ഗാന്ധിനഗർ: അഹമ്മദാബാദ് വിമാന ദുരന്തത്തിൽ മരിച്ചവരെ തിരിച്ചറിയുന്നതിനുള്ള ഡിഎൻഎ പരിശോധനകൾ പൂർത്തിയായി. എയർ ഇന്ത്യ വിമാനം അപകടത്തിൽപ്പെട്ട് 16 ദിവസങ്ങൾ പിന്നിടുമ്പോൾ 260 മൃതദേഹങ്ങൾ തിരിച്ചറിഞ്ഞതായി അധികൃതർ അറിയിച്ചു. ഇതിൽ 241 പേർ വിമാന യാത്രക്കാരും 19 പേർ വിമാനം ഇടിച്ചിറങ്ങിയ സ്ഥലത്തുണ്ടായിരുന്നവരുമാണ്.

വിമാന യാത്രികരുടെ പട്ടികയിൽ ഉണ്ടായിരുന്ന ഗുജറാത്തിലെ ഭുജ് ദഹിൻസർ സ്വദേശി അനിൽ ലാൽജി ഖിമാനിയുടെ (32) മൃതദേഹം ഇതുവരെ തിരിച്ചറിയാൻ കഴിഞ്ഞിട്ടില്ല. ബോർഡിങ് ലിസ്റ്റിൽ അദ്ദേഹത്തിന്റെ പേര് ഉണ്ടെങ്കിലും ഡിഎൻഎ സാംപിളുകൾ മാച്ച് ചെയ്തില്ല. എന്നാൽ, അദ്ദേഹത്തിന്റേതെന്ന് സംശയിക്കുന്ന മൃതദേഹ ഭാഗങ്ങൾ ബന്ധുക്കൾക്ക് കൈമാറിയതായി അഹമ്മദാബാദ് സിവിൽ ആശുപത്രി സൂപ്രണ്ട് ഡോ. രാകേഷ് ജോഷി അറിയിച്ചു.

ആകെ 270 പേർ അപകടത്തിൽ മരിച്ചതായി സ്ഥിരീകരിച്ചു. ഒരാൾ മാത്രമാണ് രക്ഷപ്പെട്ടത്. 254 മൃതദേഹങ്ങൾ ഡിഎൻഎ പരിശോധനയിലൂടെയും ആറ് മൃതദേഹങ്ങൾ നേരിട്ടും തിരിച്ചറിഞ്ഞു. വെള്ളിയാഴ്ചയോടെ 240 മൃതദേഹങ്ങളുടെ പരിശോധന പൂർത്തിയായിരുന്നു. കഴിഞ്ഞ രാത്രിയോടെ അവസാന കേസിലും മാച്ചിങ് ലഭിച്ചതോടെ തിരിച്ചറിയൽ പ്രക്രിയ അവസാനിപ്പിച്ചതായി ഡോ. ജോഷി വ്യക്തമാക്കി.

ALSO READ: ഗസ്സയിലെ യുദ്ധം അവസാനിപ്പിക്കാന്‍ ട്രംപ് നെതന്യാഹുവിനെ പ്രേരിപ്പിക്കുന്നതായി റിപ്പോർട്ട്

മരിച്ചവരിൽ 181 പേർ ഇന്ത്യക്കാരാണ്. 52 പേർ യുകെയിൽ നിന്നും, ഏഴ് പേർ പോർച്ചുഗലിൽ നിന്നും, ഒരാൾ കാനഡയിൽ നിന്നുമാണ്. അഹമ്മദാബാദ് സന്ദർശിക്കാനെത്തിയ രണ്ട് ബ്രിട്ടീഷ് പൗരന്മാരും മരിച്ചവരിൽ ഉൾപ്പെടുന്നു. ഇവരിൽ ഒരാളുടെ മൃതദേഹം നേരത്തെ കൈമാറിയിരുന്നു, മറ്റൊരാളുടേത് കഴിഞ്ഞ ദിവസം വിട്ടുനൽകി.

അപകടത്തിൽ പരുക്കേറ്റ് ചികിത്സയിലുണ്ടായിരുന്ന അഞ്ച് പേരിൽ നാല് പേർ മരിച്ചു. ഒരാൾ വെള്ളിയാഴ്ച ആശുപത്രി വിട്ടു. വിമാനം ഇടിച്ചിറങ്ങിയ സ്ഥലത്തുണ്ടായിരുന്ന 19 പേരും അപകടത്തിൽ മരിച്ചതായി അധികൃതർ സ്ഥിരീകരിച്ചു.