മലപ്പുറം: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ കരട് വോട്ടർപട്ടിക പ്രസിദ്ധീകരണം നീളുന്നു. ഈ മാസം നാലിന് പ്രസിദ്ധീകരിക്കാനായിരുന്നു തെരഞ്ഞെടുപ്പ് കമ്മിഷന്റെ നിർദേശം. എന്നാൽ ഇത് പിന്നീട് ഒൻപതിനകം നൽകണമെന്നാക്കി മാറ്റി. നിശ്ചിത ദിവസങ്ങൾ കഴിഞ്ഞിട്ടും കരട് വോട്ടർപട്ടിക പ്രസിദ്ധീകരിച്ചിട്ടില്ല.

പുതിയ വാർഡുകളിലടക്കം പോളിങ് ബൂത്തുകൾ ക്രമപ്പെടുത്തിയ ലിസ്റ്റ് കഴിഞ്ഞമാസം 30ന് തെരഞ്ഞെടുപ്പ് കമ്മിഷന് സമർപ്പിക്കാൻ ജില്ലാ കലക്ടർമാരോട് നിർദേശിച്ചിരുന്നു. എന്നാൽ, ബൂത്ത് ക്രമീകരണത്തിലെ അവ്യക്തതയെ തുടർന്ന് ജില്ലാതലത്തിൽ നിന്ന് കരട് വോട്ടർപട്ടിക സമയത്തിന് തെരഞ്ഞെടുപ്പ് കമ്മിഷന് നൽകാനായില്ല. ഇതോടെയാണ് ഈ മാസം നാലിന് കരട് വോട്ടർപട്ടിക പ്രസിദ്ധീകരിക്കാൻ കഴിയാതിരുന്നത്. തുടർന്നാണ് തെരഞ്ഞെടുപ്പ് കമ്മിഷൻ ഈമാസം ഒൻപതിനകം കരട് വോട്ടർപട്ടിക പ്രസിദ്ധീകരിക്കാൻ നിർദേശിച്ചത്. 

തദ്ദേശ സ്ഥാപനങ്ങളിൽ വാർഡ് വിഭജനം കഴിഞ്ഞുള്ള തെരഞ്ഞെടുപ്പായതിനാൽ മുൻകാലത്തേക്കാൾ കൂടുതൽ തെരഞ്ഞെടുപ്പ് ബൂത്തുകൾ ക്രമീകരിക്കേണ്ടതുണ്ട്. സംസ്ഥാനത്ത് തദ്ദേശ സ്ഥാപനങ്ങളിൽ 1,712 വാർഡുകളാണ് ഇത്തവണ കൂടിയത്. ഇവിടെയെല്ലാം പുതിയ പോളിങ് ബൂത്തുകൾ ക്രമീകരിക്കേണ്ടിവന്നതിനാൽ മുൻവർഷത്തെ പോളിങ് ബൂത്ത് സിസ്റ്റം പൂർണമായും മാറ്റിയിട്ടുണ്ട്. ഗ്രാമപഞ്ചായത്തുകളിൽ ഒരു വാർഡിൽ 1300 വോട്ടർമാർക്ക് ഒരു പോളിങ് ബൂത്ത് എന്ന രീതിയിലും നഗരസഭ, കോർപറേഷൻ എന്നിവിടങ്ങളിൽ 1600 വോട്ടർമാർക്ക് ഒരു പോളിങ് ബൂത്ത് എന്ന നിലയിലും ക്രമീകരിക്കാനാണ് തെരഞ്ഞെടുപ്പ് കമ്മിഷൻ നിർദേശിച്ചത്.

വോട്ടർമാർക്ക് രണ്ട് കിലോമീറ്ററിലധികം ചുറ്റിപ്പോകേണ്ട രീതിയിൽ പോളിങ് സ്‌റ്റേഷൻ പാടില്ലെന്നും നിർദേശമുണ്ട്. വനാതിർത്തി പ്രദേശങ്ങൾ, ചതുപ്പ് നിലങ്ങൾ തുടങ്ങിയ ഭൂമിശാസ്ത്രപരമായ പ്രത്യേകതകളുള്ള സ്ഥലങ്ങളിൽ വോട്ടർമാരുടെ എണ്ണത്തിൽ ഇളവ് അനുവദിക്കുന്നുണ്ട്. മുൻവർഷങ്ങളിലെ ആയിരത്തിൽ താഴെ വോട്ടർമാരുള്ള ബൂത്തുകളെല്ലാം മാറ്റിയിട്ടുണ്ട്. കരട് വോട്ടർപട്ടികയിൽ 2011ലെ സെൻസസ് പ്രകാരമാണ് വോട്ടർമാരുള്ളത്.

എന്നാൽ, പുതിയ വോട്ടർമാരെ കൂടി ഉൾപ്പെടുത്തുന്നതോടെ പോളിങ് ബൂത്തുകളിലും ചെറിയ മാറ്റങ്ങൾ വരുത്തേണ്ടിവരും. കരട് വോട്ടർപട്ടിക പ്രസിദ്ധീകരിക്കുന്നതോടെ പുതിയ വോട്ടർമാരെ ചേർക്കാനും കഴിയും. 2025 ജനുവരി ഒന്നിന് 18 വയസ് പൂർത്തിയാകുന്നവർക്ക് വോട്ടർപട്ടികയിൽ പേര് ചേർക്കാനാകും. പോളിങ് സ്റ്റേഷനിലെ ബൂത്തിന്റെ പേരടക്കം സോഫ്റ്റ്‌വെയറിലേക്ക് മാറ്റിയാണ് കരട് വോട്ടർപട്ടിക പ്രസിദ്ധീകരിക്കേണ്ടത്.

Local elections Publication of draft voters list with booths arranged is delayed