തിരുവനന്തപുരം: കഴക്കൂട്ടത്ത് ദേശീയപാതയിൽ ഥാർ കാർ നിയന്ത്രണം വിട്ട് ഇടിച്ച് മറിഞ്ഞുണ്ടായ അപകടത്തിൽ ഒരാൾ മരിച്ചു. രണ്ടു യുവതികൾ ഉൾപ്പെടെ നാല് പേർക്ക് പരുക്കേറ്റു. രണ്ടുപേരുടെ നില ഗുരുതരമാണ്. കാർ ഓടിച്ചിരുന്ന ബാലരാമപുരം സ്വദേശി ഷിബിൻ (28) ആണ് മരിച്ചത്. ശനിയാഴ്ച രാത്രി 12 മണിയോടെയാണ് അപകടം ഉണ്ടായത്.

ഇടിയുടെ ആഘാതത്തിൽ വാഹനം പൂർണമായി തകർന്നു. ബാലരാമപുരം സ്വദേശി ഷിബിൻ (28), മാരായമുട്ടം സ്വദേശി രജനീഷ് (27), പോങ്ങുംമൂട് സ്വദേശി കിരൺ (29), കൈമനം സ്വദേശിനി ശ്രീലക്ഷ്മി (23), സി.വി.ആർ പുരം സ്വദേശിനി അഖില (28) എന്നിവരാണ് അപകടത്തിൽപ്പെട്ട വാഹനത്തിൽ ഉണ്ടായിരുന്നത്. ഇതിൽ ഷിബിൻ മരിച്ചു. പരുക്കേറ്റവരെ തിരുവനന്തപുരം മെഡിക്കൽ കോളജിലേക്ക് മാറ്റി.

ALSO READ: മുലപ്പാൽ തൊണ്ടയിൽ കുടുങ്ങി നാലുമാസം പ്രായമുള്ള കുഞ്ഞിന് ദാരുണാന്ത്യം; ദമ്പതികളുടെ ആദ്യ കുഞ്ഞ് മരിച്ചതും മുലപ്പാൽ കുടുങ്ങി

അമിത വേഗത്തിൽ വന്ന വാഹനം ദേശീയപാതയിലെ എലിവേറ്റഡ് ഹൈവേയിലെ തൂണിലിടിച്ച് മറിയുകയായിരുന്നു. കഴക്കൂട്ടം എലവേറ്റഡ് ഹൈവേയിൽ ടെക്നോ പാർക്കിനു സമീപമാണ് അപകടമുണ്ടായത്. കാർ റേസിങ്ങിനിടെയാണ് നിയന്ത്രണം വിട്ട് അപകടമുണ്ടായതെന്നാണ് സൂചന. സംഘത്തിൽ മറ്റ് വാഹനങ്ങൾ ഉണ്ടായിരുന്നുവെന്നാണ് പൊലിസിന് ലഭ്യമായ വിവരം. കഴക്കൂട്ടം പൊലിസ് കേസെടുത്ത് അന്വേഷണം തുടങ്ങി.