അബൂദബി: ഉയര്‍ന്ന താപനിലയുമായി ബന്ധപ്പെട്ട സുരക്ഷാ ആശങ്കകള്‍ ചൂണ്ടിക്കാട്ടി, ഉച്ച കഴിഞ്ഞുള്ള സമയങ്ങളില്‍ മയ്യിത്ത് നിസ്‌കാരങ്ങള്‍ നടത്തുന്നത് ഒഴിവാക്കാന്‍ ജനറല്‍ അതോറിറ്റി ഓഫ് ഇസ്ലാമിക് അഫയേഴ്‌സ്, എന്‍ഡോവ്‌മെന്റ്‌സ് ആന്‍ഡ് സകാത്ത് പൊതുജനങ്ങളെ ഉപദേശിച്ചു.
അതിരാവിലെയോ, സൂര്യരശ്മികള്‍ ശക്തി കുറഞ്ഞ വൈകുന്നേരമോ മയ്യിത്ത് നിസ്‌കാരങ്ങളും സംസ്‌കാര നടപടിക്രമങ്ങളും നിര്‍വഹിക്കേണ്ടതിന്റെ പ്രാധാന്യം ഇന്നലെ പുറത്തിറക്കിയ പ്രസ്താവനയില്‍ അതോറിറ്റി ഊന്നിപ്പറഞ്ഞു.

രാവിലെ 10 നും വൈകുന്നേരം 5നും ഇടയില്‍ അത്തരം സേവനങ്ങള്‍ നടത്തുന്നതിനെതിരെ പ്രത്യേക മുന്നറിയിപ്പ് നല്‍കുന്നു. ഇക്കാലയളവ് ചൂടില്‍ ആഘാതത്തിനും ക്ഷീണത്തിനും സാധ്യതയുള്ളതിനാല്‍ പ്രത്യേകിച്ച് അപകടകരമാണെന്ന് തിരിച്ചറിഞ്ഞിട്ടുണ്ട്.

യു.എ.ഇയിലെ വേനല്‍ക്കാലത്തെ ചൂടില്‍ മയ്യിത്ത് നിസ്‌കാരസംസ്‌കാര ചടങ്ങുകളില്‍ പങ്കെടുക്കുന്നവരുടെ ആരോഗ്യവും ക്ഷേമവും സംരക്ഷിക്കുന്നതിനുള്ള നിരന്തര ശ്രമങ്ങളുടെ ഭാഗമാണ് ഈ അറിയിപ്പെന്നും ജനറല്‍ അതോറിറ്റി ഓഫ് ഇസ്ലാമിക് അഫയേഴ്‌സ്, എന്‍ഡോവ്‌മെന്റ്‌സ് ആന്‍ഡ് സകാത്ത് വ്യക്തമാക്കി.

അതേസമയം, യുഎഇയില്‍ അസ്ഥിരമായ വേനല്‍ക്കാല കാലാവസ്ഥ തുടരുകയാണ്. രാജ്യത്തിന്റെ ചില ഭാഗങ്ങളില്‍ ഇന്ന് മഴയ്ക്ക് സാധ്യതയുണ്ടെന്ന് നാഷണല്‍ സെന്റര്‍ ഓഫ് മെറ്റീരിയോളജി (എന്‍സിഎം) പ്രവചിച്ചു. ചില പടിഞ്ഞാറന്‍ പ്രദേശങ്ങളില്‍ രാത്രിയിലും ഞായറാഴ്ച രാവിലെയും മൂടല്‍മഞ്ഞിന് സാധ്യതയുള്ള ഈര്‍പ്പമുള്ള അവസ്ഥയുണ്ടാകും.

ALSO READ: അബൂദബിയിലും അല്‍ഐനിലും ഇന്നും നാളെയും റോഡുകള്‍ ഭാഗികമായി അടച്ചിടും | UAE Traffic Alert

In light of the soaring summer temperatures, UAE authorities are urging residents to perform funeral prayers and burial procedures during the early morning or evening hours, when the intensity of the sun is at its lowest.