ഗസ്സ: ഗസ്സയില്‍ ആക്രമണം തുടര്‍ന്ന് ഇസ്‌റാഈല്‍. 24 മണിക്കൂറിനിടെ 70ലേറെ ആളുകളെയാണ് ഇസ്‌റാഈല്‍ കൊന്നൊടുക്കിയത്. 
ഇതില്‍ 14 പേരെങ്കിലും വടക്കന്‍ ഗസ്സയിലുള്ളവരാണ്. ഇസ്‌റാഈല്‍ 'സുരക്ഷിത മേഖല' എന്ന് വിളിക്കപ്പെടുന്ന സ്ഥലത്ത് മാത്രം അഞ്ച് ഫലസ്തീനികളാണ് ഇന്നലെ കൊല്ലപ്പെട്ടത്. തെക്കന്‍ ഗസ്സയിലെ അല്‍-മവാസിയില്‍ ഒരു വാഹനത്തെ ലക്ഷ്യമിട്ട് ഇസ്‌റാഈല്‍ നടത്തിയ വ്യോമാക്രമണത്തിലാണ് അഞ്ച് ഫലസ്തീന്‍ സിവിലിയന്മാര്‍ കൊല്ലപ്പെട്ടത്. ആക്രമണത്തില്‍ നിരവധി ഫലസ്തീനികള്‍ക്ക് പരുക്കേറ്റിട്ടുണ്ട്. 
ലെബനനിലെ വ്യത്യസ്ത ഇസ്‌റാഈലി ആക്രമണങ്ങളില്‍ രണ്ട് പേര്‍ കൊല്ലപ്പെട്ടിട്ടുണ്ട്. 

ലെബനനിലെ തെക്ക് ഭാഗത്തായിരുന്നു വ്യോമാക്രമണം. ഷഖ്റയ്ക്കും ബരാഷിതിനും ഇടയില്‍ പ്രവര്‍ത്തിച്ചിരുന്ന ബുള്‍ഡോസറിന് നേരെ  ഇസ്‌റാഈലി ഡ്രോണ്‍ നടത്തിയ ആക്രമണത്തിലാണ് ഒരാള്‍ കൊല്ലപ്പെട്ടത്. ബീറ്റ് ലിഫ് പട്ടണത്തില്‍ മോട്ടോര്‍ സൈക്കിളിന് നേരെ നടന്ന ഡ്രോണ്‍ ആക്രമണത്തിലാണ് മറ്റൊരു മരണം. കഴിഞ്ഞ വര്‍ഷം നവംബറില്‍  ഇസ്‌റാഈല്‍-ഹിസ്ബുല്ല വെടിനിര്‍ത്തല്‍ പ്രാബല്യത്തില്‍ വന്നിട്ടുണ്ടെങ്കിലും  ഇസ്‌റാഈല്‍ ലെബനനില്‍ ആക്രമണം തുടരുകയാണ്.

ALSO READ: യുദ്ധാനന്തര ഗസ്സയില്‍ നിന്ന് ഹമാസിനെ പുറത്താക്കാന്‍ യു.എസും ഇസ്‌റാഈലും; അറബ് രാജ്യങ്ങളുടെ മേല്‍നോട്ടത്തില്‍ ഭരണത്തിന് പ്രത്യേക സമിതി രൂപീകരിക്കാന്‍ നീക്കം, വെടിനിര്‍ത്തലിനുള്ള ഊര്‍ജ്ജിത ശ്രമത്തിന് പിന്നില്‍ ഇതും

സഹായത്തിനെത്തിയവര്‍ക്ക് നേരെ ഇസ്‌റാഈല്‍ നടത്തുന്ന ആക്രമണങ്ങളില്‍ ഈമാസം മാത്രം ചുരുങ്ങിയത് 549 പേരെങ്കിലും കൊല്ലപ്പെട്ടതായി ഗസ്സ സര്‍ക്കാര്‍ മീഡിയ ഓഫിസ് റിപ്പോര്‍ട്ട് ചെയ്യുന്നു. 4066 പേര്‍ക്ക് പരുക്കേറ്റതായും റിപ്പോര്‍ട്ടില്‍ പറയുന്നു. 

2023 ഒക്ടോബര്‍ ഏഴ് മുതല്‍ ഗസ്സയില്‍ ഇസ്‌റാഈല്‍ നടത്തുന്ന ആക്രമണങ്ങളില്‍ ഇതുവരെ 56,259 പേര്‍ കൊല്ലപ്പെട്ടെന്നാണ് ഗസ്സ ആരോഗ്യമന്ത്രാലയത്തിന്റെ കണക്ക്. 132,458 പേര്‍ക്ക് പരുക്കേറ്റതായും റിപ്പോര്‍ട്ടില്‍ പറയുന്നു. അതേസമയം, യഥാര്‍ത്ഥ എണ്ണം ഇതിലുമേറെയായിരിക്കുമെന്നും വൃത്തങ്ങള്‍ പറയുന്നു.