തിരുവനന്തപുരം: ആരോഗ്യരംഗത്തെ കാര്യക്ഷമതയെച്ചൊല്ലി നിയമസഭാ ചോദ്യോത്തര വേളയില്‍ ഏറ്റുമുട്ടി പ്രതിപക്ഷവും ആരോഗ്യമന്ത്രിയും. തിരുവനന്തപുരം മെഡിക്കല്‍ കോളജില്‍ മാത്രം 80 കോടി രൂപയുടെ ഉപകരണങ്ങള്‍ വാങ്ങിയെന്ന് മന്ത്രി വീണാ ജോര്‍ജ് പറഞ്ഞു. യു.ഡി.എഫ് സര്‍ക്കാര്‍ 15 കോടി രൂപയുടെ ഉപകരണം മാത്രമാണ് നല്‍കിയത്. 41 കോടി 84 ലക്ഷം കോടി രൂപ ഉപകരണങ്ങള്‍ സര്‍ക്കാര്‍ തിരുവനന്തപുരം മെഡിക്കല്‍ കോളജിന് നല്‍കിയെന്നും ആരോഗ്യ മന്ത്രി സഭയില്‍ പറഞ്ഞു.

ആരോഗ്യവകുപ്പിന് കപ്പിത്താനില്ലാത്ത അവസ്ഥയാണെന്ന് പ്രതിപക്ഷം ആരോപിച്ചു. സിസ്റ്റം 10 വര്‍ഷമായിട്ടും ശരിയായില്ലേ? പഞ്ഞി വരെ വാങ്ങി നല്‍കേണ്ട ഗതികേടിലാണ് രോഗികളെന്നും പ്രതിപക്ഷ നേതാവ് വി.ഡി സതീശന്‍ പറഞ്ഞു. ജില്ലാ ആശുപത്രിയുടെ ബോര്‍ഡ് മാറ്റിയാല്‍ മെഡിക്കല്‍ കോളജ് ആകുമോയെന്നും അദ്ദേഹം ചോദിച്ചു. 

അതേസമയം, കുഞ്ഞുങ്ങളെ ഇല്ലാതാക്കുകയല്ല, സംരക്ഷിക്കുകയാണ് ആരോഗ്യവകുപ്പിന്റെ ദൗത്യമെന്ന് രാഹുല്‍ മാങ്കൂട്ടത്തിലിനെ പരോക്ഷമായി പരാമര്‍ശിച്ച് വീണാ ജോര്‍ജ് പറഞ്ഞു. ആരോഗ്യരംഗത്തെ പ്രശ്നങ്ങളുമായി ബന്ധപ്പെട്ട് സംവാദത്തിനു തയാറാണെന്നും പ്രതിപക്ഷ നേതാവിനെ അതിനായി ക്ഷണിക്കുകയാണെന്നും മന്ത്രി വ്യക്തമാക്കി. 

കഴിഞ്ഞ നാല് വര്‍ഷം കൊണ്ട് കേരളത്തിലെ ആളുകള്‍ക്ക് 7708 കോടി രൂപയുടെ സൗജന്യ ചികിത്സ നല്‍കി. 24 ലക്ഷത്തോളം ആളുകള്‍ക്കാണ് സൗജന്യ ചികിത്സ നല്‍കിയത്. കേരളത്തിന്റെ ആരോഗ്യ മേഖലയില്‍ വലിയ മാറ്റം ഉണ്ടായിട്ടുണ്ട്. ഒരാള് പോലും രോഗത്തിന് മുമ്പില്‍ നിസ്സഹായരായി പോകാന്‍ പാടില്ലെന്നും ആരോഗ്യ മന്ത്രി പറഞ്ഞു. 

അതേസമയം, പ്രതിപക്ഷനേതാവിന്റെ നിലപാട് തള്ളി ഇന്നലെ സഭയില്‍ എത്തിയ രാഹൂല്‍ മാങ്കൂട്ടത്തില്‍ ഇന്ന് സഭയിലെത്തിയില്ല. വ്യക്തിപരമായ കാരണങ്ങള്‍ ചൂണ്ടിക്കാട്ടി വിട്ടുനില്‍ക്കുന്നതായാണ് ലഭിക്കുന്ന വിശദീകരണം.