ദോഹ: 2029ല്‍ നടക്കാനിരിക്കുന്ന അടുത്ത ക്ലബ്ബ് ഫുട്‌ബോള്‍ ലോകകപ്പിന് ആതിഥേയത്വം വഹിക്കാന്‍ ഖത്തര്‍ താല്‍പ്പര്യം പ്രകടിപ്പിച്ചതായി റിപ്പോര്‍ട്ട്. 2022 ഫിഫ ലോകകപ്പ് ടൂര്‍ണമെന്റിന് ഒരുക്കിയ സൗകര്യങ്ങള്‍ ഉപയോഗിച്ച് നല്ല നിലയില്‍ ടൂര്‍ണമെന്റ് സംഘടിപ്പിക്കാനാകുമെന്ന് ഖത്തര്‍ ഫിഫയെ അറിയിച്ചതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു.

ALSO READ: ബഹ്‌റൈന്‍: വീടുകളിലും ഓഫിസുകളിലും ഹൈഡ്രോപോണിക് കൃഷി ചെയ്യാന്‍ നിര്‍ദേശം

ഖത്തര്‍ ഉദ്യോഗസ്ഥര്‍ ഇതിനകം തന്നെ ഫിഫ അധികൃതരുമായി കൂടിക്കാഴ്ച നടത്തിയതായാണ് വിവരം. 2022 ഫിഫ ഫുട്‌ബോള്‍ ലോകകപ്പിന് ആതിഥേയത്വം വഹിച്ചതോടെ ഈ നേട്ടം കൈവരിക്കുന്ന മിഡില്‍ ഈസ്റ്റിലെ ആദ്യ രാജ്യമായി ഖത്തര്‍ മാറിയിരുന്നു. ഈ വേദികള്‍ 2029ലെ ടൂര്‍ണമെന്റിനായും ഉപയോഗിക്കാമെന്നാണ് ഖത്തറിന്റെ കണക്കുകൂട്ടല്‍.

നറുക്ക് ഖത്തറിന് വീഴുകയാണെങ്കില്‍ തന്നെയും രാജ്യത്തെ വേനല്‍ക്കാലത്തെ ചൂട് കാരണം ടൂര്‍ണമെന്റ് ശൈത്യകാലത്തേക്ക് മാറ്റേണ്ടിവരും. അതേസമയം, ഉദ്ഘാടന ടൂര്‍ണമെന്റില്‍ വാഗ്ദാനം ചെയ്യുന്ന 1 ബില്യണ്‍ ഡോളര്‍ സമ്മാനത്തുക യൂറോപ്യന്‍ ക്ലബ്ബുകളെ ആകര്‍ഷിച്ചേക്കും. 

അമേരിക്കയില്‍, ടൂര്‍ണമെന്റില്‍ കാലാവസ്ഥ ഒരു പ്രധാന പങ്ക് വഹിച്ചിട്ടുണ്ട്. രാജ്യത്തിന്റെ മിക്ക ഭാഗങ്ങളിലും ഉഷ്ണതരംഗം വീശിയതോടെ കളിക്കാരില്‍ നിന്നും മാനേജര്‍മാരില്‍ നിന്നും പരാതികള്‍ ഉയര്‍ന്നിരുന്നു. ടൂര്‍ണമെന്റിലെ ചൂടിനെക്കുറിച്ചുള്ള ആശങ്കകള്‍ പരിഹരിക്കുന്നതിനായി അധികൃതര്‍ പത്രസമ്മേളനം നടത്തിയിരുന്നു.

ALSO READ: ആശൂറാഅ് ദിനത്തില്‍ ബഹ്‌റൈനില്‍ പൊതു അവധി; അടുപ്പിച്ച് രണ്ട് ഒഴിവുദിനങ്ങള്‍

2029ലെ ക്ലബ്ബ് ഫുട്‌ബോള്‍ ലോകകപ്പിന് ആതിഥേയത്വം വഹിക്കാന്‍ താല്‍പ്പര്യം പ്രകടിപ്പിച്ച് സ്‌പെയിനും മൊറോക്കോയും ബ്രസീലും രംഗത്തുണ്ട്. ഇത് ഖത്തറിന് വെല്ലുവിളിയാകാന്‍ സാധ്യതയുണ്ട്.

Qatar has officially expressed interest in hosting the 2029 FIFA Club World Cup, building on its successful track record with global sporting events including the 2022 World Cup.