ഉറ്റവരില്ലാതെ, ഊരും പേരുമറിയാതെ, മരണാനന്തര ചടങ്ങുകളില്ലാതെ അന്ത്യയാത്രയാകുന്നവര്‍...  തിരുവനന്തപുരത്ത് പ്രതിവര്‍ഷം തിരിച്ചറിയപ്പെടാതെ സംസ്‌കരിക്കപ്പെടുന്നത് അറുപതിലേറെ മൃതദേഹങ്ങളെന്ന് റിപ്പോര്‍ട്ട്. മെഡിക്കല്‍ കോളജില്‍ കഴിഞ്ഞവര്‍ഷം മെയ് മുതല്‍ ഈ വര്‍ഷം മെയ് വരെ 63 മൃതദേഹങ്ങളാണ് 'അജ്ഞാതം' എന്നപേരില്‍ മെഡിക്കല്‍ കോളജില്‍ എത്തിയത്. 

മോര്‍ച്ചറിയില്‍ ആഴ്ചകളോളം സൂക്ഷിച്ച ശേഷം അവകാശികളില്ലെന്ന് സ്ഥിരീകരിച്ച ശേഷമാണ് മൃതദേഹങ്ങള്‍ സംസ്‌കരിക്കുന്നത്. മൃതദേഹങ്ങള്‍ സൂക്ഷിക്കുന്നതിനായി 48 മോര്‍ച്ചറി ചേംബറുകളാണ് മെഡിക്കല്‍ കോളജിലുള്ളത്. റോഡ് അപകടത്തിലും കുഴഞ്ഞുവീണും പൊലിസ് എത്തിച്ചശേഷം ചികിത്സയ്ക്കിടെ മരിച്ചവരും തെരുവില്‍ മരിച്ചുകിടന്നവരും ഇക്കൂട്ടത്തിലുണ്ട്. നിലവില്‍ ഇരുപതോളം മൃതദേഹങ്ങളാണ് മോര്‍ച്ചറിയിലുള്ളത്. പൊലീസ് നടപടിക്രമങ്ങള്‍ പൂര്‍ത്തിയാക്കി ബന്ധുക്കളെ കണ്ടെത്താന്‍ കഴിയാത്തവയാണ് അജ്ഞാത മൃതദേഹമായി സംസ്‌കരിക്കപ്പെടുന്നത്.  50 വയസിനു മുകളില്‍ പ്രായമുള്ള പുരുഷന്മാരുടേതാണ് അജ്ഞാത മൃതദേഹങ്ങളില്‍ കൂടുതലും.

ജീവനക്കാരെത്തി ഒന്നുമുതല്‍ നാല് മൃതദേഹങ്ങള്‍വരെ ഒരേസമയം സംസ്‌കരിക്കുന്നതിനായി കൊണ്ടുപോവുകയാണ് പതിവ്.ശാന്തികവാടത്തിലാണ് സംസ്‌കാരം. അതേസമയം അപകടമരണത്തില്‍പ്പെട്ടവരുടെയും സംശയാസ്പദമായ സാഹചര്യത്തില്‍ മരിച്ചവരുടെയും മൃതദേഹങ്ങള്‍ പോസ്റ്റ്മോര്‍ട്ടം നടത്താറുണ്ട്. 

തിരിച്ചറിയപ്പെടാതെ സംസ്‌കരിക്കുന്ന മൃതദേഹങ്ങള്‍ സംബന്ധിച്ച് കൃത്യമായ രേഖകള്‍  പൊലിസ് സൂക്ഷിക്കാറുണ്ട്. മരിച്ചയാളുടെ ഫോട്ടോ, കൈവശമുണ്ടായിരുന്ന വസ്തുക്കള്‍, വസ്ത്രങ്ങള്‍ എന്നിവയാണ് പ്രധാനമായി സൂക്ഷിക്കുന്നത്.

കൂടാതെ മൃതദേഹത്തില്‍നിന്ന് ഡിഎന്‍എ സാംപിളുകളും ശേഖരിക്കും. ബന്ധുക്കളെത്തി സംശയം പറയുന്നവ ഫോട്ടോയില്‍ തിരിച്ചറിയാന്‍ സാധിക്കാതെ വന്നാല്‍ പകരം പരിശോധിക്കാനാണിത്. പൊതുവേ അജ്ഞാത മൃതദേഹങ്ങള്‍ അന്വേഷിച്ച് എത്തുന്നവര്‍ കുറവാണെന്നാണ് പൊലിസ് വ്യക്തമാക്കുന്നത്.