട്ടർ വെട്ടി തിരിക്കുന്നതിനിടെ നിയന്ത്രണം വിട്ട് മറിയുകയായിരുന്നു. റോഡിൽ വീണ യുവാവിൻ്റെ ദേഹത്ത് കൂടി ബസ് കയറിയിറങ്ങി. ഉടൻ ആശുപത്രിയിലെത്തിച്ചെങ്കിലും മരിച്ചിരുന്നു. അമ്മ പത്മിനി പരുക്കുകളോടെ ചികിത്സയിലാണ്. 

ALSO READ: കാസര്‍കോട് യുവാവ് മാതാവിനെ തീ കൊളുത്തി കൊന്നു,  മൃതദേഹം കുറ്റിക്കാട്ടില്‍ തള്ളി, ബന്ധുവായ യുവതിയേയും കൊല്ലാന്‍ ശ്രമം; പ്രതി ഒളിവില്‍

അതേസമയം, സംഭവത്തിൽ പ്രതിഷേധിച്ച് തൃശൂർ നഗരസഭയിലെ കോൺഗ്രസ് കൗൺസിലർമാരുടേയും പ്രവർത്തകരുടെയും നേതൃത്വത്തിൽ റോഡ് ഉപരോധിച്ച് പ്രതിഷേധം നടക്കുകയാണ്. എം ജി റോഡിൽ അപകടം നടന്നിടത്ത് കിടന്നാണ് വനിതാ പ്രവത്തകർ ഉൾപ്പെടെ സമരം ചെയ്യുന്നത്. പൊലിസ് ഇവരെ അറസ്റ്റ് ചെയ്തു നീക്കാനുള്ള ശ്രമത്തിലാണ്.