ശ്രീനഗര്‍: നിയന്ത്രണ രേഖയ്ക്ക് സമീപം പൂഞ്ച് മേഖലയില്‍ പാകിസ്താന്‍ വീണ്ടും വെടിനിര്‍ത്തല്‍ കരാര്‍ ലംഘിച്ചു. ഒരാഴ്ചയ്ക്കിടെ പാകിസ്താന്റെ ഭാഗത്തു നിന്നുള്ള രണ്ടാമത്തെ വെടിവെപ്പാണിത്.

ചെറിയ തോക്കുകളും മോട്ടോര്‍ ഷെല്ലുകളുമുപയോഗിച്ചാണ് വെടിവെപ്പ് നടത്തിയത്. ഇന്നലെ രാത്രിയിലായിരുന്നു സംഭവം. ഇന്ത്യന്‍ സൈന്യം ശക്തമായി തിരിച്ചടിച്ചതായി സൈനിക വക്താവ് അറിയിച്ചു.  ഇന്ത്യന്‍ സൈന്യത്തിലാര്‍ക്കും ഇതുവരെ പരുക്കേല്‍ക്കുകയോ നാശനഷ്ടങ്ങള്‍ സംഭവിക്കുകയോ ചെയ്തിട്ടില്ല. വെടിവെപ്പ് ഇപ്പോഴും തുടരുകയാണെന്നും സൈനിക വക്താവ് അറിയിച്ചു.

ഈ മാസം രണ്ടിനും പാകിസ്താന്‍ വെടിനിര്‍ത്തല്‍ കരാര്‍ ലംഘിച്ചിരുന്നു.