മേജർ ലീഗ് സോക്കറിൽ ഇന്റർ മയാമിക്ക് വമ്പൻ വിജയം. ന്യൂയോർക്ക് റെഡ് ബുൾസിനെ ഒന്നിനെതിരെ അഞ്ചു ഗോളുകൾക്കാണ് ഇന്റർ മയാമി പരാജയപ്പെടുത്തിയത്. എതിരാളികളുടെ തട്ടകമായ റെഡ്ബുൾസ് അറീനയിൽ നടന്ന മത്സരത്തിൽ ഇന്റർ മയാമിക്ക് വേണ്ടി ഇരട്ട ഗോൾ നേടി അർജന്റൈൻ ഇതിഹാസം ലയണൽ മെസി മിന്നും പ്രകടനമാണ് പുറത്തെടുത്തത്. മത്സരത്തിന്റെ രണ്ടാം പകുതിയിലായിരുന്നു മെസിയുടെ രണ്ട് ഗോളുകളും പിറന്നത്. 60, 75 എന്നീ മിനിറ്റുകളിൽ ആയിരുന്നു മെസിയുടെ ഗോൾ പിറന്നത്. 

തുടർച്ചയായ ഗോൾ വേട്ടയിൽ മെസി ഫുട്ബോളിൽ മറ്റൊരു റെക്കോർഡും സൃഷ്ടിച്ചിരിക്കുകയാണ്. ഫുട്ബോളിന്റെ ചരിത്രത്തിൽ പെനാൽറ്റിയിൽ നിന്നല്ലാതെ ഏറ്റവും കൂടുതൽ ഗോളുകൾ നേടുന്ന താരമായാണ് മെസി മാറിയത്. 764 ഗോളുകളാണ് മെസി പെനാൽറ്റിയിൽ നിന്നല്ലാതെ സ്കോർ ചെയ്തിട്ടുള്ളത്. 763 ഗോളുകൾ പെനാൽറ്റിക്ക് പുറമെ നേടിയ പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോയെ മറികടന്നാണ് മെസി ഈ റെക്കോർഡ് തന്റെ പേരിലാക്കി മാറ്റിയത്. 

ALSO READ: പാകിസ്താനെതിരെയുള്ള മത്സരത്തിൽ നിന്നും പിന്മാറി മുൻ ഇന്ത്യൻ താരങ്ങൾ; റിപ്പോർട്ട്

ഇതിനു മുമ്പ് ഗോൾ വേട്ടയിൽ മറ്റൊരു അമ്പരിപ്പിക്കുന്ന റെക്കോർഡും മെസി സ്വന്തമാക്കിയിരുന്നു. എംഎൽഎസിൽ തുടർച്ചയായ അഞ്ചു മത്സരങ്ങളിൽ രണ്ട് ഗോളുകൾ നേടുന്ന ആദ്യ താരമായാണ് മെസി മാറിയത്. മോൺഡ്രിയലിനെതിരെയുള്ള രണ്ട് മത്സരങ്ങളിലും കൊളംബസിനെതിരെയും ന്യൂ ഇംഗ്ലണ്ടിനെതിരെയും നാഷ്വല്ലക്കെതിരെയുമാണ് മെസി ഇരട്ട ഗോളുകൾ നേടിയത്. 

 

മത്സരത്തിൽ മെസിക്ക് പുറമേ ഇന്റർ മയാമിക്കായി ടെലാസ്കോ സെഗോവിയ ഇരട്ട ഗോൾ നേടി മികച്ച പ്രകടനം നടത്തി. ജോർഡി ആൽബയുടെ വകയായിരുന്നു ഇന്റർ മയാമിയുടെ ആദ്യ ഗോൾ പിറന്നത്. റെഡ് ബുൾസിനായി അലക്സാണ്ടർ ഹാക്ക് ആണ് ആശ്വാസഗോൾ കണ്ടെത്തിയത്

മത്സരത്തിന്റെ സർവാധിപത്യവും ഇന്റർ മയാമിയുടെ കൈവശമായിരുന്നു. 64 ശതമാനം ബോൾ പൊസഷൻ സ്വന്തമാക്കിയ മെസിയും സംഘവും 13 ഷോട്ടുകളാണ് എതിരാളികളുടെ പോസ്റ്റിലേക്ക് ഉതിർത്തത്. ഇതിൽ 8 ഷോട്ടുകളും ഓൺ ടാർഗറ്റിലേക്ക് ആയിരുന്നു. മറുഭാഗത്ത് 9 ഷോട്ടുകളിൽ നിന്നും രണ്ട് ഷോട്ടുകൾ മാത്രമേ റെഡ് ബുൾസിനു ഇന്റർ മയാമിയുടെ പോസ്റ്റിലേക്ക് എത്തിക്കാൻ സാധിച്ചത്.

നിലവിൽ എംഎൽഎസ് പോയിന്റ് പട്ടികയിൽ അഞ്ചാം സ്ഥാനത്താണ് ഇന്റർ മയാമി. 21 മത്സരങ്ങളിൽ നിന്നും 12 വിജയവും 5 സമനിലയും നാല് തോൽവിയും അടക്കം 41 പോയിന്റാണ് ഇന്റർ മയാമിയുടെ കൈവശമുള്ളത്. മേജർ ലീഗ് സോക്കറിൽ ജൂലൈ 27ന് സിൻസിനാറ്റിക്കെതിരെയാണ് ഇന്റർമയാമിയുടെ അടുത്ത മത്സരം.

Lionel Messi scored twice for Inter Miami in a match against the New York Red Bulls. With his continuous goal scoring spree, Messi also became the player with the most goals in the history of football, other than from penalties.