ന്യൂഡൽഹി: യമനിൽ വധശിക്ഷയ്ക്ക് വിധിക്കപ്പെട്ട് ജയിലിൽ കഴിയുന്ന മലയാളി നഴ്സ് നിമിഷപ്രിയയുടെ മോചനത്തിനായി കേന്ദ്രസർക്കാർ അഭിഭാഷകൻ സുപ്രീം കോടതിയിൽ വക്കാലത്ത് സമർപ്പിച്ചു. അഡ്വ. രാജ് ബഹദൂർ യാദവാണ് ഹരജി സമർപ്പിച്ചത്. കേസിന്റെ അടിയന്തര പ്രാധാന്യം കണക്കിലെടുത്ത് തിങ്കളാഴ്ച സുപ്രീം കോടതി ഹരജി പരിഗണിക്കും. നിമിഷപ്രിയയുടെ മോചനവുമായി ബന്ധപ്പെട്ട തൽസ്ഥിതി റിപ്പോർട്ട് സമർപ്പിക്കാൻ കേന്ദ്രസർക്കാരിന് കോടതി നിർദേശം നൽകിയിട്ടുണ്ട്.

2017-ൽ യമൻ പൗരനായ തലാൽ അബ്ദുൽ മഹ്ദിയെ കൊലപ്പെടുത്തിയ കേസിലാണ് നിമിഷപ്രിയയെ 2018-ൽ യമൻ കോടതി വധശിക്ഷയ്ക്ക് വിധിച്ചത്. 2020-ൽ അപ്പീൽ കോടതിയും 2023-ൽ യമൻ സുപ്രീം കോടതിയും ശിക്ഷ ശരിവെച്ചിരുന്നു. ഈ മാസം 16-ന് വധശിക്ഷ നടപ്പാക്കാനിരിക്കെ, മോചനത്തിനായുള്ള ശ്രമങ്ങൾ ഊർജിതമാക്കിയിരിക്കുകയാണ് നിമിഷപ്രിയ ആക്ഷൻ കൗൺസിൽ.

ALSO READ: ഗോരഖ്പൂർ മെഡിക്കൽ കോളേജിലെ മലയാളി ഡോക്ടറുടെ മരണം: ആത്മഹത്യയെന്ന് പ്രാഥമിക നിഗമനം; മകൻ ആത്മഹത്യ ചെയ്യേണ്ട യാതൊരു സാഹചര്യവും കുടുംബത്തിലില്ലെന്ന് പിതാവ്

നയതന്ത്ര തലത്തിൽ കേന്ദ്രസർക്കാർ നീക്കങ്ങൾ ആരംഭിച്ചതായാണ് റിപ്പോർട്ട്. യമനിൽ വ്യവസായം നടത്തുന്ന ഒരു മലയാളി ഇടപെടാൻ സന്നദ്ധത അറിയിച്ചിട്ടുണ്ട്. എല്ലാ മാർഗങ്ങളും പരിശോധിക്കുന്നുണ്ടെന്ന് ആക്ഷൻ കൗൺസിൽ ഭാരവാഹികൾ വ്യക്തമാക്കി. വിദേശകാര്യ മന്ത്രാലയത്തോട് വിഷയത്തിൽ സ്വീകരിച്ച നടപടികളുടെ വിശദാംശങ്ങൾ അറ്റോർണി ജനറലിന്റെ ഓഫീസ് ആരാഞ്ഞിട്ടുണ്ട്.