റിയാദ്: പടിഞ്ഞാറൻ സഊദി അറേബ്യയിലെ പ്രശസ്ത പർവത റിസോർട്ട് നഗരമായ തായിഫിലെ അൽ ഹദ ജില്ലയിൽ ബുധനാഴ്ച വൈകുന്നേരം അമ്യൂസ്‌മെന്റ് പാർക്കിലെ റൈഡ് തകർന്നുവീണ് 23 പേർക്ക് പരുക്കേറ്റു. പരുക്കേറ്റവരിൽ നിരവധി യുവതികളും ഉൾപ്പെട്ടിട്ടുണ്ട്. ഇവരിൽ മൂന്ന് പേരുടെ നില ഗുരുതരമാണെന്ന് പ്രാദേശിക അധികൃതർ അറിയിച്ചു.

ALSO READ: 2026 ലെ ഹജ്ജ് അപേക്ഷ തീയതി ആഗസ്റ്റ് 7 വരെ നീട്ടി; ഇന്നലെ വരെ ലഭിച്ചത് ഇരുപതിനായിരത്തിലേറെ അപേക്ഷകൾ

പ്രവർത്തിച്ചു കൊണ്ടിരുന്ന റൈഡിൽ നിരവധി പേർ ഉണ്ടായിരുന്നെന്നും, ഇതിന്റെ ഒരു ഭാ​ഗം പെട്ടെന്ന് തകർന്നതാണ് അപകടത്തിന് കാരണമായത്. പരിഭ്രാന്തിയും ഭയവും നിറഞ്ഞ രംഗങ്ങൾ ദൃക്‌സാക്ഷികൾ വിവരിച്ചു. റൈഡർമാർ താഴേക്ക് ഇടിച്ചുവീണപ്പോൾ സമീപത്തുണ്ടായിരുന്നവർ നിലവിളിച്ചതായും റിപ്പോർട്ടുകൾ സൂചിപ്പിക്കുന്നു. സിവിൽ ഡിഫൻസ് ടീമുകളും സഊദി റെഡ് ക്രസന്റ് പാരാമെഡിക്കുകളും ഉൾപ്പെടെയുള്ള അടിയന്തര രക്ഷാപ്രവർത്തകർ സ്ഥലത്തെത്തി. പരുക്കേറ്റവരെ അടുത്തുള്ള ആശുപത്രികളിലേക്ക് മാറ്റി. ഗുരുതരമായി പരുക്കേറ്റവർ ഇപ്പോഴും തീവ്രപരിചരണ വിഭാഗത്തിൽ നിരീക്ഷണത്തിലാണ്.

അപകടത്തെ തുടർന്ന് അമ്യൂസ്‌മെന്റ് പാർക്ക് അടച്ചുപൂട്ടാൻ അധികൃതർ ഉത്തരവിട്ടു. അന്വേഷണ ഫലം ലഭിക്കുന്നതുവരെ പാർക്ക് പ്രവർത്തനം നിർത്തിവയ്ക്കും. റൈഡിന്റെ തകരാനുണ്ടായ കാരണവും പാർക്ക് ആവശ്യമായ സുരക്ഷാ മാനദണ്ഡങ്ങളും സാങ്കേതിക ചട്ടങ്ങളും പാലിച്ചിട്ടുണ്ടോ എന്നും കണ്ടെത്താൻ മുനിസിപ്പൽ അധികാരികൾ, ജനറൽ എന്റർടൈൻമെന്റ് അതോറിറ്റി, സുരക്ഷാ സേവനങ്ങൾ എന്നിവയിൽ നിന്നുള്ള സംഘം സമഗ്രമായ അന്വേഷണം ആരംഭിച്ചു.

ALSO READ: ഫലസ്തീൻ രാഷ്ട്ര പദവിക്ക് 15 മാസത്തെ സമയപരിധി നിശ്ചയിച്ച് സഊദിയുടെയും ഫ്രാൻസിന്റെയും നേതൃത്വത്തിലുള്ള സമ്മേളനം

സോഷ്യൽ മീഡിയയിൽ പ്രചരിച്ച അപകടത്തിന്റെ വീഡിയോ ആളുകളുടെ നടുക്കം വ്യക്തമാക്കുന്നു. റൈഡ് തകർന്നുവീഴുന്നതും തുടർന്നുള്ള ഭയാനകമായ നിലവിളികളും വീഡിയോയിൽ പകർത്തിയിട്ടുണ്ട്. ഈ സംഭവം വിനോദ കേന്ദ്രങ്ങളിലെ സുരക്ഷയെക്കുറിച്ചുള്ള പൊതുജനങ്ങളുടെ ആശങ്കകൾ വർധിപ്പിച്ചിരിക്കുകയാണ്.

A ride at a Saudi Arabian amusement park collapsed, injuring 23 people. Three individuals are reported to be in critical condition as authorities investigate the cause of the accident.