ബാഴ്‌സലോണയുടെ ഐക്കണിക് പത്താം നമ്പർ ജേഴ്സിയുടെ പുതിയ അവകാശി ഇനിമുതൽ ലാമിൻ യമാലാണ്. ഒരുപാട് ഇതിഹാസ താരങ്ങൾ അണിഞ്ഞ പത്താം നമ്പറാണ് യമാൽ സ്വന്തമാക്കിയിരിക്കുന്നത്. താരത്തിന് 18 വയസ്സ് പൂർത്തിയായതിന് പിന്നാലെയാണ് ബാഴ്സ ഇക്കാര്യം ഔദ്യോഗികമായി പുറത്തുവിട്ടത്.

ബാഴ്സലോണയുടെ പത്താം നമ്പർ സ്വന്തമാക്കിയതിന് ശേഷം യമാൽ തന്റെ മുന്നിലുള്ള ലക്ഷ്യത്തെക്കുറിച്ച് സംസാരിച്ചു. ലയണൽ മെസി, ഡീഗോ മറഡോണ, റൊണാൾഡീഞ്ഞോ എന്നീ ഇതിഹാസങ്ങൾ അണിഞ്ഞ പത്താം നമ്പർ സ്വന്തമാക്കുന്നത് ഏതൊരു യുവതാരത്തിന്റെയും സ്വപ്നമാണെന്നാണ് യമാൽ പറഞ്ഞത്. 

''മെസി, റൊണാൾഡീഞ്ഞോ, മറഡോണ എന്നിവരിൽ നിന്ന് ഈ പത്താം നമ്പർ സ്വന്തമാക്കണമെന്ന് എല്ലാവരും സ്വപ്നം കാണുന്നുണ്ട്. പത്താം നമ്പറിൽ അവർ സ്വന്തമാക്കിയ പാരമ്പര്യം തുടരാൻ ഞാൻ ശ്രമിക്കും. 2031 വരെയുള്ള കരാർ പുതുക്കൽ ഒരു വലിയ ചുവടുവയ്പ്പാണ്. വിജയങ്ങൾ നിറഞ്ഞ ഒരു നീണ്ട പാതയാണ് മുന്നിലുള്ളത്. കഴിഞ്ഞ വർഷത്തേക്കാൾ കൂടുതൽ ഇത് ആസ്വദിക്കാൻ കഴിയുമെന്ന് ഞാൻ പ്രതീക്ഷിക്കുന്നു'' ലാമിൻ യമാൽ ബാഴ്സ യൂണിവേഴ്സലിനോട് പറഞ്ഞു. 

ബാഴ്സയുടെ ജേഴ്സിയിൽ ഒരുപാട് ഇതിഹാസങ്ങളുടെ പോരാട്ടങ്ങൾക്ക് സാക്ഷ്യം വഹിച്ച ജേഴ്സി നമ്പറാണ് 10. ലയണൽ മെസി, ഡീഗോ മറഡോണ, റൊണാൾഡീഞ്ഞോ, ഹ്രിസ്റ്റോ സ്റ്റോയിച്കോവ്, റിവാൾഡോ, പെപ് ഗാർഡിയോള തുടങ്ങിയ തുടങ്ങിയ താരങ്ങൾ പത്താം നമ്പർ ജേഴ്സി അണിഞ്ഞിട്ടുണ്ട്. 2021ൽ മെസി പിഎസ്ജിയിലേക്ക് പോയതിന്‌ ശേഷം അൻസു ഫാറ്റിയും ഈ പത്താം നമ്പർ ജേഴ്സി ധരിച്ചിട്ടുണ്ട്.  

ബാഴ്സലോണക്ക് വേണ്ടി ഇതിനോടകം തന്നെ തകർപ്പൻ പ്രകടനമാണ് യമാൽ പുറത്തെടുത്തുകൊണ്ടിരിക്കുന്നത്. ബാഴ്സയ്ക്ക് വേണ്ടി ഇതുവരെ 106 മത്സരങ്ങളിൽ നിന്നും 25 ഗോളുകളും 34 അസിസ്റ്റുകളും ആണ് നേടിയിട്ടുള്ളത്. 2023ൽ തന്റെ പതിനഞ്ചാം വയസ്സിലായിരുന്നു കറ്റാലൻമാർക്ക് വേണ്ടി യമാൽ ആദ്യമായി ബൂട്ട് കെട്ടിയത്. രാജ്യാന്തര തലത്തിൽ സ്പാനിഷ് ടീമിന് വേണ്ടിയും ശ്രദ്ധേയമായ പ്രകടനങ്ങൾ പുറത്തെടുക്കാൻ യമാലിന് സാധിച്ചിട്ടുണ്ട്. സ്പാനിഷ് ടീമിനൊപ്പം 2024 യൂറോ കപ്പ് സ്വന്തമാക്കാനും ലാമിന് സാധിച്ചിട്ടുണ്ട്.

After taking on Barcelonas number 10 shirt Yamal spoke about his goal Yamal said that it is the dream of any young player to take on the number 10 shirt worn by legends like Lionel Messi Diego Maradona and Ronaldinho