കാബൂള്‍: അഫ്ഗാന്‍ തലസ്ഥാനമായ കാബൂളിലെ അന്താരാഷ്ട്ര സഹായ കേന്ദ്രത്തില്‍ ആളുകളെ ബന്ദികളാക്കിയ മൂന്നു തീവ്രവാദികളെ ഏറ്റുമുട്ടലില്‍ വധിച്ചു. 11 മണിക്കൂര്‍ നീണ്ട ഏറ്റുമുട്ടലിലാണ് ഇവരെ വധിച്ചത്. കാബൂളിനെ നടുക്കിയ മൂന്നു സ്‌ഫോടനങ്ങള്‍ക്കു പിന്നാലെയാണ് തീവ്രവാദികള്‍ അന്താരാഷ്ട്ര സഹായ കേന്ദ്രത്തിന്റെ കെട്ടിടത്തില്‍ ഇരച്ചുകയറിയത്. ഷറെ നൗ ജില്ലയിലാണ് സംഭവം.
 നേരത്തെ ഒരു സിവിലിയനും കൊല്ലപ്പെട്ടതായി റിപ്പോര്‍ട്ടുണ്ടായിരുന്നുവെങ്കിലും പിന്നീട് ആഭ്യന്തരമന്ത്രാലയം ഇതു തിരുത്തി. മൂന്നു തീവ്രവാദികള്‍ മാത്രമാണ് കൊല്ലപ്പെട്ടതെന്ന് ആഭ്യന്തരമന്ത്രാലയ വക്താവ് സിദ്ദീഖ് സിദ്ദീഖി അറിയിച്ചു.
സഹായകേന്ദ്രത്തിലുണ്ടായിരുന്നവരെ ബന്ദികളാക്കിയ തീവ്രവാദികള്‍ പൊലിസിനു നേരെ വെടിവയ്ക്കുകയായിരുന്നു. തിങ്കളാഴ്ച രാത്രി തുടങ്ങിയ വെടിവയ്പ് ഇന്നലെയും തുടര്‍ന്നു. പംലാറിനയിലെ ചാരിറ്റി കെയര്‍ ഇന്റര്‍നാഷനലിന്റെ കെട്ടിടത്തിലാണ് ആക്രമണം നടന്നത്. 11 വിദേശികള്‍ ഉള്‍പ്പെടെ 42 പേരെയാണ് ബന്ദികളാക്കിയത്. അഫ്ഗാന്‍ സര്‍ക്കാര്‍ വളപ്പിലാണ്  കെയര്‍ ഇന്റര്‍നാഷനലിന്റെ കാബൂള്‍ ഓഫിസ്. എല്ലാ ജീവനക്കാരെയും സുരക്ഷിതമായി ഒഴിപ്പിച്ചതായി പൊലിസ് പറഞ്ഞു. നിരവധി ഗസ്റ്റ്ഹൗസുകള്‍ പ്രവര്‍ത്തിക്കുന്ന ഇവിടെ വിദേശികളും നയതന്ത്ര ഉദ്യോഗസ്ഥരും താമസിക്കുന്നുണ്ട്.