ഷാര്‍ജ: മരണ കാരണം സംബന്ധിച്ച ഫോറന്‍സിക് റിപ്പോര്‍ട്ട് ഇതുവരെയും ലഭിച്ചിട്ടില്ലാത്തതിനാല്‍ ഷാര്‍ജയില്‍ മരിച്ചനിലയില്‍ കണ്ടെത്തിയ മലയാളി യുവതി അതുല്യയുടെ മൃതദേഹം നാട്ടിലെത്തിക്കുന്നത് വൈകുമെന്ന് വിവരം. ഇതിനായി തിങ്കളാഴ്ച വരെ കാത്തിരിക്കേണ്ടി വരും. ഷാര്‍ജയില്‍ വെള്ളി മുതല്‍ ഞായറാഴ്ച വരെ വാരാന്ത്യ അവധിയാണെന്നതാണ് വൈകാന്‍ കാരണം.

അതുല്യയുടെ ശരീരത്തില്‍ കണ്ടെത്തിയ പാടുകള്‍ വിശദ പരിശോധനയ്ക്ക് വിധേയമാക്കും. മരണം കൊലപാതകമാണോയെന്ന സംശയമുന്നയിച്ച് അതുല്യയുടെ സഹോദരി അഖില ഷാര്‍ജ പൊലിസില്‍ പരാതി നല്‍കിയിട്ടുണ്ട്.

ഫോറന്‍സിക് റിപ്പോര്‍ട്ട് ലഭിക്കുന്നതോടെ മാത്രമേ അതുല്യയുടെ മരണത്തിലെ ദുരൂഹത നീങ്ങുകയുള്ളൂ. തുടര്‍ന്ന്, മൃതദേഹം നാട്ടിലെത്തിക്കുന്ന കാര്യത്തില്‍ വ്യക്തതയാകും. ഫലം ലഭിച്ചതിനുശേഷം ആയിരിക്കും ഷാര്‍ജ പൊലിസ് തുടര്‍ നടപടികള്‍ സ്വീകരിക്കുക. നേരത്തെ തന്നെ അതുല്യയുടെ ഭര്‍ത്താവ് സതീഷിനെതിരെ സഹോദരി അഖില ഷാര്‍ജത്തില്‍ പരാതി നല്‍കിയിരുന്നു.

അതുല്യയുടെ മൃതദേഹം നാട്ടിലേക്ക് കൊണ്ടുവരുന്നതിനായുള്ള നടപടികള്‍ ബന്ധുക്കള്‍ ആരംഭിച്ചിട്ടുണ്ട്. ഇതിന് ഭര്‍ത്താവ് സതീഷ് സമ്മതിച്ചില്ലെങ്കില്‍ സഹോദരി അഖിലക്ക് പവര്‍ഓഫ് അറ്റോണി നല്‍കി മൃതദേഹം നാട്ടിലെത്തിക്കാന്‍ സാധിക്കും. അതുല്യയുടെ മരണത്തില്‍ നാട്ടില്‍ മാതാപിതാക്കള്‍ നല്‍കിയ പരാതിയില്‍ ചവറ തെക്കുംഭാഗം പോലീസ് സ്റ്റേഷനില്‍ ഭര്‍ത്താവായ സതീഷിനെതിരെ നേരത്തെ തന്നെ കേസ് രേഖപ്പെടുത്തിയിരുന്നു. തെക്കുംഭാഗം സിഐയുടെ നേതൃത്വത്തിലുള്ള പ്രത്യേക അന്വേഷണ സംഘമാണ് ഈ കേസ് അന്വേഷിക്കുന്നത്

ജൂലൈ 19നാണ് അതുല്യയെ ഫ്‌ലാറ്റില്‍ മരിച്ച നിലയില്‍ കണ്ടെത്തിയത്. സംഭവം നടക്കുന്ന ഒരു ദിവസങ്ങള്‍ക്കു മുമ്പ് ഭര്‍ത്താവായ് സതീഷില്‍ നിന്നുണ്ടായ മാനസിക, ശാരീരിക പീഡനങ്ങളുടെ വിവരം ഫോണിലൂടെ അമ്മയെയും ബന്ധുക്കളെയും അതുല്യ അറിയിച്ചിരുന്നു.

Forensic report not received: Repatriation of Atulya's body will be delayed