കാസര്‍കോട്: കാസര്‍കോട് യുവാവ് മാതാവിനെ തീ കൊളുത്തി കൊന്നു മൃതദേഹം കുറ്റിക്കാട്ടില്‍ ഉപേക്ഷിച്ചു. മഞ്ചേശ്വരത്താണ് ഈ അതിക്രൂര സംഭവം. യുവാവ് മാതാവിനെ പെട്രോളൊഴിച്ച് തീകൊളുത്തുകയായിരുന്നു. വോര്‍ക്കാടിയിലെ പരേതനായ ലൂയി മൊന്തേരയുടെ ഭാര്യ ഹില്‍ഡ മൊന്തേരയാണ് (60) കൊല്ലപ്പെട്ടത്. മകന്‍ മെല്‍വിന്‍ മൊന്തേര ക്രൂരകൃത്യം നടത്തിയ ശേഷം ഒളിവിലാണ്. 

ബന്ധുവായ യുവതിയേയും ഇയാള്‍ തീകൊളുത്തി കൊല്ലാന്‍ ശ്രമിച്ചിരുന്നു. ഇവര്‍ ഗുരുതരാവസ്ഥയില്‍ മംഗളൂരുവിലെ സ്വകാര്യ ആശുപത്രിയിലാണ്. ഇവരുടെ ബന്ധുവായ വിക്ടറിന്റെ ഭാര്യയാണ് ലളിത (30). ഇവര്‍ക്ക് ഗുരുതരമായ പൊള്ളലേറ്റിട്ടുണ്ട്.  

വ്യാഴാഴ്ച പുലര്‍ച്ചെയാണ് നാടിനെ നടുക്കിയ കൊലപാതകം നാട്ടുകാരറിയുന്നത്. നിര്‍മാണത്തൊഴിലാളി മെല്‍വിനും മാതാവ് ഹില്‍ഡയും മാത്രമാണ് വീട്ടില്‍ താമസിക്കുന്നത്. മറ്റൊരു മകന്‍ ആല്‍വിന്‍ മൊന്തേര വിദേശത്താണ്. ബുധനാഴ്ച രാത്രി പതിവുപോലെ ഉറങ്ങാന്‍ കിടന്നതായിരുന്നു മാതാവ് ഹില്‍ഡ. ആ സമയത്താണ് യുവാവ് മാതാവിനെ ദേഹത്ത് പെട്രോളൊഴിച്ച് തീകൊളുത്തിയതെന്നാണ് പൊലിസ് പറയുന്നത്.

വ്യാഴാഴ്ച പുലര്‍ച്ചെ അമ്മക്ക് സുഖമില്ലെന്നുപറഞ്ഞാണ് ലളിതയെ മെല്‍വിന്‍ വീട്ടിലേക്ക് വരുത്തിയത്. വീടിനകത്ത് കയറിയ ഉടന്‍ ലളിതയുടെ ദേഹത്ത് പെട്രോളൊഴിച്ച് തീ കൊളുത്തുകയായിരുന്നു. അതിന് ശേഷം ഇയാള്‍ കടന്നുകളഞ്ഞു. ലളിതയുടെ നിലവിളികേട്ട് അയല്‍വാസികള്‍ ഓടിയെത്തിയപ്പോഴാണ് സംഭവമറിഞ്ഞത്. യുവാവ് ബസില്‍ കയറി മംഗളൂരു ഭാഗത്തേക്കാണ് പോയതെന്നാണ് പൊലിസ് സംശയിക്കുന്നത്. മഞ്ചേശ്വരം പൊലിസ് സംഘം സ്ഥലത്തെത്തി അന്വേഷണമാരംഭിച്ചു.

In a shocking incident in Manjeshwaram, Kasaragod, 60-year-old Hilda Monthera was allegedly set on fire and killed by her son Melvin Monthera. He also tried to burn a female relative, who is now hospitalized in critical condition. The accused is on the run.