ജെറുസലേം: ഗസ്സയില്‍ വംശഹത്യ തുടരുന്നതില്‍ പ്രതിഷേധിച്ച് ലോകരാജ്യങ്ങള്‍ ഓരോരുത്തരുരായി ഏര്‍പെടുത്തുന്ന ഉപരോധങ്ങള്‍ ഇസ്‌റാഈലിന് തിരിച്ചടിയാവുന്നുണ്ടെന്ന് സമ്മതിച്ച് പ്രധാനമന്ത്രി ബിന്യമിന്‍ നെതന്യാഹു. 

ലോകത്ത് ഇസ്‌റാഈല്‍ ഭീകരമായ ഒറ്റപ്പെടല്‍ അനുഭവിക്കുകയാണെന്നാണ് നെതന്യാഹു പറഞ്ഞത്. ഇതിനെ മറികടക്കാന്‍ കൂടുതല്‍ സ്വയംപര്യാപ്തത കൈവരിക്കേണ്ടിവരുമെന്നും ഇസ്‌റാഈല്‍ പ്രധാനമന്ത്രി വ്യക്തമാക്കുന്നു. ടൈംസ് ഓഫ് ഇസ്‌റാഈലിന്റേതാണ് റിപ്പോര്‍ട്ട്. ജറുസലേമില്‍ നടന്ന ധനകാര്യ മന്ത്രാലയത്തിലെ അക്കൗണ്ടന്റ് ജനറലിന്റെ സമ്മേളനത്തിലായിരുന്നു പ്രസ്താവന. വിദേശ വ്യാപാരത്തെ ആശ്രയിക്കാതെ സ്വയംപര്യാപ്തമായൊരു സമ്പദ് വ്യവസ്ഥ വളര്‍ത്തിയെടുക്കണമെന്നും നെതന്യാഹു പറഞ്ഞു.

സ്വതന്ത്ര സ്വഭാവസവിശേഷതകളുള്ള ഒരു സമ്പദ്വ്യവസ്ഥയുമായി നാം കൂടുതല്‍ കൂടുതല്‍ പൊരുത്തപ്പെടേണ്ടതുണ്ട്. ഞാന്‍ സ്വതന്ത്ര വിപണിയിലാണ് വിശ്വസിക്കുന്നത്, പക്ഷേ നമ്മുടെ ആയുധ വ്യവസായങ്ങള്‍ തടയപ്പെടുന്ന ഒരു സാഹചര്യത്തില്‍ നാം സ്വയം കണ്ടെത്തിയേക്കാം. ഇവിടെ ആയുധ വ്യവസായങ്ങള്‍ വികസിപ്പിക്കേണ്ടതുണ്ട് - ഗവേഷണവും വികസനവും മാത്രമല്ല, നമുക്ക് ആവശ്യമുള്ളത് ഉത്പാദിപ്പിക്കാനുള്ള കഴിവുമുണ്ട്- നെതന്യാഹു പറഞ്ഞു.

ALSO READ: ഇസ്‌റാഈലിന് പിന്തുണ ഉറപ്പുനൽകി യു.എസ്

യുദ്ധത്തിന്റെ തുടക്കം മുതല്‍ ഇസ്‌റാഈല്‍ രണ്ട് പുതിയ ഭീഷണികള്‍ നേരിടുന്നുണ്ടെന്നും നെതന്യാഹു പറഞ്ഞു. മുസ്‌ലിം ഭൂരിപക്ഷ രാജ്യങ്ങളില്‍ നിന്നുള്ള കുടിയേറ്റത്തിന്റെ ഫലമായി യൂറോപ്പിലെ ജനസംഖ്യാപരമായ മാറ്റങ്ങളാണ് ഒന്ന്.  രണ്ടാമത്തേത് പുതിയ സാങ്കേതികവിദ്യകളുടെ സഹായത്തോടെ ഡിജിറ്റല്‍ പ്ലാറ്റ്ഫോമുകളില്‍ ഇസ്‌റാഈല്‍ വിരുദ്ധരുടെ സ്വാധീനവും- നെതന്യാഹു പറഞ്ഞു. 

ഇസ്‌റാഈലിനെതിരെ ആയുധ ഉപരോധങ്ങള്‍ ഏര്‍പ്പെടുത്തുക ഉള്‍പ്പെടെയുള്ള നടപടിയെടുക്കാന്‍ യൂറോപ്യന്‍ രാജ്യങ്ങള്‍ ശ്രമിച്ചുകൊണ്ടിരിക്കുന്ന പശ്ചാത്തലത്തിലാണ് നെതന്യാഹു ഈ തുറന്നു പറച്ചില്‍ നടത്തിയിരിക്കുന്നത്. ഖത്തര്‍ ആക്രമണത്തിന്റെ പശ്ചാത്തലത്തില്‍ അമേരിക്ക ഉള്‍പ്പെടെയുള്ള സഖ്യകക്ഷികളില്‍ നിന്നടക്കം രൂക്ഷ വിമര്‍ശനം നേരിടുകയാണ് ഇസ്‌റാഈല്‍. മാത്രമല്ല രാജ്യത്തിനുള്ളില്‍ തന്നെ നെതന്യാഹു കടുത്ത എതിര്‍പ്പാണ് നേരിടുന്നത്. രാഷ്ട്രീയ എതിരാളികളും ഹൈടെക് വ്യവസായ ഗ്രൂപ്പുകളും നെതന്യാഹുവിനെതിരെ രംഗത്തെത്തിയിരുന്നു. ഇസ്‌റാഈല്‍ നേരിടുന്ന അവസ്ഥക്ക് പ്രധാനമന്ത്രിയെയാണ് ഇവര്‍ കുറ്റപ്പെടുത്തുന്നത്. 

അതേസമയം, ഇസ്‌റാഈല്‍ ഒറ്റപ്പെട്ടെന്ന നെതന്യാഹുവിന്റെ പരാമര്‍ശത്തിന് പിന്നാലെ രൂക്ഷ വിമര്‍ശനവുമായി ഇസ്‌റാഈല്‍ പ്രതിപക്ഷ നേതാവ് യെയര്‍ ലാപിഡ് രംഗത്തെത്തി. നെതന്യാഹുവിന്റെ പ്രസ്താവന യാഥാര്‍ഥ്യബോധമില്ലാത്തതാണെന്ന് ലാപിഡ് ചൂണ്ടിക്കാട്ടി. നെതന്യാഹുവിന്റെയും സര്‍ക്കാറിന്റെയും തെറ്റായ നയങ്ങളുടെ ഫലമായാണ് ഇസ്‌റാഈല്‍ ഒറ്റപ്പെട്ടത്. ഇസ്‌റാഈലിനെ ഒരു മൂന്നാം ലോക രാജ്യമാക്കി മാറ്റാനാണ് നെതന്യാഹു ശ്രമിക്കുന്നത് -ലാപിഡ് കുറ്റപ്പെടുത്തി. 

israeli prime minister benjamin netanyahu acknowledges that international sanctions and boycotts over gaza war are isolating israel. he calls for economic self-reliance and arms production amid growing global criticism.