ഫുട്ബോളിൽ രണ്ട് പതിറ്റാണ്ടുകളായി ആധിപത്യം പുലർത്തുന്ന ഇതിഹാസ താരങ്ങളാണ് ക്രിസ്റ്റ്യാനോ റൊണാൾഡോയും ലയണൽ മെസിയും. ഇവരിൽ ഏറ്റവും മികച്ച താരമാരാണെന്ന് ഫുട്ബോൾ ലോകത്ത് എല്ലാ കാലത്തും സജീവമായി നിലനിൽക്കുന്ന ചർച്ചാ വിഷയമാണ്. ഇപ്പോൾ ഗോട്ട് ഡിബേറ്റിൽ ഇരു താരങ്ങളെയും മറികടന്നുകൊണ്ട് മറ്റൊരു ഇതിഹാസത്തിന്റെ പേര് പറഞ്ഞിരിക്കുകയാണ് അമേരിക്കൻ പ്രസിഡന്റ് ഡൊണാൾഡ് ട്രംപ്. ഫുട്ബോളിലെ എക്കാലത്തെയും മികച്ച താരമായി ബ്രസീലിയൻ ഇതിഹാസം പെലയെയാണ് ട്രംപ് തെരഞ്ഞെടുത്തത്. അമേരിക്കയിൽ നടന്ന ഫിഫ ക്ലബ് ലോകകപ്പ് ടൂർണമെന്റിന്റെ ഫൈനൽ പോരാട്ടത്തിന് ശേഷമാണ് ട്രംപ് പെലെയെക്കുറിച്ച് സംസാരിച്ചത്. 

''വർഷങ്ങൾക്കുമുമ്പ് ഞാൻ ചെറുപ്പമായിരുന്നപ്പോൾ, പെലെ എന്നൊരു താരത്തെ കൊണ്ടുവന്നു. അദ്ദേഹം കോസ്‌മോസ് എന്ന ടീമിനു വേണ്ടി കളിച്ചു. ഇത് വളരെക്കാലം മുമ്പായിരുന്നു. ഞാൻ പെലെയെ കാണാൻ വന്നു. അദ്ദേഹം വളരെ അതിശയകരമായ ഒരു താരമാണ്. ഫുട്ബോളിൽ  പെലെ വളരെ മികച്ചതായിരുന്നു എന്ന് പറയും" ഡൊണാൾഡ് ട്രംപ് 

ലോക ഫുട്ബോളിൽ ഐതിഹാസികമായ പ്രകടനങ്ങളിലൂടെ തന്റേതായ സ്ഥാനം കെട്ടിപ്പടുത്തുയർത്തിയ താരമാണ് പെലെ. 1956 മുതൽ 1977 വരെയുള്ള കാലയളവിലാണ് പെലെ ഫുട്ബോളിൽ നിറഞ്ഞു നിന്നത്. 1363 മത്സരങ്ങളിൽ നിന്നും 1279 ഗോളുകൾ ആണ് പെലെ നേടിയിട്ടുള്ളത്. ബ്രസീലിനായി മൂന്ന് ലോകകപ്പുകൾ നേടികൊടുക്കാനും പെലെക്ക് സാധിച്ചിട്ടുണ്ട്. 

ALSO READ: വൈഭവ ചരിതം തുടരുന്നു; കേരളത്തിന്റെ മണ്ണിൽ ഇന്ത്യൻ താരം നേടിയ റെക്കോർഡും തകർത്തു

അതേസമയം മെസിയും റൊണാൾഡോയും ഇപ്പോഴും ഫുട്ബോളിൽ മിന്നും പ്രകടനങ്ങളാണ് തങ്ങളുടെ ടീമുകൾക്ക് വേണ്ടി നടത്തിക്കൊണ്ടിരിക്കുന്നത്. മെസി നിലവിൽ മേജർ ലീഗ് സോക്കർ ക്ലബായ ഇന്റർ മയാമിക്ക് വേണ്ടിയാണ് കളിക്കുന്നത്. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. 

മറുഭാഗത്ത് റൊണാൾഡോ സഊദി പ്രൊ ലീഗ് ക്ലബായ അൽ നസറിന്റെ താരവുമാണ്. റൊണാൾഡോയുടെ വരവിന് പിന്നാലെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. അൽ നസറിന് വേണ്ടി ഇതുവരെ തകർപ്പൻ പ്രകടനങ്ങളാണ് റൊണാൾഡോ നടത്തിക്കൊണ്ടിരിക്കുന്നത്. അൽ നസറിനായി 99 ഗോളുകളാണ് റൊണാൾഡോ നേടിയിട്ടുള്ളത്.

Donald Trump has chosen Brazilian legend Pele as the greatest football player of all time, beating out Lionel Messi and Cristiano Ronaldo in the Got7 debate.