കോഴിക്കോട്: കേരളത്തിന്റെ ഏറ്റവും വലിയ അടിസ്ഥാന സൗകര്യ വികസന പദ്ധതികളിലൊന്നായ ആനക്കാംപൊയിൽ-കള്ളാടി-മേപ്പാടി തുരങ്കപാതയുടെ നിർമാണ പ്രവൃത്തികൾക്ക് ഇന്ന് ഔദ്യോഗികമായി തുടക്കം കുറിക്കും. വയനാട്, കോഴിക്കോട് ജില്ലകളിലെ യാത്രാദുരിതത്തിന് പരിഹാരമാകുന്നതോടൊപ്പം മേഖലയുടെ സമഗ്ര വികസനത്തിന് ചാലകമാകുന്ന ഈ പദ്ധതിയുടെ ഉദ്ഘാടനം മുഖ്യമന്ത്രി പിണറായി വിജയൻ ഇന്ന് വൈകിട്ട് 4 മണിക്ക് കോഴിക്കോട് ജില്ലയിലെ ആനക്കാംപൊയിൽ സെന്റ് മേരീസ് സ്കൂൾ ഗ്രൗണ്ടിൽ നിർവഹിക്കും.

8.735 കിലോമീറ്റർ ദൈർഘ്യമുള്ള ഈ തുരങ്കപാതയിൽ 5.58 കിലോമീറ്റർ വയനാട് ജില്ലയിലും 3.15 കിലോമീറ്റർ കോഴിക്കോട് ജില്ലയിലുമാണ്. മറിപ്പുഴ (കോഴിക്കോട്) മുതൽ മീനാക്ഷി പാലം (വയനാട്, കള്ളാടി) വരെ വ്യാപിക്കുന്ന പദ്ധതിയിൽ 8.11 കിലോമീറ്റർ ദൂരം ഇരട്ട തുരങ്കങ്ങളാണ്. ഇതിനു പുറമേ, ഇരുവഴിഞ്ഞി പുഴക്ക് കുറുകെ രണ്ട് പ്രധാന പാലങ്ങളും മൂന്ന് ചെറുപാലങ്ങളും നിർമിക്കും. ആറ് വളവുകളുള്ള ഈ റൂട്ടിൽ ഓരോ 300 മീറ്ററിലും ഇരട്ട തുരങ്കങ്ങളെ ബന്ധിപ്പിക്കുന്ന ക്രോസ്സ് പാസ്സേജുകളും ഉണ്ടാകും. പദ്ധതിയുടെ മൊത്തം ചെലവ് 2134.50 കോടി രൂപയാണ്.

പദ്ധതിക്കായി 33 ഹെക്ടർ ഭൂമി ഏറ്റെടുക്കുന്നുണ്ട്. ഇതിൽ 5771 മീറ്റർ വനമേഖലയിലൂടെയും 2964 മീറ്റർ സ്വകാര്യ ഭൂമിയിലൂടെയുമാണ് തുരങ്കപാത കടന്നുപോകുന്നത്. വയനാട് ജില്ലയിൽ 8.0525 ഹെക്ടർ ഭൂമിയും കോഴിക്കോട് ജില്ലയിൽ 8.1225 ഹെക്ടർ ഭൂമിയും സ്വകാര്യ ഭൂമിയായി ഏറ്റെടുത്ത് കൈമാറിക്കഴിഞ്ഞു. വയനാട്ടിൽ മേപ്പാടി-കള്ളാടി-ചൂരൽമല റോഡ് (സംസ്ഥാന പാത-59), കോഴിക്കോട്ട് ആനക്കാംപൊയിൽ-മുത്തപ്പൻപുഴ-മറിപ്പുഴ റോഡ് എന്നിവ തുരങ്കപാതയുമായി ബന്ധിപ്പിക്കും. കള്ളാടിയിലെ മീനാക്ഷി പാലത്ത് സമുദ്രനിരപ്പിൽ നിന്ന് 851 മീറ്റർ ഉയരത്തിലാണ് വയനാട്ടിലെ പ്രവേശന കവാടം സ്ഥാപിക്കുന്നത്.

ഈ തുരങ്കപാത കോഴിക്കോടിനെയും വയനാടിനെയും കൂടുതൽ അടുപ്പിക്കുകയും യാത്രാസമയം ഗണ്യമായി കുറയ്ക്കുകയും ചെയ്യും. ടൂറിസം, വ്യവസായം, കൃഷി തുടങ്ങിയ മേഖലകളിൽ വലിയ മാറ്റങ്ങൾക്ക് വഴിയൊരുക്കുമെന്ന് പ്രതീക്ഷിക്കുന്ന ഈ പദ്ധതി, കേരളത്തിന്റെ വികസന ചരിത്രത്തിൽ നാഴികക്കല്ലാകുമെന്നാണ് വിലയിരുത്തൽ.