അബൂദബി/വിശാഖപട്ടണം: യു.എ.ഇയും ഇന്ത്യയും തമ്മിലുള്ള മികച്ച നിക്ഷേപങ്ങള്‍ക്ക് വഴിയൊരുക്കി ആന്ധ്രാപ്രദേശില്‍ നടന്ന ഇന്‍വെസ്റ്റോപിയ ഗ്ലോബല്‍ സമ്മിറ്റ്. യു.എ.ഇ സാമ്പത്തിക മന്ത്രി അബ്ദുല്ല ബിന്‍ തൗഖ് അല്‍ മര്‍റി, ലുലു ഗ്രൂപ് ചെയര്‍മാന്‍ എം.എ യൂസഫലി, യു.എ.ഇയില്‍ നിന്നുള്ള വ്യവസായ പ്രമുഖര്‍ പങ്കെടുത്ത സമ്മിറ്റില്‍ ഇന്ത്യയു.എ.ഇ നിക്ഷേപ രംഗത്തെ പുതിയ സാധ്യതകള്‍ ചര്‍ച്ചയായി. ഇന്ത്യയു.എ.ഇ ഫുഡ് കോറിഡോര്‍, ഗ്രീന്‍ എനര്‍ജി, സീപോര്‍ട്ട്, ലോജിസ്റ്റിക്‌സ്, ഷിപ് ബില്‍ഡിങ്, ഡിജിറ്റല്‍, എ.ഐ, സ്‌പേസ്, ടൂറിസം രംഗങ്ങളില്‍ നിക്ഷേപം ശക്തിപ്പെടുത്താനും ധാരണയായി.

ആന്ധ്രാപ്രദേശില്‍ നിന്നുള്ള നിക്ഷേപങ്ങള്‍ക്ക് എല്ലാവിധ പിന്തുണയും സര്‍ക്കാര്‍ ഉറപ്പുനല്‍കുന്നുവെന്ന് മുഖ്യമന്ത്രി ചന്ദ്രബാബു നായിഡു വ്യക്തമാക്കി. കൂടുതല്‍ പദ്ധതികള്‍ നടപ്പാക്കാന്‍ ലുലു അടക്കം യു.എ.ഇ ആസ്ഥാനമായുള്ള കമ്പനികളെ മുഖ്യമന്ത്രി ചന്ദ്രബാബു നായിഡു ആന്ധ്രയിലേക്ക് ക്ഷണിച്ചു. ലുലു ഗ്രൂപ്പിന്റെ നിക്ഷേപങ്ങള്‍ക്ക് എല്ലാവിധ പിന്തുണയും ചന്ദ്രബാബു നായിഡു അറിയിച്ചു.
അമരാവതിയിലേക്ക് കൂടി ലുലുവിന്റെ സേവനം വിപുലമാക്കണമെന്ന് മുഖ്യന്ത്രി ചന്ദ്രബാബു നായിഡു യൂസഫലിയോട് ആവശ്യപ്പെട്ടു. ആഗോള സാമ്പത്തിക ഉച്ചകോടി നടക്കുന്ന ദാവോസില്‍ വര്‍ഷങ്ങള്‍ക്ക് മുമ്പ് യൂസഫലിയുമായി നേരിട്ടുകണ്ട് നിക്ഷേപ കാര്യങ്ങള്‍ക്കായി സംസ്ഥാനത്തേക്ക് ക്ഷണിച്ചതും ലുലു മാളിന്റെ പ്രവര്‍ത്തനങ്ങള്‍ നേരിട്ടുകണ്ട് വിലയിരുത്താന്‍ കൊച്ചിയിലെത്തിയ കാര്യവും നായിഡു ഉദ്ഘാടന പ്രസംഗത്തില്‍ ഓര്‍മിച്ചു. ഇന്ത്യയും യു.എ.ഇയും തമ്മില്‍ മികച്ച വ്യാപാര ബന്ധമാണ് ഉള്ളതെന്നും, യു.എ.ഇയുടെ മൂന്നാമത്തെ വലിയ വ്യാപാര പങ്കാളിയാണ് ഇന്ത്യയെന്നും യു.എ.ഇ സാമ്പത്തിക മന്ത്രി അബ്ദുല്ല ബിന്‍ തൗഖ് അല്‍ മര്‍റി പറഞ്ഞു.

വിശാഖപട്ടണത്ത് ഷോപ്പിങ് മാള്‍, വിജയവാഡയില്‍ ഭക്ഷ്യസംസ്‌കരണ കേന്ദ്രം, ഹൈപര്‍ മാര്‍ക്കറ്റുകള്‍ അടക്കം ആന്ധ്രയില്‍ വിപുലമായ പദ്ധതികള്‍ യാഥാര്‍ഥ്യമാക്കുമെന്ന് എം.എ യൂസഫലി വ്യക്തമാക്കി. വിശാഖപട്ടണത്തെ ഷോപ്പിങ്ങ മാള്‍ യാഥാര്‍ഥ്യമാകുന്നതോടെ 8,000 പേര്‍ക്ക് തൊഴിലവസരം ഒരുങ്ങും. വിജയവാഡയില്‍ ഭക്ഷ്യസംസ്‌കരണ കേന്ദ്രത്തിന്റെ നിര്‍മാണം ആലോചനയിലാണ്. ആന്ധ്രയിലെ കര്‍ഷകര്‍ക്കും സര്‍ക്കാരിനും മികച്ച പിന്തുണ നല്‍കുന്നത് കൂടിയാണ് ലുലുവിന്റെ പദ്ധതികളെന്നും യൂസഫലി പറഞ്ഞു. ആന്ധ്രയില്‍ നിന്നുള്ള പച്ചക്കറിപഴം ഉത്പന്നങ്ങള്‍ മിഡില്‍ ഈസ്റ്റിലേതുള്‍പ്പെടെ ലുലു സ്റ്റോറുകളില്‍ ലഭ്യമാക്കുന്നതിലൂടെ സംസ്ഥാനത്തിന്റെ തനത് കാര്‍ഷിക വിഭവങ്ങളുടെ ഗുണമേന്മ ലോകമെമ്പാടും എത്തുമെന്നും അദ്ദേഹം പറഞ്ഞു.

In a major push to attract investments into Andhra Pradesh, Chief Minister N. Chandrababu Naidu set an ambitious target of Rs 10 lakh crore investments for the year.