ന്യൂഡൽഹി: കോൺഗ്രസ് നേതാവ് രാഹുൽ ഗാന്ധിയെ രാഷ്ട്രീയമായി ആക്രമിക്കുന്നത് ഇനി തന്റെ ഉത്തരവാദിത്തങ്ങളുടെ ഭാഗമല്ലെന്ന് മുൻ കേന്ദ്രമന്ത്രിയും ബിജെപി നേതാവുമായ സ്മൃതി ഇറാനി. 2019-ലെ ലോക്സഭാ തെരഞ്ഞെടുപ്പിൽ ഉത്തർപ്രദേശിലെ അമേത്തിയിൽ കോൺഗ്രസിന്റെ ശക്തികേന്ദ്രത്തിൽ രാഹുൽ ഗാന്ധിയെ പരാജയപ്പെടുത്തിയതിനെക്കുറിച്ചുള്ള ചോദ്യത്തോട് പ്രതികരിക്കുകയായിരുന്നു സ്മൃതി ഇറാനി.

"നേരത്തെ അത് എന്റെ ഉത്തരവാദിത്തമായിരുന്നു. ഇപ്പോൾ അതല്ല." സ്മൃതി ഇറാനി പറഞ്ഞു. 

2024-ലെ ലോക്സഭാ തെരഞ്ഞെടുപ്പിൽ രാഹുൽ ഗാന്ധി അമേത്തിയിൽ മത്സരിച്ചിരുന്നെങ്കിൽ താൻ അദ്ദേഹത്തെ തോൽപ്പിച്ചേനെയെന്ന് സ്മൃതി ഇറാനി അവകാശപ്പെട്ടു. "അതുകൊണ്ടാണ് അദ്ദേഹം അമേത്തിയിൽ മത്സരിക്കാതിരുന്നത്," അവർ കൂട്ടിച്ചേർത്തു. 2024-ൽ അമേത്തിയിൽ കെ.എൽ. ശർമയെയായിരുന്നു കോൺഗ്രസ് കളത്തിൽ ഇറക്കിയിരുന്നത്. സിറ്റിം​ഗ് എംപിയായ സ്മൃതി ഇറാനിയെ പരാജയപ്പെടുത്തി അമേത്തിയിൽ കെ.എൽ ശർമ വിജയിച്ചിരുന്നു. അതേസമയം, രാഹുൽ ഗാന്ധി വയനാടിന് പുറമെ റായ്ബറേലിയിലും വിജയിച്ചിരുന്നു. പിന്നീട് വയനാട് ഒഴിയുകയായിരുന്നു.

ALSO READ: ജഗ്ധീപ് ധന്‍കറിന്റെ രാജി പുനഃപരിശോധിക്കണമെന്ന് കോണ്‍ഗ്രസിനില്ല; ജയറാം രമേശിന്റെ ആവശ്യത്തോട് ഹൈക്കമാന്റിന് താല്‍പ്പര്യമില്ലെന്ന് സൂചന

"2024-ൽ ഗാന്ധി കുടുംബം എനിക്കെതിരെ മത്സരിക്കാൻ വിസമ്മതിച്ചു. അവർ യുദ്ധക്കളത്തിൽ പോലും പ്രവേശിച്ചില്ല. എനിക്ക് എന്ത് പറയാൻ കഴിയും?" ഇന്ത്യാ ടുഡേ ടിവിക്ക് നൽകിയ അഭിമുഖത്തിൽ സ്മൃതി ഇറാനി ചോദിച്ചു. അമേത്തി ഒരു എളുപ്പമുള്ള മണ്ഡലമല്ലെന്നും, ശരദ് യാദവ്, മനേക ഗാന്ധി തുടങ്ങിയ പ്രമുഖ നേതാക്കൾ പോലും അവിടെ പരാജയപ്പെട്ടിട്ടുണ്ടെന്നും അവർ ചൂണ്ടിക്കാട്ടി.

"ഒരു ബുദ്ധിമാനായ നേതാവ് പരാജയം ഉറപ്പുള്ള സീറ്റ് തിരഞ്ഞെടുക്കില്ല. 2019-ൽ ഞാൻ അസാധ്യമായത് സാധ്യമാക്കി," 2014-ൽ രാഹുൽ ഗാന്ധിയോട് പരാജയപ്പെട്ട ശേഷം മണ്ഡലത്തിൽ താൻ കഠിനാധ്വാനം ചെയ്തുവെന്നും ഇറാനി പറഞ്ഞു. ഗാന്ധി കുടുംബം അമേത്തിയെ തിരഞ്ഞെടുത്തത് അവിടുത്തെ സാമൂഹിക സമവാക്യം അനുകൂലമായതിനാലാണെന്നും അവർ വ്യക്തമാക്കി.

ALSO READ: ജസ്റ്റിസ് യശ്വന്ത് വര്‍മയുടെ ഹരജി പരിഗണിക്കാന്‍ പ്രത്യേക ബെഞ്ച് രൂപീകരിക്കാന്‍ സുപ്രിം കോടതി

2024-ലെ തോൽവിയെക്കുറിച്ച് ചോദിച്ചപ്പോൾ, "പ്രകടനവും രാഷ്ട്രീയ സമവാക്യവും തമ്മിൽ വ്യത്യാസമുണ്ട്. ആളുകൾ എന്റെ പ്രവർത്തനത്തെ വിലമതിച്ചിട്ടുണ്ട്. ഞാൻ ദേശീയ താൽപ്പര്യത്തിനായാണ് പ്രവർത്തിച്ചത്,"സ്മൃതി  ഇറാനി പറഞ്ഞു.

"49-ാം വയസ്സിൽ ആര് വിരമിക്കുന്നു? ഞാൻ മൂന്ന് തവണ എംപിയും അഞ്ച് വകുപ്പുകളുടെ മന്ത്രിയുമായിരുന്നു. ഇനിയും ഒരുപാട് ദൂരം പോകാനുണ്ട്," പാർലമെന്റിലേക്കുള്ള തിരിച്ചുവരവിനെക്കുറിച്ചുള്ള ചോദ്യത്തിന് സ്മൃതി ഇറാനി മറുപടി നൽകി. 2029-ലെ തെരഞ്ഞെടുപ്പിൽ അമേത്തിയിൽ മത്സരിക്കുമോ എന്ന ചോദ്യത്തിന്, "പാർട്ടിയുടെ തീരുമാനം പ്രവചിക്കാനാകില്ല. 2025-ലോ 2026-ലോ പാർട്ടി എന്തെങ്കിലും തീരുമാനിച്ചേക്കാം," അവർ പറഞ്ഞു.

Former Union Minister Smriti Irani stated that politically attacking Rahul Gandhi is no longer part of her responsibilities, indicating a shift in her political focus.